.........محذو

مشاءالله انت جسدت وضربت مثلا للمسلم في حسن التعامل 

للاسف ناس بدون ذمه فيه واحد صدمني في رمضان
قبل سنه وشرد والله عظيم للحين قاعد ادعي عليه
من القهر والغبنه تخيل موتري مهتم فيه من 6 سنوات
في نهايه يجي واحد يعدمه ويشرد
حسبي الله ونعم الوكيل

دعوة المظلوم تصيب الظالم يوما

مثل شايب في برحة مواقف مستشفى حكومي معه كرسيدا قديمه ومتهالكه يوم جا يوقف بجنب يارس نظيفه حكحكها واعدم جنبها كامل
ونشبت سيارته يوم انه تورط قام دق ريوس ومع دقت الريوس والحك طاح صدامه الامامي نزل شله وحطه فالموتر وراح يدور موقف ثاني ولا
كأنه صار شي أنا أخذت رقم لوحته وقعدت ارقب راعي اليارس يجي الين جاء واعطيته رقم اللوحه شوي الا يجيني راعي جيب كان يشوف معي الموقف
ويقول الموضوع بسيط ليه تعلم كأنه يقول انت ما تستر على البشر ولا فيك خير والمشكله راعي اليارس مغبون على موتره
والله اني ما اعطيت راعي اليارس رقم اللوحه وقعدت ارقبه الا لأني اتمنى يوم اني اجي عند موتري والقاه محكوك ولا مصدوم
يطلع لي حد يعطني رقم لوحة النجس اللي صدمها وشرد

انا كنت فاك لي موتر وكاله والله موقف في مواقف واسع وفاضي و لا حولي احد يوم طلعت شفت الركن الخلفي جهه السواق مصدوم ماتضرر الا الصدام

الصراحة لا الشوارع تساعد ولا الزحمات تساعد على شراء سيارة جديدة

كنت ادرس جامعتي في ديره قريبه المواقف ساحه وشوفلك كل يوم حكه صغيره دقه شخطه والله كريم

انا عندي قاعدة اسويها مع الزحمة وحتى المواقف وهيا اني احط سيارتي بعيد وانزل كعابي للمحلات وخاصة المزدحمة  بكذا استفيد 
اني سويت رياضة وقلبي مطمئن على السيارة 

ليتك داق على نجم عشان يتعلم ماينحاش
واضح من النعمه الي داقها ماركز

نصيحه اي واحد يبي يوقف يدور الموقف الي جنبه
رصيف او عامود ولحم بالرصيف او العامود
عشان الموقف الي جنبك يكون واسع وتفتك من الحكات
وعساك تسلم

والي مايعرف يوقف سيارته مستقيم يرحم امك تعلم
كيف توفها مستقيم
بعضهم يشوف الموقف واسع ويوقف السياره مايله!!

الرجال امديه يطلع ب الراحه لكن غشيم كسر الطاره اول ما رجع ريوس 
بعدين لو دقيت على نجم ب انتظر ٣ ساعات اقل شيء 
وبعدين ب يحولني ل شيخ المعارض و ادفع له ١٠٠ ع شان يقدرها لي والصدمة اصلا بسيطة ف قلت ما ودي اخر نفسي واتبهذل على شيء بسيط 

اب اقلكم مواقف صارت معي و مع ابوي و مع اخوي كل واحد مختلف

ابوي مرة في كامب أرامكو كان معزوم عند عمي و موقف السيارة عادي جنب رصيف لا هو مايل ولا شي ابد موازي الرصيف

الا ويجي راعي مرسيدس الموديل اللي قبل الشبح و حتى قبل انتشار الجوالات و الكلام هذا سنة 97 كان.  المهم راعي المرسيدس

جاه نلفون مركب في السيارة عنده كان يبي يرد على اتصال و ما انتبه للطريق انحرفت معاه السيارة و يخش في سيارة ابوي (كابرس)

و السيارة راحت فيها الدبة من ورا و الكبوت من قدام و قعدت حول اسبوعين في ورشة السمكرة لين ظبطوها.  ونزل الرجال

دق باب بيت عمي و بلغهم عن الصدمة و كلهم طلعوا يناظرو اللي صار.

نجي على سالفة صارت مع اخوي, سيارته فيلوستر العام الماضي موقف على ارض ترابية و عادي و يجي راعي جراند ماركييز قديم

يحك الصدام مع جزء من الرفرف تحديدا فوق الكفر الخلفي يمين, المهم بلغوا نجم وراعي الفورد كان موجود, نجم عاين الحادث

وحط الغلط على الثاني اما اخوي عليه  صفر.

اما انا عندي موقفين سيارتي مرتين جاها صدمة اول مرة كنت قريب من البيت راجع من دوامي, الا واشوف دينا واقفة قلت يمكن

واقف ينتظر السيارات تعدي علشان هو يطلع الا واشوف الأخ داق ريوس و راجع وانا وراه و اعطيه بوري و نور عالي لين صفق

المرايا (مرايا الباب) جهتي و سبب طعجة و ياليتها طعجة و بس لا  معاها حكة المهم نزل الباكستاني و اتكلم معاه اقوله ما تشوف

يا خي افرض فيه بني آدم واقف مو سيارة, لا زم تنتبه.  بدا يعتذر لي والدنيا كانت حر و مالي خلق لا انتظر نجم ولا المرور و قريب

البيت ما بي اتأخر.  سامحته و قلت لا حول ولا قوة الا بالله.

و عندي سالفة ثانية مرة كنت في صناعية و يرجع علي يمني راكب هايلكس و ادق له بوري ويلبس صدامي قدام و هو من داخل

اشرلي قلت له تعال وين بتروح؟؟ انزل انا من السيارة و هو ينزل لقيت قطعة البلاستك السودا (ديكور) جنب كشاف الضباب طايحة

ويجي اليمني يدق على كتفي يتأسفلي قلت حصل خير ما صار شي وصدامي المشكلة تايواني ما هو ياباني خفت يكون تكسر

الا اني تفاجئت ما جاه شي غير خدوش بس.

عذرا طولت في ردي بس حبيت اشارك بالمواقف اللي صارت مع كل واحد فينا في العايلة.  الله يكفينا و اياكم شر الحوادث و نكدها.  

المشكلة اكثر اللي يعلقون تحصلهم يصدم ويمشي ويقعد هنا يتبلا على الناس وعلى هالحال والله يعين  

الكمرا يلي تركب داخل السيار ة هي الحل خله ينحاش يجيبونه
و المخالفة حقت الهروب من الحادث 10 الاف ريال تنزل على السستم عنده

الحمدلله مريح حالي مركب كاميرا ذكية تصور أمامي إلى يصير
والله يستر على الخلف

واكثر شي يغبنك اللي مسوي نفسه سواق ويشطف ثم لا صدم نزل وقال والله ماعليش مادريت ،، والنوعيات هذي كثيير موجودة لكن لابد نحرص على التوكل على الله ونستودع الله سيارتنا فالله خير حافظا وهو ارحم الراحمين 

الزحام بلا لابد منه ..
الي عنده سيارة دافع فيها دم قلبه الافضل يكون عنده سيارة ثانيه رخيصه موغاليه تصير فقط لمشاوير المقاضي والسوق بشكل عام او للمدرسة او الدوام .
لانه مهما كنت أنت حريص غيرك عكسك ولامهتم خاصة الاجانب الي يوقفون بجنبك يفتح بابه بقوه لين يوسم سيارتك .
معي فكسار محافظ عليه ورحت لساكو ووقف صح مع مسافة مناسبه يمين ويسار كون الجيب طويل ما ابي اضايق الي جنبي ، بعد ماطلعت والاقي حكة كفر مع جنطه معدم علي الدعاسه بطول متر
ايه الحمدلله بالدعاسه ولا بالبدي .. بعدها خلاص لو اوقف بالحارة واجي رجل لساكو او غيره ، المواقف الرسميه ماعاد تومن هذا طالع وهذا داخل ، وخصصت سيارة ثانيه فقط لمشاوير الزحمة.

يتوفر الان كاميرات تثبت بالمرايا فيها حساس للصدمات يقوم بتفعيل التصوير فوراً ينفع لاخذ رقم من يصدم سيارتك ويهرب .

سيارتي اكثر من 7 مرات ما بين صدمة وحكة وهي واقفه وشرد اللي صدمها أو حكها ناس ما تخاف الله
المشكلة إذا كان موقف السيارة بشارع عام أو فيه محلات وغيره ولا يوجد كراج
اللي عنده كراج بيرتاح واللي ماعنده وعنده امكانيه لعمل كراج لا يتأخر
بالتوفيق للجميع