استفسار انسرق الموتر

وعليكم السلام ورحمة الله 

رح لهم المركز وقدم هناك 

ركب لها انذار وايضا في اجهزة تركبها فالموتر تحدد لك موقعه في حال لاقدر الله انسرق الموتر او تبغ تعرف فين يروح اللي يسوق سيارتك 

حصلت مع ولد عمي واشترى جهاز تتبع مع البرنامج حقه لمدة سنة 
بمبلغ قرابة ٨٠٠ ريال ... 

لكن فيه طريقة بسيطة ولا احد ينتبه لها كثير

 اسحب فيش حساس الهواء اللَّي يجيك فوق فلتر هواء المكينة 
هذا يمنع تشغيل السيارة ...

والله يعينك ويسرها لك ..

دامه خذ نسخه من المفتاح معناته راح يرجع بعد شهر او شهرين
يحاول يبرمج المفتاح وياخذ السياره بس هذا كله لازم يسويله تخطيط ويارقب وقت دخولك وخروجك
عندك حلين اما تغير كالون المفاتيح او تركب جهاز تتبع او تركب فاصل مايكلفك 80 ريال
واما الشرطه مافيه شي يقدرون يسونه لك مجرد يرفعون بلاغ عن سرقه في الحي

اشتر راحتك وغير مكان الشقة الى شقه امنه وفيها كاميرات افضل من انك تخسر السيارة كلها ويمكن يبيعونها تشليح وتتفكك بالكامل

او كلم صاحب الشقه بتركب كاميرات حتى تحفظ حقك

كيف يبرمج المفتاح على موترك ماتوقع يقدر الخوف انه يرجع يفتح الموتر ويسرقه من جديد 

كيف يبرمج المفتاح على موترك ماتوقع يقدر الخوف انه يرجع يفتح الموتر ويسرقه من جديد 

عشان يبرمج المفتاح السيارة لازم تكون موجودة معه
بدون السيارة مايقدر إلا إنه يعمل البرمجة عن بيتك

في اكثر من طريقة مثل ماقالو الشباب في بعلبة الفيوزات فيوز طرمبة البنزين اعتقد او السلف اسحب اي واحد منهم اذا كنت حاس بينصرق مااتوقع في سرااق ميكانيكي بيجيك

مايقدر يبرمج المفتاح انه يشغل السيارة، هذه يبغالها كود و استمارة، لكن ممكن يرجع يفتح السيارة ويسرق محتويتها مره ثانية. اعتقد ان ماعندك جهاز انذار، ركب للسيارة واحد مع ريموت، يصير لو فتح السيارة بدون الريموت يشتغل الانذار. 
اما بالنسبة للشرطة لاتتوقع منهم شئ وصارلي نفس الموقف، لكن موضوع انه يقفل السماعة وحد يجي قوية، لا تسكت عن هذا الموضوع، اكتبلهم في تويتر وفي كل مكان بالتاريخ والوقت واللي صار. 

اذا الموقع تكثر فيه السرقات غير مكان سكنك والله يحفظك منهم

وعليكم السلام ،،

الحمد لله على كل حــال، والله يعوضك يا رب، وينتقم منهم.

اعتقد ما يقدر يبرمج المفتاح إلا يكون معه المفتاح الأصلي - اللي يشغل السيارة - والسيارة، وتتم البرمجة، لكن معه مفتاح يفتح بس الباب ما يقدر يشغل السيارة ولا يقدر يبرمجه.
والله أعـــلم، تأكد من محل المفاتيح.

الحل : تروح بسيارتك ومفتاحك اللي معك لمحل مفاتيح وقوله ابي أقص مفتاح جديد وبرمجه لي يشغل السيارة، واحتفظ به معك كنسخة احتياطية، وبهالطريقة لا يمكن يشغل السيارة بالمفتاح المسروق.
أو غير مفتاح الباب (الكيلون) بس، ويكون معك مفتاحين، مفتاح للباب، ومفتاح للسويتش.
لكن لا تستبعد يرجع مرة ثانية (اللي سرق) ويحاول يشغل السيارة بالمفتاح اللي معه.


وفقك الله، وكتب أجرك ...

من يومين سامع صوت جنب البنايه وافتح الشباك واشوف ثنين يفكون كفر واحد من السيارات وانا ولا عارف هو تبعهم
او لا بقيت اراقبهم لحد ما تصرفاتهم بانت انهم بيسرقو شغلت تسجيل الفيديو صرخت عليهم اني متصل ع الشرطه وع الرجال
صاحب السيارة وهم جايين له قسم بالله ان ما هامه وبقى يفك الكفر لحد ما شاله ومشى !!

الله يعطيكم العافيه الجميع

بالنسبه للحي انا بشرق الرياض واجار مناسب لي وصعبه انقل

غيرت المثلث قبل شوي وفعلاً مثل ما قلتو انه ما يقدر يبرمج المفتاح لازم معه المفتاح الاصلي الي فيه شريحه قال لي احد المحلات كذا

اما القفل الخارجي بغيره مع انه لو بيسرق مره ثانيه وما فتح معه المفتاح بيكسر الزجاج مره ثانيه الله لا يوفقه ولا يسامحه واقابله عندي ربي 

اما بالنسبه للشرطه ف حسبي الله انتظار بالساعات وساحبين وثلاث سيارات مسروقه بنفس الحي ولا حاولو يأخذون بصمات بالنهايه كل واحد ركب سيارته وحرك
ما يجونك الا للقتل ومضاربات وغيره ويقولون ليه ما تختفي السرقات ما في عقوبه رادعه ولا شرطه تأخذ حق هالناس يسألك في شي ثمين ويسوى انسرق لما تقول له لا والحمدلله الكل كانت سيارته ما فيها شي يسوى ما يجونك وبكذا الحرامي بيستمر

صارت معي قبل 3 سنوات وانسرق 3 سيارات في نفس الشارع

طلعت الصبح والمثلث مكسور وطلعت لأقرب محل زجاج وغيرت المثلث وريحت نفسي لأني عارف أن الأشكال هذه متعودين على السرقة ولابس كفوف وما يترك بصمة وراه

جاري بلغ الشرطة ومرمطوه يوم كامل في الأدلة الجنائية وبدون أي فايدة

نصيحتي لكل واحد أنه ما يترك أي شيء ثمين أو شيء ملفت للنظر ومشجع على السرقة

والله الحافظ

الله لا يحلل ولا يبيح من يسرق اموال الناس .

لاتترك شئ مهم بالسيارة

وامر الشقه بسيط انقل منها

لاتقول الاجار قليل

الاجارات نزلت وفي هنا بالموقع اعلانات بالهبل تاجير عزاب ومن 1100 بالشهر وانت طالع مؤثثه
وكهرباء وماء على صاحب العماره ومواقعها حلوه

لاتاخذ اللي جوة الاحياء خذ على الشارع العام ويفضل اللي بجنبه مطاعم واسواق لوجود كمييرات

معوض خير

للأسف صار فيه تهاون من الشرطه اغلب الدواير الحكوميه

الأفضل تركب فاصل مدري كيف طريقته لكن يمديك تخليه مايشتغل السياره إلا بالزر.. وركب كيمرا داخل السياره تباع في حراج ب 400 إذا أحد هز السياره أو حاول يفتح الباب تشتغل ويوصلك إنذار على جوالك

الله يعوضك خير و الله لا يوفقه اللي عملها.

انا صار معي مثلك اليوم! صباحا الساعة 7 وجدت المثلث اليسار مكسور و الجيبة الداخلية مفتوحة لكن الحمد لله ما فيها شيء السيارة الللهم نظارة شمسية سرقها الفاعل...طبعا الشنطة ما تفتح الا على الريموت...السيارة واقفة على باب العمارة مباشرة طبعا و المكان مضاء بالكامل..العمارة اللي جنبنا مخربين كفرين لسيارة من السيارات اللي واقفة عندها..حسبي الله عليهم

عندي لك حل بسيط ركب فااصل لصباع البطاريه مايكلفك 100 ريال