بخصوص الكفرات الحجرية ورفع الموتر ؟

اهم شي تسويه اذا غيرت مقاس الكفرات انك تعيد ضبط عداد السرعة لانها بتختلف عليك وساهر بالمرصاد 

موتري شد بلد كفرات حجريه بف قودريش واللي اعرفه ماتنباع هنا
مقاسها 275 75 16
صوت في الدركسيون وحنه غير عن تكسير السياره اما بالطعوس لازم تنزل الهواء الى 10 والا ماتمشي غير اني اشوفها عاديه اما بالحجر ماتتشقق وجوانبها قويه والفرمله تمسك بالازفلت قويه ولاتزلق اما بالصوت فهي فيها صوت لكن قليل موب مثل الكفرات الحجريه الثانيه وعن نفسي لا خلصت السنتين بحذفها واركب كفر مريح ولو ماهي جايه بالسياره ماشريتها
اما بخصوص الارتفاع من الخلف جربت لعابات لان موتري سست الاهم تكون ماتزيد عن 6 سم ماراح يضر الموتر اما الكعكات ما قد جربتها لكن مشكله الارتفاع باللفات والبر السياره تموج
بالتوفيق

عداك العيب خللللود 

اوافقك الرأي تماما

انواع الأصوات ومخصصة لاماكن حجرية فقط 

بتكره الموتر ع الزفلت

وغالبا من يستخدمها يخليها ف طقم جنوط لحالها

لين يطيب خاطرك ترجع شد البلد وتعود للهداوة والروقان .

مانصحك بالحجريات ابد قاسيه و تكسر السياره و تطلع صوت ازعاج

مشكلة الكفرات الحجريه الصوت المزعج على الازفلت ..
لأنها مخصصه للمناطق الصحراويه والجبليه وكذلك الرمليه لأن النقشه خشنه وتمسك بالرمل ..خصوصاً اهل المراقي والطعوس

الامريكي نادر وغالي لكن فيه نوع بديل ممتاز ورخيص ومتوفر بالسوق وهو النوع الاندونيسي (جيتي راديال )GT Radial

واما الرفع مايفرق واجد اذا الموتر مرتفع من الاول وتقدر تركب يايات استراليه ارفع واقوى لكن المطب يصير قوي اذا اجتمعت يايات قويه وكفرات حجريه

لكن اهل المراقي مايهمهم الراحه بقدر همهم ان الكفر مايضرب بالرفرف

وعلى فكره انصحك تغير الجنوط الى مقاس 16 حتى لوتركب جنوط هدد

الكفرات الحجريه ماتصلح الى في منطقه جبليه او طين  او جلد او حرة  بس بالرمل مايصلحن  نهائي  وخاصة المقاس الي انت قلت  يمكن يمشي معك  جنط ١٦ مقاس 285/75  او جنط ١٧ نفس المقاس هو الوحيد الي يمكن يمشي رمل   
والحجري يجي نوعين A/T  وM/T   
لاتاخذ إلا A/T النوع الثاني  قاسي مرة  

كانت على سيارة أخوي اكستيرا
عيبها صوتها مزعج و لا تتحمل لدرجة غيرها بعد ممشى ٤٠ ألف لأن بدت تتقطع
لكن ميزتها بالجلد ماتحس فيها

ابو عبدالله
خالد
صوت الارض
عبدالله
يوكون
الاش
ابو راشد
بيض الله وجيهكم ياخوان عالردود وعلى شوركم ..
بس انا ذكرت بف قودريش لاني قريت وسمعت انها لجميع التضاريس (ال تيرين ko2)
تواصلت مع احد الاخوان الطيبين شرواكم مدحها ويقول مي مثل باقي الكفرات الحجريه بالقساوه والازعاج
عشان كذه تحمست للموضوع وسعرها 1200 الكفر الواحد طبعا .... لكن بردودكم حيرتموني زياده
وشكلي بتريض واعيد التفكير بالموضوع ... لكن فيه احد جرب النوع هذا تحديدا ؟

بس المقاس الي انت قلت  مشكلته بالرمل   اذا مانسمت ثقيل بالرمل  ولا يمديك تنسم واجد  لأن اذا نسمت واجد خطر ينفصخ الكفر عن الجنط  إلا انك مانت راعي تطعيس وطلعاتك بالنفود قريبه  هذا شي ثاني   
احيان تغرز وتحتاج تنسم كفراتك بزيادة  مايمديك تطلع  من غرازتك إلا تلقى اخد الكفرات على الجنط  
عموما الكفرات الحجريه الي تحمل الرمزين at او mt  مايصلحن نفود  إلا اذا تركب على جنط هلل  والمقاس الي انا قلت قبل وعساك تسلم  من فصخة الجنط  شف مقاطع رواد بحرة  كل شوي منفصخ كفر
   وللمعلوميه اغلب الكفرات يقولك لجميع التظاريس  بس فيه 
لجميع التظاريس واغلبه حق خط 
وفيه لجميع التظاريس  نصف خط ونصف بر 
وفيه لحميع التظاريس واغلبه حق بر 
يعني  بالنسبه ٪‏  

اخوي اذا بتغير كفر لسيارتك من مقاس الى اخر او من جنط الى اخر يفضل انك تلتزم بقطر الكفر الاساسي للوكاله وما تتعداه
والسبب لإرتباطه بامور كثيره مثل عداد السرعه وايضا الجير وتغيير النمر للجير
وتقدر تعرف المقاس المناسب لسيارتك عن طريق هذا الموقع

https://tiresize.com/calculator/

طبعا اول ما تفتح الرابط
فيه خيارين على القسم على اليسار وهي المقارنه
تحط مقاس الكفر الي تبي ومقاس الكفر الجديد لازم يكونون متساوين ولا بتصير عندك مشاكل لاحقه

بالنسبه لرفع السياره
انا كنت ابيع قطعه من رف كونتري تنحط تحت المساعد وترفع السياره 2 بوصه تقريبا 5 سم وكانت ممتازه وعليها اقبال فشف كم تبي ترفع سيارتك وشوف موقعهم اشترها عن طريق امازون
هذا موقعهم
http://www.roughcountry.com/

بالتوفيق

الاش ... شفت كثير ببحره انفصخ كفرهم لكن ماعمري ركزت بنوع الكفر
لكن هذي نقطه سلبيه وماكانت عالبال... لاهنت يالغالي وجعلك تسلم ..
اخوي mrx15 كلامك على العين والراس وبخصوص تغيير
الكفر او الجنط مافكرت في الشي ذا نهائي ابغاه على نفس مقاس الوكاله .
اما بخصوص القطعه معلومه جديده واول مره اسمع فيها بيض الله وجهك .
بس هل هي أفضل من اليايات الاستراليه ...

دخلت الموقع بس القطعه ماظهرت معي ولا تفاصيل لها. ... هي نفس فكره الكعكات ؟...
اذا ممكن يالغالي اسمها

اسأل مجرب ولا تسأل خبير بي اف قودرش
١- السياره لاندكروزر v8
٢- مركبها على جنط الوكاله ١٨ عرض ٢٦٠ بسعر ١١٨٠ عند تاير بلاس وكيلها الجفالي وضمانها مفتوح
٣- مالها صوت ابد ولا حسيت بالفرق
٤- جباره بالنفود والجلد والصخور
٥- تجي انواع منها للزبرقه تحمل ٤ و ٦ غاط والافضل ٨ و ١٠ غاط
٦- لا احد يلعب عليك ويقولك خل هواها ٤٠ او ٥٠ ثبته على ٣٥ الضمان مفتوح لو صار فيها شي ارمها في وجه الوكيل وخذ البديل
في شركات كثيره قلدت الشكل ولاكن الجوده سيئه وشكاوي الناس عنها مثل الاصوات والثقل والمثل يقول خل الخبز لخبازه ولو اكل نصفه بعد عمر طويل ما راح اغير الا هي
٧- ترفع الموتر شوي
والله يوفق الجميع

نصيحه ابعد صوت الكفرات بذنك بتكره سيارتك ركبتها  على همر رجعتها نفس اليوم