ما الحل اشتريت سياره وراعيها نصب علي؟

ارجع لهم وقولهم السيارة ما طلعت على كلامكم وأبغى أرجعها
ما شفت عندهم علم وإلا حل اتجه لشيخ المعارض وبلغه بالموضوع وشوف وش عنده من حلول
إذا ما نفع روح لأقرب مركز شرطة وافتح ملف شكوى وقول للعسكري أنا أبغاها تتحول للقضاء وأبغاه يحلف عند القاضي وبعدها راح تلقى العلم اللي يسرك وسلامتك

انت الغلطان من قالك لا تفحص
الفحص هو برهان السياره
ف كيف تبي فلوسك وانت من اساس الموضوع ما فحصت السياره وصدقت كلامه
يا حبيبي المفروض تفحص السياره من والي
الله يكون في عونك ويعوضك خير

هو بيحلف لك قبل تصل القاضي بيعطيك محلوفبن فوق البيعة 
وهو قد حلف لك أول ما شريتها وقد أقسم مية مرة
والمثل يقول
 قالوا للحرامي احلف قال جاك الفرج
أخي الكريم لا تدخل في دوامة مشاكل أنت في غنى عنها 
(ليش ما تفحص السيارة ؟)
هذا السؤال سوف تسمعه من جميع الجهات التي تراجعها،
القضاء له نظرة ولا ينظر لكل الكلام اللي تقوله
 هو ينظر هل هذا البيع ((بيع غبن ))أو لا ؟
ونادراً ما تنطبق شروط بيع الغبن على السيارات
تذكر أنك شريت سيارة مفحوووصة ومجددة
تذكر جيداً أن القانون لا يحمي الطيبين 
ما هو الحل 
تعيد السيارة بالحسنى مع حبة خشم وتحمل تكاليف النقل مرتين
إن قبل البائع والفضل له
أو تستخدم سيارتك وتصلح الخرابات لأنها بالفعل أصبحت سيارتك
وليست سيارة أحد غيرك.

اتفق مع الاخ مصعب, و حاب ازيد شي, فعلا لنفرض انك رحت المعرض او اي جهة أكيد بيسألونك هالسؤال "ليش ما فحصت؟"
و اكيد بيحملونك المشكلة لأنك ما فحصت من البداية. كثير مواضيع في المنتديات و حتى مقاطع على اليوتيوب ينصحون بلزوم
الفحص كامل السيارة من حيث البدي او ميكانيكا (مكينة و قير او تحت السيارة) يعني لا تاخذ بكلام راعي السيارة السابق.
يمكن فيه اشياء خربت و هو ما يدري عنها السيارة واقفة بمعرض يمكن خرب شي فيها وهي بالمعرض او واقفة بمكان.
خرابات السيارة ما لها موعد اي وقت ممكن يصير شي.
شي

إذا السيارة جيدة والمشكلة فقط في المكينة غيرها والله يعوضك خير

لا تضيع وقتك مع ناس اعتادوا أكل أموال الناس بالباطل

طبيعي اي شخص يحلف مليون مرة انه يكون كذاب، لو صادق و واثق من سيارته
ما بيحلف نهائيا.

و دايما افحص السيارة ، سواء من شخص تعرفه او ماتعرفه ان شاء الله يكون امام مسجد،

الفحص بيكلف 150 الى 200 ريال بالكثير و لكن بتوفر عليك مشاكل كثيره و وقت.

و ايضا الفحص ممكن ينقص لك سعر السيارة اذا طلع فيها خرابات مقبولة و تقدر تساوم صاحب
السيارة عليها بعد نتيجة الفحص، فالحص كله خير لك.

انا لست مع عبارة القانون لا يحمي المغفلين، بالعكس القانون يحمي الجميع .

من حقك تصعد الموضوع للمجكمه و تهلكه و لا تخليه يهداله بال. و لكن يبغالك صبر كبير.

اذا كانت السيارة تستحق التصليح فصلحها و الا بيعها على حالتها الراهنه مع ايضاح الخلل للمشتري.

و الله يعينك.

اولا الله يعوضك خير ياصاحب الموضوع
ثانيا الاخ مصعب ذكر انه من النادر ان تنطبيق شروط بيع الغبن في السيارات مع ان كثير ناس يشترو سيارات ويفحصوها وللاسف يطلع فيها مشاكل لان مركز الفحص متفق مع البائع ليش قبل لايشتري اي شخص سيارة مستعملة يعرف القانون صح وشروط بيع الغبن علشان يضمن حقه واي شخص تسول له نفسه يغش يعرف ان وراه محاكم ومرمطة لو يلجا لمحامي الي ناوي يشتري سيارة مستعملة هههههههه قوية يلجا لمحامي

كل اللي عليك ترجع لصاحب السيارة وتبين له العيب

وأن يوفي بكلامه والرجاال عند كلمته

قال لك انها نظيفه وطلعت معيوبة

قول له يا انت رجال وتسترد سيارتك وتعطيني فلوسي والوجه من الوجه ابيض

اذا رضى كان بها

واذا مارضى لا تقول برفع عليك شكوى او اسوي وافعل

روح قدم بلاغ وخل الموضوع يوصل للقاضي وراح يستدعونه
واذا جاب له احـد يتوسط لا تعطيه مجال اتركه للشيخ راح يطلب منه اليمين

وان حلف كذب والله مراح يتوفق لا هو ولا بيعته وراح يلقاها في الدنيا قبل الآخرة

وان اقر واعترف وعطاك العوض لاترضى باقل من ست الاف قيمة مكينة من التشليح

مع احترامي للاخ مصعب وكلامه ماخلى الشريطية يستقوون على الضعوف
ويبلعون مال حرام عيني عينك الا سكوتنا عن مواصلة الدعوى وابواب المحاكم

لو كل انسان اتضرر من احـد لو في خمس ريال وطالب بها شرعاً ولا سامح

ماكان وصلنا لهذه المرحلة

والقانون يحمي الطيبين <<<

لكن وانا اخوك مثل ماوصيتك سوي اللي قلت لك عليه وجيب فحص موثق وارفقه في ملف القضية

هو ان حلف كذب ما راح يعين خير لا في دنياه ولا في اخرته

السلام عليكم
اخوي ع طول توجه للمحكمة ارفع دعوة عليه ما يحتاج تروح للشرطة صارت قبل كذا والقضاء ارجع السيارة توكل على الله

البيع والشراء ليس لعبة متى ما ندم أحدهما فسخ البيع 
وفي الحديث البيعان بالخيار ما لم يتفرقا،
أي إذا تفرقا نفذ البيع
قد يتضح بيع الغبن في السلعة الجديدة
لأنها لم تستخدم ولأنها ذات سعر موحد 
أما السيارة المستخدمة فهي مستخدمة على اسمها
ومكينتها وكفراتها وفحمات الفرامل هي قطع مستهلكة 
ذات عمر افتراضي معلوم  لا يعتبر من الغبن في البيع ،
إلا في حالة (مثلاً )استطاع المشتري اثبات أن سنة الصنع 
أو المديل (فل كامل أو نص فل ) غير المكتوب في الإستمارة 
أو أوراقها الأخرى 
أو في حالة (وهذا يحدث كثيراً) تغيير ممشى السيارة  
وهنا سوف ينصفه القانون  
وما عدى هذا فهو مضيعة لوقتك و وقت القانون ،

انا شريت سيارة بدون فحص وطلعت مقلوبه ومسمكرة كلها ، طبعا مافحصت وشريتها بالليل ، كانت اول سيارة اشتريها مستعملة ، تجربه قاسية والحمد لله على كل حال .

أنا شريت سياره من معرض والمعرض شرط شاصي ومحركات شغاله وبعدها السياره طلعت مصدومه وفيها شاهي وش الحال