تجربة الفحص الدوري للسيارات بتاريخ 29 شعبان 1438هـ
5
10
إضغط هنا للإخفاء
السلام عليكم
تجربتي للفحص الدوري للسيارة اليوم!
اليوم رحت الفحص وسيارتي بها التالي
1-تظليل كاتم اسود كلها ماعداد القزاز الامامي الكبير طبعا
2-زنون الي لونه قريب للاصفر مدري كم كلفن 4300 مدري كم المهم هو"على عدسات راكب"
3-ليد في الكشافات والشمعات كمان فيها ليد شرايح
4-اللوحة الي قدام لونها ابيض ولا رقم واضح(اشتريت قلم اسود تحسبا بس ما شخطها فيه)
5-لمبة الدينمو في الطبلون والعة من زمان بس الديمنو يعبي"ماسويتها لانه تحتاج كتاوت ومالها ضرر"
تقريبا هذه الي اذكره وخويكم محاكيكم صحى الصبح ويصلي الفجر ويتقهوى
ويدق سلف بسيارته مثل ماهي بغبارها لاغسلتها ولا يحزنون
ورحت للفحص والا طق نعل سرى أقعد ياولد وش الوهقة ذي؟ قيدني دخلت في الصف
مايمديني اتراجع ههههه طريقك مسدود من خلفك سيارات ومن قدامك سيارات والفحص حتنفحص يعني حتنفحص ياولدي
المهم اشوف الناس تنزل من سياراتها وتشيك الي يجرب النور والي يجرب الريوس والي يدق بوري الخ
وانا قاعد اتفرج المهم اني هنا حسيت اني توهقت من جد! وقاعد في نفسي اقول
يالخبل يمديك قبل ماتجي مشيك عليها روتيني بس لو وقفتها على حفرة بنشري وشفتها من تحت؟ياخي لو الانوار بس
المهم بعدين قلت ياخي خلهم يرجعوني على الاقل اعرف وش اصلح!
وبينما اعاتب نفسي واذا بي وصلت للكشك وانزل واعطيه 73ريال والاستمارة ويعطيني ورقة الفحص
وامسك السرى شوي والا وصلت للباب المهم جا دوري جاني اندونيسي اعتقد
اخذ مني الاوراق وانا نزلت ورحت بعيد مكان ماتستلم النتيجة ماوقفت ورى الحديد"ماني خايف ترى افشل"
المهم واشوف الي قبلي يعطيهم الورقة حقت الفحص ويقول لهم هناك عند الاستعلامات
عشان يكتب لهم الخرابات "الدوائر الكئيبة" هههههه
المهم جات سيارتي وانا اناظر بعين البؤوس والتوسل الاندونيسي حط ورقة على الطبلون
وقال هات استيكر ويطبعه لي وانا الي انعميت ماني مصدق معقول؟بهذه السهولة؟كذا؟
وقعدت اغني وطني الحبيب الخ هههههههه
المهم اخذتها وجددتها عندهم هناك فتحت ابشر وسويت تجديد استمارة هههه ماني مصدق خايف يرجعون بكلامهم
الزبدة والخلاصة ومن الاخر وش تستفيد انت من هذا الموشح كله؟
تستفيد ياطويل العمر انه عندك تظليل؟ مالهم شغل فيه لو كان كاتم"ماعدا قزاز قدام الكبير"
لوحتك معفنة؟ مالهم شغل فيها
طيب وش يدققون عليه؟ هااااا ايوا
عندك القزاز الامامي تحديد مايرحمونك ابد لازم يكون مرايا نقي جدا
عندك كمان الانوار لازم كلها شغالها ولازم الشمعات الي قدام تكون نظيفها(سو لها تلميع)
والله ردوا واحد عشان الشمعة اليسار عنده مغبشة شوي بس ماهو كثير!
المساحات والدينمو حق المساحات ولازم فيها ماء ولازم تمسح زين ضبطها قبل تروح"انا ماجربوها ما ادري ليش بس غيري ردوهم عليها"
وبطن السيارة لايكون فيه تهريب"غسلها زين قبل تروح لهم" والافضل سوي لها تربيط قبل ماتروح لهم
والكفرات لو كانت نص عمر ماتمشي بالعربي لازم تكون الدعسة تمام ومافيها تآكل
طبعا الفرامل والبريك لازم تكون جيدة مو ممتازة لان انا عندي حقت وكالتها ماغيرتها
يعني فيها ضعف بس مو كثير تمسك واجتزت
وانتبه من مقعدة السواق"للي عنده مقطعة او ماهي ثابتة"ترى يرجعونك ضبطها قبل تروح
وبس هذا الي صار وبنتظر السبت او الاحد واطبع الاستمارة
وصلى الله على محمد
اتمنى اني افدتكم واسف جدا على الاطالة بس وش نسوي ماني مصدق ههههههه
إبلاغ
الردود
0
0
قبل 6 سنه و 10 شهر