الكافيار وقطع الغيار

12 7

لايمكنك التصويت حتى الحصول على 20 نقطة على الأقل
إضغط هنا للإخفاء

محمد بن فهد الفهد 757
قبل 6 سنه و 4 شهر

من الله علي بافالون جار عليها الزمن وشرب ولله الحمد على عطائه لدرجة ان ما تبقى منها لا يشفع لها بان اصلحها لاني لو بديت اصلح ابدفع كقيمتها كاملة اجرة اصلاحات ففي يوم من الايام كنت ماشي بشويش كالعاده مو عشان الامان لا عشان ساهر والبنزين لان الامان الاقتصادي في نظري يتساوى مع الامان الروحي لذا في حدود سرعة 60 على الخط السريع طار شبك السيارة الامامي الي كان مثبت بمشقبيات رديئة من صنع حوش بيتنا وذلك بعد ما اصطدم فيه الكبوت الي مايتقفل زين عدة مرات حتى انقشعت الواجه بشكل هستيري من غير اي اصطدام او حادث

وبعد عدة رسائل بالواتساب تحميدا لي بالسلامه قررت اروح اركب شبك عشان الناس لا يطبون بيتنا ويحمدون لي بالسلامه بدون سبب وعشان لا يتشفى علي بعض شيبان الحي عشاني ابطأ مخلوقات الله في ركوب مطب بيته المصنوع ضمن المواصفات والمقاييس الحربية

دخلت اول محل قطع غيار وقلت له ابغى شبك افالون اردى صناعه وتجاري التجاري حتى لو يجي مصنوع بفلين عادي بس السعر لا يتجاوز 100 ريال

قال فيه تجاري ب 250 قمت اتهكم وقلت له طيب والاصلي قالي ب 580 قلت طيب وين اقرب صراف طبعا هذا تكتيكي للهروب قالي عندنا شبكة قلت ماعندي بطاقة قالي كيف كنت تبي صراف قلت له عشان ابعبي بنزين من المحطة الي فيها الصراف طبعا انبشم اخي اليمني الي بقطع الغيار ولا رد السلام بعد ما خرجت من عنده

دخلت محل ثاني قالي التجاري ب 400 والاصلي ب 750
قلت له ليه ياخي محصله باقل سعرك شبه دبل ليه كذا علما ان لبسي وهيئتي تدل على اني ما استحق شبك باكثر من 60 ريال والله المستعان

بعد ما خرجت اتصلت بوزارة التجارة وشكيت لهم التلاعب بالاسعار وكل يوم بعد العصر امر من عند المحل على امل ان وزارة التجارة يغلقونه

واليوم لي 6 ايام ولا حتى قفلوه او ووبخوه لاني دخلت مره ثانيه عليه واعطاني نفس الاسعار السابقة بس هذي المرة بزفرة نفس لنه داري اني ما ابشتري

بعد كذا شغلت الافالون بكل ثقة وكملت حياتي وقلت لايمكن ان يكون شبك سيارة هو سبب سعادتي . وثقتي بنفسي اكبر من اي شبك بالعالم والانسان بمعدنه ودينه ومواقفه مش بشبك سيارته

لذا جيت دخلت عندكم واقولكم الله يرزقنا بموقع مثل امازون واي باي نشتري منه قطع غيار بدل النصب الحاصل بالسوق


تحياتي للجميع
ابو فهد

إبلاغ

الردود