محتار بين التويوتا GXR و VXR او النيسان باترول؟

اللي حط لي نقطة سالب وش السبب!؟ ممكن تشرح لو سمحت ولو عندك سيارة أخرى غير المذكورة أعلاه فشاركنا بذكرها وليس فقط نقطة سلبية وتروح

ولا تزعل عوضتها لك 

لازم تتعود على السالب هنا 

اذا انك راعي بر خفيف فالفرق بسيط لصالح الاند كروزر واذا انك راعي بر على طول ومطامر فالباترول الفتك هو الافضل

ماني راعي بر نهائياً (: بس شوراعنا وسواقة الناس تحتم علينا نشتري سيارات كبيرة

الموضوع يطول 

لكن اذا تبي سياره مرتفعه وبدون مقارانات وبنص سعر هالمواتر 

اللي سعرها فلكي 


باجيرو ستاندر 

ب 80 الف  2016 

وكسره ع كيفك ان بغيت بر خفيف 
او تاكل مطاب ع سرعتك ههههههه

والله وانا اخوك اذا تبي الرأي

السيارتين ونعم ماتقدر تنتقص في هذي او هذي 

لكن وبالاخير انت اللي تقرر حسب ميولك وحاجتك وميزانيتك

واذا تبي نصيحتي استأجر اللاند يومين ثلاثه وزيه الباترول وبعدها قرر

VXS مفخرة الارض 

الباترول من وجهة نظري افخم وشكله هيبة أكثر وارخص 

اخي إذا محتار طرحك للموضوع راح يزيدك حيره 
والسبب اختلاف اذواق الناس انا من محبين الباترول وفيه غيري محب للاند 

سؤالك يدل انك غير متعصب ولو كنت متعصب ماكان نزلت الموضوع
لذلك اتخذ قرارك على اساس تجربة وليس على هذه  هالردود ولايهونون الاعضاء
 لكن الناس اذواق ومو شرط اللي يعجبهم يعجبك او العكس 

استأجر يوم للاند يوم للباترول وراح تشوف كل شيء بنفسك رساوة عزل ....الخ تخسر اليوم بالاستاجر  
ولاتخسر بموتر سعره فوق ال200 ومايعجبك 

بالنسبة للاند يتفوق على الباترول بالوكيل القوي وانتشاره وهذا شيء معروف
اما اسعار القطع إذا تهمك مع اني ماتوقع شخص يفكر بالموترين هذي تهمه القطع لكن ان كنت مهتم بالاسعار 
مر اقرب موزعين معتمدين لقطع الغيار وسعر اغلب القطع 

اخيرآ الجسار والفكسار شوف الفروق المحرك اول فرق وهذا اكبر ميزة بالفكسارواهم ميزة 
بالتوفيق 

ياخي الكبير راح يزعجك صرف بنزين وصيانه غاليه ومواقف صعبه عليك انصحك تشوف الكروس اوفر الحين المستقبل هو زي جيب المازدا سي اكي 9محترم جدا الاكاديا و

الباترول استبعده
وانت راعي مدينة وش لك بسيارة حقت بر 
خذلك سيارة عائلية عندك تويوتا سيكويا
تاهو اكسبديشن تعور راسك بذيلي
سيارة عائليو كبيرة مكينة عزم حقت تحمل وكرف وسحب وسفر 
اذا تبي تويوتا شفلك سكويا
وارتبهم لك
1- تاهو او يوكن
2- اكسبديشن
3- سيكويا
وكان الله غفورا رحيما

الله يبيض وجيهكم و يجزيكم خير ويبارك لكم في أموالكم وأولادكم وحلالكم

والله أستفدت من الردود كاملة بدون إستثناء ويارب يحفظكم وراح أخبركم وش قررت خلال أيام إن شاء الله

سبق ومريت في حيرة ومقارنات ..... الامر كله راجع لحاجتك .... كلها سيارات طيبة ولا عليها غبار ابدا وتؤدي الغرض وبزيادة ...صح فيه فروقات في الاستخدام لكن اشوفها بسيطة... مواقع كثيرة سوو مقارنة بين اللاند والباترول ومنهم كتبي ودي انك تطلع على تقريره في اليوتيوب وفيه غيره ايضا ... اذا كان يهمك امر السلامة والوسائد الهوائية وغيرها استبعد الجي اكس ار. انا اشوف ان الفي اكس ار يقارن بالباترول الجديد.

مشكور يالفراعنة وبالتأكيد راح اشوف التقرير ويهمني امره كثيراً