فرق الاسعار بين موقع حراج وبين حراج السيارات

الفرق ياطويل العمر مو كل من نزل اعلان جاد لكن اغلب الي يروحون بسياراتهم الحراج صاملين في البيع
تلاقيه جالس في البيت يطقطق بالجوال يقول خليني اجرب اعرض سيارتي بسعر فلكي ان جا نصيبها 
وانباعت ولا ماني خسران شي

انا اعلمك 

لان بعض اللي يعرضون سيارتهم لسببين :

1 - تلاقيه يبي يقنع ناس حوله ان سيارته تسوى هذا السعر 

2 - تلقى سعرها مبالغ فيه في الاعلان لكن اللي بيصمل للشراء بيتفاوض معه بالسعر اللي يناسبه

يعني حراج بين فئتين / الشريطيه vs المستخدمين

الشريطي يسوم ب بخس شديد حتى انه يبيع بالنعارض بفارق كبير ويكسب

والمستخدم مستعد يدفع مبلغ مرتفع نوعا ما لكن يبي سياره تستاهل

واللي حاصل الشريطي صار يشتري سياره من حراج السيارات
بربع قيمتها ويجي ينزل لها اعلان هنا ويطلب اضعاف .. 
وتساله الحد غالي 
يقول لك حلالي وانا حر فيه 

بالاضافه لاسباب كثيره 


هذا من وجهة نظري فقط وبالطبع لايعني بانها صحيح 100%
ربما غلطان وربما صحيح

شكرا 

حراج السيارات رخيص لانك تشتري سياره ما تدري لا عن عضلاتها ولا عن القير ولا شيء

تشتري سياره بمجرد نظرك و تسمع صوت المكينه فقط

لكن المعارض غاليه اغلى من موقع حراج

ما تحصل سياره بالمعارض رخيصة كلها اسعارها نار

من واقع تجربه نزلت كثير المعارض لدرجة لكزس 2001 LS  سعرها يقولك 55 الف

ليش و شكلها عادي لا تقول والله وقفة السياره اللي شد بلد ولا شيء

و كثير غيرها الشبحات كنت ادور شبح اسعارها بالغالب بالـ35 و طالع ما تحصل شبح بأقل من 30 الف

لكن الحراج نفسه رخيص للاسباب اللي ذكرتها

وجهة نظري موقع حراج تشتري منه افضل من حراج السيارات

انا اشتري من الموقع وابيع عن طريقه الواحد يفكر كيف يشتري 
فيه عينات تبيع بسعر اقل من السوق فيه عينات ماتبي تبيع 

لاموشرط مو كل السوق على رتم واحد ماشي قبل كم يوم لقيت بي ام 2002 تحت المقرفون يقول جابت 33الف قلتله الحق الزبونلاتطلع له اجنحه ويطير وهنا موديلات 2002 اذا غليت مره توصل 25الف وكذا وحده انباعت على 22الف

اهم شي انت عند خلفيه عن الاسعار عشان ماتنخم في وحده ماتسوى

في اصحاب سيارات تتصل بيهم تبي تشوف السيارة يقول لك سوم الاول - ارد اقول " كيف اسوم بدون ما اشوف السيارة واجربها ""
ناس تبي تسمع سومات فقط

زي واحد ازعجنا باسعاره الخرافية عنده لكزس 2007 ماشي 12000 يبي فيه 243000 هههههههه 

موقع حراج مبالغة بالاسعار بشكل لا يووووووووصف لا احد يحط الحق على ادارة حراج مالهم دخل الطمع من الافراد ويبلغون عليك بكل وقاحة انك بخست السلعة زي فياقرا 99 حق المراسم مافيها مواصفات ابد حتى شاشة مافيها يقول مسيوم 43000 ياخي تكفى بع بسرعة وش تنتظر 

ولا اللي يقفل خاصية الردود عارف نفسه وش مسوي 

حراج المكرفون بتشتري كوم حديد ما تعرف ايش البلا اللي فيها ويقولون ما في فحص سكر في ماي 

حراج المكرفون انت وحظك وغالبا مضروب 

المعارض غالية زي هنا