صار علي حادث خفيف نبي افادتكم

الحمد لله بسيطه جعلها خيره لك لاترفع ظغطك 
هذي يعدلونا الورش بدون بويه بي 30 ريال لكن المشكله فيه كسر خفيف 

الحمدلله ع السلامه بسطيه ان شاء الله روح عند محلات الزينه يفكوا لك جلده الصدام وتتعدل ان شاء الله 

السياره اول سنه من تاريخ شرائها من الوكالة التسعيرة تكون بالوكالة نفسها

اذا المرور قالك روح سعر قوله السياره باقي جديدة تسعيرة وكالة ماهي ورش

ومتى ما اخذت التسعيرة صلحها تعديل بدون بويه بدون شيء اخف لك

و الباكستاني الدلخ واضح انه اي شيء يصير له يدق الفرامل ولا فكر باللي وراه و يرجع ريوس بعد

السلام عليكم
اخوي راعي الموضوع الله يعطيك خير سيارتك ويصرف عنك شرها وشر الناس
لسألك سؤال بسيط ليه ماتشيل التجليد الابيض اللي عالكبوت والرفرف 

وصدقني سؤالي مو استنقاص فيك او بأسلوبك لكن بأعرف الميزه وانا استغرب ان فيه ناس ماتشيلها لدرجة انها تنشف وماتطلع الا بتلميع

بالتوفيق 

المصيبه ان بعض السواقين ماهو سواق تلقاه على فيزه سباك ولاكهرباي يعرض حياته حيات الناس للخطر 

يعني ماهو فيزة سواق خلاص ما يسوق هههههههههههههه

كيف يخدم نفسه يروح و يجي لازم يكون مكتوب بالفيزة سواق

طيب كثير مكتوب سواق و تحصله غشيم

محمد ال سلمان كثير سواقين يطلعوا رخص ببلادهم و هم ما يعرفوا يسوقوا بس عشان الفيزا سواق يطلع رخصة 

شوف لك محل تلميع يشفط لك الصدمه  الصدمه  شفط يكفي 

اولا الحمدلله علي السلامه
وان شاءالله تكون دفعة بلاء
الصدمه تعتبر خفيفه اهم شي الحديد
وصدامك باالامكان تعديله ومايحتاح رش بويه
يسحبونه بالحراره او بااليد
مع تثبيت الصدام 
وان الله عفو يحب العفو
اذا الخصم مااجحد الخطاء او انكره وتحس انه ضعيف سامحه
واذا الخصم جحد او كذب طلعها من عيونه
واتوقع انه جديد في السعوديه اذا مايعرف العربيه

حلها شفط بسيطه بس فيها كسر 
المهم حتى المرور الخايس موديل السنه يطلب تسعيرة من الورش ماعاد فيه وكاله 
الوكاله لوبتروح لها بتطلب 10الف بيقولوا بتغير للك صدام ودعاميه وشمعات وشبك وكبوت ويمكن نغير المكينه معاها منجد الشركات حراميه والطرف الثاني راح يعارض على طول لأنه من حقه اش هذي سرقه عيني عينك
فاكرين حادث شويخ الي على التأمين طلبو عليه 14الف وأخري تصلحت بأقل من ربع المبلغ والوكالة والله لاترحم للشركة تأمين ولا عميل بتذكيه على القبله

اخوي اللحين التأمين مارح يشمل العامل لانه ماعنده رخصة يعني رح يدفع من جيبه  يعني ((اسلخه سلخ ))

روح الوكالة وقدر كل القطع في الوكالة بدون خصم واي مكان فيه ان شالله خذش بسيط قدره 

وبعدها روح المرور 

أولاً : الله يسلمك هذا مايسمى حادث وإنما يسمى ( دقشة خفيفة ) . . . . . .
ثانياً : إذا سيارته عليها تأمين يبي يعطيك إياه ويضرب الباب وأنت اللي توديها سواء للوكالة أو لأي ورشة والله يعينك بهاذيل ماتسوى
ثالثاً : إذا مامعاه تأمين لا تستطيع لا أنت ولاالمرور أنكم تجبرونه إنه يصلحها في الوكالة وإنما راح تصلح في ورشة تتفقون عليها اثنينكم
رابعاً : الدقشة بسيطة 200 ريال إن كثرت قل لأبو هنود ينقها ويادار مادخلك شر . . . . والعوض مابه خير وأنا أخوك 

Vip-yt اسال الله تعالى ان يرزقك بحادث مع بنتلي ومايكون معك تامين عشان تعرف الله حق يعني اذا العامل المسكين ماعنده تامين اسلخه سلخ عشان صدام اندقش دقشة بسيطة ويرجع تعديل باليد بعد عينتك ضي مرت علي كثير مرة حكيت لي راعي كامري في الاشارة ما انتبهت له اول يوم العيد ونزلت اسلم عليه بغى ياكلني والمصيبة ان ذقنه الين صدره وحكيت له ضروفي ان ماعندي تامين وكذا وعيا وقال ابي 1500 عشان حكة بسيطة بالصدام وفي الاخير العسكري الله يجزاه خير تدخل وقالي عطه 500 وبس والحمدلله انحلت المشكلة  زبدة الموضوع حب لاخيك ماتحبه لنفسك لو يصير لك حادث ومامعك تامين تقعد تترجى العالم ولو الحق لك تذل العالم ارجو انك تعيد التفكير في نفسك  ويا راعي الهايلكس  الله يبارك لك في الموتر ولعلها دفعة بلاء والصدام تصليحه بسيط ركز عليها بالستيشوار وعدل الصدام من ورا بيدك وذا ماتعرفلها ودها اقرب ورشة ماتكلف 200 ريال بالكثير والشق اللي بالصدام بسيط نقط عليه بالبوية وخلاص 

السلام عليكم,

أولا الحمد لله على سلامتك اخوي ترا الدقة بسيطة ما تحتاج شفت لك مقطع فيديو على اليوتيوب صدمة نفس اللي عندك و صلحها بماي

مغلية.  

1.اغلي ماي مثل كأنك بتسوي قهوة أو شاي.
2. صب الماي  المغلي على مكان الصدمة.
3. من داخل الصدام, يعني بين طرف الصدام و الكفر, دخل يدك و دق على الصدمة بحيث انها ترجع لوضعها.

حاول فيها وباذن الله ترجع.  هالطريقة تغنيك عن التأمين و المرور و كل شي و الباكستاني الله يستر عليه.

اخوي اكسب اجر وسامحه والحمدلله الصدمه بسيطه في الفيبر ماوصلت للوجهيه ولا البودي والله يعوضك خير

عندي لك حلين وانا اخوك
الاول  خذلك بريق او كفتيره وحط فيها ماء وشب عليه النار لين تشوفه<قررررب>يغلي
وصبه ع الصدام وع طول يرجع معك انشاء الله وحاول تدفه من جوا

والطريقه الثانيه
جيب استشوار و حطه ع الحار وحم الصدام ودف من جوا

و بالنسبه للحكوك سو لها تنقيط ماتكلف ١٥ريال وانت واقف

وبالنسبه للباكستاني  مرمط فيه عشان يكون درس له ولغيره
وبعدين تنازل لوجه الله على ماقالو العوض ماهو زين 

أفضل حل تروح لورشة سمكرة يفك الصدام ويعدله باليد ويتأكد من كل المشقبيات ويركبه وإذا فيه خدوش يلمعها وسامح الباكستاني طلباً للأجر لأن الدنيا هذه ما تسوى جناح بعوضة