أضف سؤال أو موضوع جديد          

التصرف الصحيح بحال البنشر على سرعة

up 21 down 22
ابراهيم 78 -97
قبل 8 شهر



السلام عليكم ورحمة الله و بركاته

من زمان و حنا نسمع من الشيبان انه اذا بنشرت لا تلمس الفرامل نهائيا

و الشيء هذا يقلب السيارة او اقلها تحوص فيك و تفقد السيطرة عليها

طبعا هالكلام من زمان السيارات حتى نظام ABS ما كان فيها

و قوة الفرامل و توازن السيارة و رساوتها ذيك الايام غير الايام هذي

يعني كانوا يستخدمون كابرس 90 و تحت و جمس نفس الشيء القديم

و جيوب لاندكروزر موديلات الثمانينات و كرسيدا و السيارات اللي ما فيها اي نظام للأمان

او الرساوة ابدا

و انتقلت المعلومة هذي للجيل الحديث تحصل مقاطع باليوتيوب بنشر مثلا

تجيك الردود المشكله من ناس صغار بالسن يعني متأكد ما عمره بنشر وهو يمشي حتى بسرعة 100

يجي يقول لا تلمس الفرامل كلام سمعته من جدك تجي تطبقه هالايام ؟؟؟

تجي تقول للناس اللي يقولك لا تلمس الفرامل

قد بنشرت وانت تمشي بسرعة فوق 100 يقولك لا

طيب و اذا ايه بنشرت كيف وقفت السيارة

لو تمشي 140 و بنشرت او ما بنشرت بدون فرامل يقولك تمسك بالدركسون و خلاص

لو تخليها تدحدر و هي تمشي 140 ما راح توقف الا بعد 3 او 4 كيلو تكون هديت السرعه اقل من 60

و تقدر تمسك فرامل وقتها

طيب تتوقع تمشي مسافة 4 كيلو و الكفر مبنشر عادي

يا انها بتولع الكفر و السيارة من الحراره

يا الجنط بيتسكر و تعدم الدنيا معها

طيب ياللي تنصح ما نمسك فرامل

هل قد بنشرت وانت مسرع و مسكت فرامل و انقلبت و جيت تنقل لنا تجربتك طبعا لا

انظمة الفرامل بالسيارات تطورت كثير غير نظام ABS

انظمه كثير يطول شرحها ولكن بذكر لكم رموزها و ابحثوا عنها باليوتيوب

ABS _ ESP _ CBC _ EBD _ TCS

حتى لو افترضنا تسوق سيارة فقط فيها ABS

او حتى النظام متعطل و بنشرت طبيعي تمسك فرامل بشكل معتدل

يعني ماشي 160 كأنك شايف تفتيش من بعيد و تبي تهدي و توقف عنده او بتدخل محطه

تكون دعستك متوسطه لا قوية ولا تخليها تدحدر حتى يتكسر الجنط

انا شخصيا سنوات طويله وانا امسك خطوط و على سرعة و كثير بنشرت

و على سيارات عاديه ما فيها تقنيه حديثه

لومينا و مازدا و كامري و كورولا و غيرها من السيارات العاديه

مسكة فرامل متوسطه و ارجع بالنمر عادي او اوتوماتيك و الحمد لله ولا قد أختل توازن السيارة حتى

و لقيت رد باليوتيوب واحد يقول ان خويه يقوله لو بنشرت الافضل ترجع القير على 2 او 1

هههههههههههههه

حتى لو بدون بنشر تمشي 160 و ترجع القير بالثاني لو دفع امامي وقف الكفر كأنك دعست كامل الفرامل

ولو دفع خلفي وقفت الكفرات كأنك سحبت جلنط

وش النصيحه الغبيه رجع بالثاني او الاول بعد

حتى قنوات مشهورة باليوتيوب يقولك لا تدعس فرامل

و بجيب لكن مقطعين رغم ان المقاطع كثير للبنشر لكن اغلبها سيارات المانيه

لكن دورت مقطع سيارة مافيها امان و لقيت جيب ربع و اعتقد موديل 2006 و تحت

حتى اعتقد ما كان فيه ABS و يمشي حدود 190 و بنشر

و واضح من الثواني بعد البنشر كانت قليله حتى وقف الواضح مسك فرامل

و مسكه كانت اكثر من متوسطه ووقف بسرعه بدون اي مشاكل

المقطع الثاني لقناة مشهورة و بنصائح غبيه

https://www.youtube.com/watch?v=A31ru1A8jlY

https://www.youtube.com/watch?v=m7j8YSa8b-U

اذكر قبل حوالي 5 سنوات حصل نقاش بهذا الموضوع

و وقتها كان معي كامري 2007 و قير عادي

و قلت للأعضاء مستعد اصور التجربه بنفسي بالكامري

امشي بسرعة 180 و نحط شيء بالطريق يبنشر الكفر حسب اختيارهم

و امسك فرامل و اوقف بسرعه بدون مشاكل لكن اللي يقبل التحدي يشتري لي كفر جديد بدل التالف

لكن اغلب الاعضاء كانوا يقولون لا ما تمسك فرامل تنقلب و انا كنت جاهز للتجربه ولا احد قبل التحدي

عموما نشوف تعليقاتكم و لا يجي احد يقول صحيح تنقلب او تفقد السيطره وهو ما حصل معاه هالشيء








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


انا ضرب كفر علي وانا امشي 140 ماشاء الله نظام تعليق الفورد ماهزت الا شي بسيط


up 2 down 0



هههههههههههههههههه

انت لو ضرب معك كفر على سرعه 80 قمت تطاقع

بس حلوه الفورد نظام التعليق ما هزت شيء

يلا يا ورع روح اللعب بعيد


up 2 down 5
ابراهيم 78 -97
قبل 8 شهر