استفسار بخصوص شراء GXR ممشاه كثير

وعليكم السلام
هيا اساسا هاذي اسعارها ع 25 وتحت النظيف
اما مابقى شي ع المليون وب 18 واصلاحات الخ

والبنزين بيعذبك وبيكرهك بالسياره

من رائي ابعد عنه

مثل ما قال اخوي ttt35035 واضيف على ذلك اذا حاط في بالك تاخذ بعض القطع من التشليح راح تنجلط من الاسعار المبالغه فيها.

نصيحة والله يابتحط فيه 40 الف ولا راح يرجع مثل أول وهو على ايامه يشرب ينزين مابالك ماشي قرابة المليون يعني المكينة تخرخر ولاتمسك زيتها كله يتبخر يبغالك زيت وبنزين شهريا يكلف 3الاف ريال وراعيه ماتنازل عنه ب18 الإ يحتاج تربيط وطرمبات وحساسات من الصدام للصدام نفض

نصيحه انحش
لاتهاون ب١٨ بتحط بلاوي
زي كلام الاخوان
صدقني اخذ كورلا ب١٨ ولا افكر بوجهه
موتر كد وموفر بنزين

تحية لراعيه على الاقل ما نزل عداد الكيلو و زوّر بالممشى
الله يجزاه خير على امانته

يقول المثل


يامن شرا له من حلاله علة


وش حـدك يابوي عليه مع ان في بدائل اخرى

بتشتري الجيب وبتدفع فوقه عشر الاف تصليحات وتلقيطات وغير كذا مر على موديله 18 سنه

اولا هذي فلوسك وتعمل بها اللي تبي
ثانيا انت لك منا النصيحه وانت تقبلها او لا
سياره بالحاله ذي بتكلفك اصلاحات نفس المبلغ اللي شريت به السياره
يعني انت بتشتريها ب18 و7 الف اصلاحات يعني 25 الف وهذيي تجيب لك سياره
موديل من 13 وفوق وحالتها ممتاره
فابعد عن وجع الراس صدقني انت في غنى عنه

السلام عليكم ورحمة الله وبركاته ،،

إذا أنت راغب بموتر من هالموديلات فترا هذا ممشاهن الحقيقي وأغلب إذا مهوب كل الي معروض بالسوق مع الشريطية مرجع عداده ويتضح على الموتر انه مكروف لكن تتفاجأ ان ممشاه قليل جداً على موديله ..

وبالمنطق المواتر الي لها خمس سنين تلقاها وصلت 300 ألف بالراحة إذا من سكان المدن الكبيرة وراعي مشاوير..

المقصد إذا أنت راغب بالموتر ومعجبتك محركاته والبودي فترا الممشى بإذن الله معقول على موديله ومكاين اللاندكروزر مشهورة بوصولها أرقام قياسية بالممشى شرط المحافظة عليها..

*فترى وليس فترا المعذرة.

ماشاء الله الكل متفق على رأي واحد وهو اني ابعد عنه واشيله من راسي
هذا كمان رأي واحد صاحبي قالي زود ع المبلغ وخذ لك حاجة نطيفة
وبممشى قليل

الله يعطيكم العافية ويبارك فيكم
والله فرحت بكلامكم والبحث عن مصلحتي
الله يسعدكم واحد واحد

هذا تاخذه من المعرض وعلى التشليح هههه

السلام عليكم ورحمة الله وبركاته ،،

الي عطاني تقييم سلبي على ردي الأول وعلى ردي الثاني هنا والي كان تعديل خطأ إملائي يا أخي اتق الله حرمتني من إضافة مواضيع بالموقع عشان رأيي ما تتفق معه!

لا أنا الي نصحته يشتريه ولا أنا نصحته عنه أنا علمته ان الممشى هذا واقعي وإذا يبي موديل قديم لا يغره الممشى القليل وأنا صادق في كلامي والقرار يرجع له بالأخير..

والناس تختلف في أوضاعها المالية وغيرها ولا تقدر تحكم على الناس تقول اشتر هذا وهذا لا تشتريه بدون ما تعرفه.


ودي أفهم الي معطيني تقييم سلبي على ردي الثاني والي عبارة عن تعديل خطأ إملائي لي أنا مهوب لغيري ليش؟!

لا حول ولا قوة إلا بالله وحسبي الله ونعم الوكيل.

معليش اخوي صريح المقال امسحها بوجهي طال عمرك يمكن أحد قيّمك بالخطأ
وطبعاً رأيك أتقبله بصدر رحب وأبدًا مافيه شي يزعل يالغالي

راسل إدارة الموقع وإن شاء الله انها ما تقصر معك