سيارة قديمة واقفة اكثر من ثلاث سنوات

يبغالك تغير كفرات +ربلات والجلد والصوف+ زيوته قير+مكينه+دفرنس +باور اما بخصوص الجرم بما ان الموديل قديم يمديك تلحمه عندن المخرطه والله الموفق

اهم شي انها واقفه بظل ...

الله يعطيك العافية يا لو علي ما قصرت
كنت اسأل عن غسيل المكينة من الداخل قبل تغيير الزيت يضرها او لا

اخوي امير الأصيل لا والله واقفة في الشمس

عليكم السلام ورحمة الله وبركاته 
والله شوف اللي اعرفه ان المكينة بالوقفه الطويلة تتأثر بقوه وثلاث سنوات ماهو سهل اذا مااشتغلت قبل كل شي السيارة لازم تشتغل اذا اشتغلت اول شي غير زيت وسيفون وزيت (لاتغسل المكينة علشان ماتعدمها) افضل طريقة غير الزيت مرتين تتنظف بهاطريقة زيت الفرامل لازم تغيره وسيورها وشوف ليات الاديتر والاديتر اذا معدومه غيرها وبعده لحم الدفرنس وزيد زيته (فقط) وزيد زيت القير اذا ناقص وبمكانك تغيره كامل وبعدها الكفرات تغيرها كامل بتكلفك كل الشغلات شوي هذا اذا اشتغلت وان شاء الله تساهيل وعيدكم مبارك 

ولاتنسى البطارية ركب بطارية سيارتك وجرب لاتشتري بطارية وتحصل المكينة مصلبة 

اول شي لا تشغل السياره الا بعد هالامور
1/ غير زيت المكينه
2/ غير بطارية السياره
3/ شيك على موية الرديتر

وباقي الامور امرها هين من كفرات وغيرها

مادري ايش تقصد تغسل المكينه من داخل ؟

لكن ان كنت تقصد غسل جرم المكينه من الخارج عن الغبار المتراكم فما انصحك تسويها ، الافضل تنفخها بهواء لين تنظف ، والسبب لو غسلتها بماء مع اي مادة ثانيه صابون او ديزل الخ ، راح تتفتح الوجهيه وتبداء تسرب زيوت اضف لذلك راح يضرر السلف والدينمو من الماء فتصير النتيجه عكسيه وراح تطلب قطع غيار بعد فترة بسيطه من استخدامها ، انصحك فقط انفخ هواء لتنظيفها ، طبعاً ضروري تركب فلتر هواء جديد .

اما ان كنت تقصد تنظيف المكينة من الداخل فصدقني داخل المكينه هو المكان الوحيد الي بيكون حسب نظافته ماتغير من وقفت لانها معزوله عن الخارج ، فقط غير الزيت وخليه شهر وغيره ثانيه لانه بيكون حمل معه كل البراده وراح تنزل ثم عبي زيت واستمر عليه حسب المعتاد .

بالنسبة للغمارة لاتخلي البنشري او المغسلة ينظفها بالي بطريقة النفخ لان الغبار بيتطاير ويدخل في لوحة الطبلون ويتراكم على عداد السرعة وغيرها ، الافضل لتنظيف الغماره هو مكنسة شفط والباقي تمسيح او غسيل عادي ويجفف بالهواء المضغوط مافيه اشكال كون الغبار انغسل ، ان كان بها مكيف ضروري تنظف فلتر الثلاجة او الهوايه او تغيره كون الغبار متكدس عليه ويسبب حساسيه للبعض .

جرم السيارة من تحت لاتغسله بديزل يكفي ماء وصابون حتى لاتنحرق الجلد .


(((الكفرات مهما كان فيها باقي عمر ))) ماتسحلت لو انها نصف عمر الا انه ضروري تغيرها للامان لانها قد تكون محترقه مع السرعه وحرارة الجو تغدر فغيرها لتكون مرتاح البال على نفسك او اخوك .


البواجي والسيور ضروري ، القير يفضل تغير زيته مع الفلتر ، الدفرنس ان وجدت احد عنده مكينة لحام نوع ميج احسن لانها تلحم بسرعه ماتعطي فرصة للحرارة انها توصل للجلد داخل الدفرنس وتحرقها ولحامها مضمون ونظيف حتى الغشيم يطلع شغله صح معها ، المهم لا تلحم بغاز الاكسجين والانستلين لانه يحتاج وقت يحمي الحديد ويذيبه ليبداء التلحيهم وهنا المشكله الحرارة تتسرب وتحرق الاجزاء البلاستيك او الربلات القريبه منه .


الفرامل ان كانت منتهيه غيرها وبنفس الوقت خله يطلع ان كان هناك هواء ويوزنها لتتساوى الي قدام مع الي ورى ، يعني اطلب تغييرها مع تفريغ الهواء ان كانت كايبه مع الوزن .

شيك على المساعدات لايكون احدها مفقوع تراه ضروري ويحفظ تزازن السيارة .



اما الشكل الخارجي اخوك توه جديد على السواقه خله يتسلى وينبسط انه هو الي يتكفل فيه ويغير براحته مثل لمبات باهته ينظفها او مكسوره يغيرها الخ منها يتعلم على الاعتماد بنفسه ومنها انه راح يعطيه حافز معنوي لايعرفه الا من جرب وتذكر يوم ياخذ سياره لاول مره.

الامور هذي ان سويتها بأذن الله السيارة راح تخدم فتره طويله حتى لو يشتري سيارة صغيره بعدين علشان الاهل يوديهم برضه السيارة الهايلكس تكون عارفها وضامنها انها بستمر معكم و بتخدم البيت لكثير من الشغلات الي تحتاجونهاكلكم.

انتبه تغسل المكينه من اداخل انتبه انتبه انتبه تندم وانا اخوك لا تشغل المكينه ابد فك السره ونزل الزيت القديم وغير فلتر سيفون اصلي وزيت بترومين وفلتر هواء ونزل ماء الرديتر وصب ماء صحه خله يغسله وبعدين حط ماء اصلي وشيك على السيور واليات ارديتر وفلتر البنزين غيره وشف الدفرنس فيه زيت اذا فاضي عبه لاتحرك السياره يعدم الكرونه كل الامور الي قلتها اعملها قبل التشغيل والحركه لك تحياتي