الموضوع محذووووف

نصيحه بعه ببهذلك وبيخسرك 
خذ لك سياره صغيره اكسنت  عمليه ورخيصه ع قدك 

صلح موترك وخلك عليه لأنك عارف كل شي فيه والواحد الحين يخاف يشتري مستعمل ماتدري وش فيه من خرابات ممكن يكلف نص قيمته

الفورد هذا بالذات كرهني في كل الفوردات

والله بيعه افضل لك

الفورد 98 الى 2002 ارزاق من الله

احيانا تشوفه مع ناس يكرف

واحيانا تشوفه كل اسبوع بورشه

كان معي واحد مخزن ما مشى 150 الف بودي بلد استخدام شخص واحد وهو عمي

اخذته

ودفعت فيه في سنه وحده 4000 ريال موديل 2002

طاح مره علي من اليمين , انفكت ركبته

و بطنه ماكمل معي شهرين الا وتسمع فرقه موسيقيه من تحت

ورحت نفضت بطنه كلفني 2000 ريال يمكن

و الفرامل سيئه جدا جدا جدا

رحت ركب له طقم كفرات مع شغل يد موتر كرفت 500 ريال و غيرت علبه الفرامل ب670 من التقوى

وللاسف كانك يازيد ماغزيت فرمله سيئه جدا

و للعلم بعد ماصلحت بطنه ماكمل 3 شهور الا وصريره من تحت و رحت ربطته ب 150

____________

ومع ولد عمي 2003

ما شاء الله تبارك الله

كارفه كارف

و اتفاجيء ان عزمه افضل من حقي وفرملته افضل من فرملتي

ومتماسك اكثر وتحس بطنه مشدود وقاسي ماهو لين

وهذا ميزة 2003 وطالع

موفق عزيزي

الركبه كلفت مع المقص مع شغل اليد 1000 ريال

وغيرت الفحمات ب 500 مو الكفرات

خطا مطبعي

والله اذا بتشتري مستعمل غيره صلح موترك ومش نفسك عليه

انت ابخص بنفسك لكن تراه بيتعبك ولو صلحته ب 4 وبعض القطع يعني يكلفك 5

بتبيعه ماهو جايب لك 6 هذا وانت تعبان فيه غير خسارتك لتصليحه ويمكن يكلفك اكثر

اذا قدرت تشوف لك موتر ثاني ابرك لك

الموتر اذا عاكس معك خلاص بيتعبك

الله يدلك على الخير والراي الصحيح

بعه وبالفلوس اللي عندك زدها على سعر بيعته واشتر لك اذا تبي فورد نظيفه محركاته وبودي ماعليك منه موديلات 6 وفوق كذا تلقى

ابدن .. ابغا اطلع من الفورد .. الا ابي اطلع من الامريكي 
انا ما عاد يناسبني 

الامريكي جديد بيخدم اما القديم يا مكثر طلباته.

ودي من ذا السيارات الصغار اصرف لي.

وان شاء الله البيعه قريبه .. 

وشاكر لكم تعاونكم معي ..

سبحان الله بعض الناس سيارته تكرف كرف .. وبعضهم مو متهني فيها مدري عين ولا حسد 

أنت معاك 15 ألف و مع بيعة سيارتك بيير معاك حوالي 20 ألف
أنا شوري عليك تدور بهالمبلغ ياباني صغيرو نظيف أو أي سيارة صغيرة عملية نظيفة
و الله يوفقك ويرزقك و يوفقنا ويرزقنا من فضله و السامعين

99 وش تصلح فيه ب15 تحصل نضيف من السيارات الصغار اكسنت لانسر صني

اهم شي ابعد عن الي تحت الحراج وافحص

شوري لك. دامك. طلبت استشاره وارئانا. 

بيعه وارتاح منه.  وزود عليه. بالفلوس. الي. كنت راح 

توظب بها. لو يطلع معك 20الف الى25الف اذا تقدر 

بتحصل. سيارات. صغيره ومتوسطه. واقتصاديه 

مثل اكسنت. او النترا. او سيراتو  او سنترا 

اذا ماعندك عايله. وعزابي.  خذلك اكسنت. 

اذا عندك عايله. خذ النترا او كيا سيراتو. 

حجمها متوسط.  وقوة المكينه. في بعض الفئات 2000cc

والله ييسر لك مافيه الخير. على العموم.  كل واحد. بيكتب 

رايه لك.  وانت صل صلاة الاستخاره. والي تحس انك. 

مرتاح له. سووه.  وربي يوفقك. 

جزاكم الله خير .. 
اشوف ارئكم و نصايحكم .. وشفت آراء اقاربي والاغلب ينصحون بالبيع
وان شاء الله تتيسر .. ويفتح لنا الله رزق بسيارة بسعر مناسب.