أضف سؤال أو موضوع جديد          

تم تغيير بلف تبخير زيت المحرك كورولا 2008

up 10 down 1
nasser1430 858
قبل 8 شهر



السلام عليكم ... تحية طيبة لجميع الاخوان
تم بفضل الله سبحانه تغيير ( بلف تبخير زيت المحرك ) بمجهود شخصي بسيط
السيارة تويوتا كورولا 2008 .. البلف الموجود شد بلد ممشى السيارة قرابة ٢٠٠ الف كيلو 

والعدة متوفرة عند اغلب اصحاب السيارات وهي ( زرادية ، مفك ١٩ ، مفك ١٠ )
كان ودي ارفع صور لكن الموقع له مدة ما ادري وش اللي حصل فيه ؟!

وباختصر الموضوع في مقطع فيديو لقيته باليوتيوب والصراحة فادني كثير في
تحديد موقع البلف وكذلك التنبيه لرقم القطعة في الوكالة لانه تختلف من بلد للآخر
طبعاً طبقت الطريقة ١٠٠٪ وهي سهلة جداً لكن عند فك البلف يبيله شويت شد 
لانه كان مجيم لقدمه وتراكم الغبار والزيوت عليه .. لكن انفك بعد عناء بسيط .

(( طبعاً الكثير بيسأل وش هو بلف تبخير زيت المحرك )) وباختصار وشرح بسيط :-
" هو عبارة عن بلف مثله مثل باقي البلوف لكن الفرق فيه ان له اتجاه واحد فقط في دخول
الهواءالمشبع برذاذ زيت المحرك وإعادة للمحرك مرة ثانية بدل من احتراقه في السلندرات "

وهو من أحد الاسباب الرئيسية وليس الاكيدة لنقص زيت المحرك في معظم السيارات مع ان
اصحابها محافظين على صيانتها اول باول وبقطع اصلية لكن زيت المكينة لازال ينقص ؟!؟!

ومكان بلف التبخير يختلف من سيارة للاخرى .. فيه منه اللي فكه وتركيبه سهل جداً 
وفيه منه اللي صعب جداً ولازم فني علشان يغيره .

وهذا رابط المقطع اللي قلت لكم عليه من اليوتيوب .. للكورولا من 2003 الى 2008 :-

https://m.youtube.com/watch?v=7f2WX8AeJfI

ولا تنسوني انا و والدي من صالح دعائكم  







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


والله بغيره وبغير بواجي.  شرب بنزين ونقص زيت
مشكور ياابا بدر.    بعدين ماشاء الله موديل الكورلا ٢٠٨٨.   الله يعطينا عمر.  


حياك الله يا عبدالله الشفيعي .. انا اخوك ناصر ابو يوسف 

انا طرحت الموضوع للفايدة .. لان اغلب الورش اذا فيه نقص بزيت المحرك على طول قال تغيير شنابر 
او موترك مبوش ..لازم توضيب .. وهو الصراحة قد يكون من بلف التبخير .

وشكراً على تنبيهي على موديل السيارة ههههههههههههههههههههههههههه

تم التعديل .. وجزاك الله خير 


up 1 down 0
nasser1430 858
قبل 8 شهر



وابشركم الحمد لله وحده .. تم التشييك على بلف تبخير زيت المحرك لسيارتي باجيرو 2016 مكينة 3,5 
وطلع مسكر بنسبة بسيطة ونظفته بطريقة احترافيه وأعدته لمكانه بكل سهولة .

طبعاً بلف الباجيرو بدون مبالغة فكيته وركبته في خلال ثواني لانه تصميمه كبس خفيف بربله ثابته في 
غطاء المحرك ( غطاء البلوف ) وبدون قفايز عكس الكورولا تماماً اللي لازم تشيل غطاء الكويلات البلاستيك
ولازم تكون معك العده اللي ذكرت في الموضوع .


up 1 down 0
nasser1430 858
قبل 8 شهر



ي رجال التنقيص فيك فيك كتيبات الوكاله بنفسها تقولك بعد فتره او ممشى معين تبدا تنقص زيت

ونادر سيارات ماتنقص

مثل اثنين اعرفهم معهم اوريون واحد ٢٠٠٨ ماتنقص ماشاء الله والثاني ٢٠٠٩ تنقص يعني هي حظوظ بالعربي


up 1 down 0
7amood1930 286
قبل 8 شهر



صحيح كلامك .. لكن جُعل لكل شيء سبب .. ومن احد اسباب نقص زيت المحرك  بلف التبخير .. واذكر شرحها لي مهندس
في وكالة هوندا عبدالله هاشم .. ذا الكلام من زمان ولا كان فيه ذاك الانتشار في المنتديات ولا اليوتيوب .. لكن هالحين مع التطورات 
اللي نعيشها صارت فيه بعض المشاكل في السيارات يوجد حلها بدون ما تروح للورش عاد انت وحظك يا تطيح بيد نصاب محتال 
او يكون حظك مبتسم لك بعد توفيق الله وتطيح في ابن حلال ما يغشك ( وهم قليلون ) .


up 1 down 0
nasser1430 858
قبل 8 شهر



انا عندي الكورولا 2009 كل تقريبا 5 الالف لازم ازودها علبه ونص 
وبالكتالوج موضح هالنقطه ان النقص اذا صار كل 1000 كيلو 
اكثر من علبه فيها مشكله واذا اقل طبيعي 
لكن اخوي ناصر هل تغير شي معك بعد التغيير 
لان الموتر الي عندي ماشي اكثر من 450 الف 
طبعا جربت زيوت انواع واشكال نفس الشي 
20w50 & 10w30
شل وبترمين وتوتال وكاسترول لكن نفس النقص 


up 0 down 0
شمهرووش 136
قبل 8 شهر



حياك الله اخوي شمهرووش .. وجميع الاخوان 
ماشاء الله تبارك الله ممشى موترك خذا من عمر المكينة 

شوري عليك تغير البلف .. ترا قيمته ٦٥ ريال ، وافحص اللي او الهوز الموصل من الانتيك ( الثلاجة ) الى بلف التبخير اتوقع 
ان فيه تشققات او يكون متقطع طبعاً السبب مع الوقت والحرارة وقدم الموديل نوعاً ما .. فلابد من تغييره 

والشغله سهله جداً ما تاخذ معك ولا نصف ساعة مع العده المذكوره .. 



up 1 down 0
nasser1430 858
قبل 8 شهر



باذن الله اخوي شورك وهداية الله 
باقرب وقت بغيره وان شاء الله اعلمك بالنتائج 


up 0 down 1
شمهرووش 136
قبل 8 شهر



بالنسبة لسؤالك عن انه تغير شيء بعد تغيير البلف 
أنا ركبته امس .. فاتوقع ما راح تبان معي الا بعد ممشى ٢٠٠٠ كيلو 
لان التبخير بسيط .. وبإذن الله تعالى باكتب تجربتي في المستقبل القريب 
دمتم بود 


up 0 down 0
nasser1430 858
قبل 8 شهر



رائع أبو ناصر ما قصرت الله يبارك فيك وفي سيارتك


up 0 down 0
anosi 1161
قبل 8 شهر



وفيك اخوي anosi .. القصد الفايدة للجميع .. ودعوة في ظهر الغيب تكفيني انا و والدي 


up 0 down 0
nasser1430 858
قبل 8 شهر



السلام عليكم
انا معاي كورولا موديل 2010 ممشى 158 الف
بعد 1500 تنقص حدود علبة احط زيت سوبر تيربو

ايش رايكم فما الحل ياشباب


up 0 down 0
haraj8008 40
قبل 4 شهر