أضف سؤال أو موضوع جديد          

الافضل بين القطع الاصلي والتجاري

up 13 down 15
صقر بللسمر 169
قبل 3 سنه و شهر



السلام عليكم ورحمة الله وبركاته




كل عام وانتم بخير




الأشهر الاخيرة او من سنه تقريبا أصبحت انزل موضوع بالشهر مره او مرتين




أما بالسابق كنت بشكل يومي موضوع من تجاربي الخاصه وأتعب فيها




ما يحتاج أذكر الاسباب العاقل بيعرفها




ندخل بموضوع اليوم ولا كتبته الا بعد ما صرت اشوف كثير من الردود تمدح القطع الاصلية




او يقولون ابعد عن الكفرات الصينية و من هالامور




وكثير كنت انصح بالكفرات الصينيه او بعض القطع ما هو شرط تكون أصلي




و تجيني انتقادات كثير على كلامي




طبعا مافيه شك الاصلي بجميع أنواع السيارات افضل من التجاري والصيني وغيرها




ولكن كل واحد حسب وضعه المادي




ولا جاء العضو يستفسر ويشاور الا وضعه المادي ما يسمح أنه يشتري الاصلي إلا عند الضرورة القصوى




والا بالعقل أحد عنده أمكانية يشتري كفرات ميشلان مثلا ويجي يشاور وش رايكم بالصيني




أكيد لأن وضعه على قد حاله ويبي يمشي أمورة




ويجونك الاعضاء خصوصا صغار العمر وصغار العقول يقولون أبعد عن الصيني




طيب ما عندي فلوس وش اسوي اسرق عشان اركب كفرات غالية




بتكلم عن نفسي أنا شخصيا




حجم كفرات اللومينا جنط 16 قيمة الصيني منها مع ضمان سنه ونوعية ممتازة




620 ريال كامل الطقم وتمشي سنه بالراحه وباقي فيها نص عمر




ولكن يكفي مشتني سنه أغيرها 




قيمة الكفرات الممتازة سواء ميشلان او يوكوهاما او غيرها الطقم حوالي 2400 ريال




نجي للوضع المادي




ما بقولك فقير وجاي يبي يغير كفرات ويتدلع




نقول موظف راتبة 5000 ريال 




عنده أيجار بيت 2000 ريال شهريا ولا أبالغ بالايجار 




هذا الايجار بالمدن الكبيرة لشقة متوسطه بمكان يعتبر عادي ولا هي شقه جديدة حتى




يبقى من الراتب 3000 ريال




بالميت مصاريف بنزين 300 ريال وجوال أقل شيء بالشهر راح يشحنه 100 ريال




و كهرباء البيت ما تقل عن 200 ريال هذي صارت 600 ريال




يبقى من الراتب 2400 ريال 




وش تكفي هذي يالله تمشي مصاريف البيت بالقوة للمتزوجين وحتى العزابي زين تمشيه




ويجي يبي يركب كفرات يجيك ورع يقوله ركب ميشلان او برجستون




يعني الباقي من الراتب كله يطق فيه طقم كفرات ويجلس على ...... حتى نهاية الشهر




المشكله اجي اقوله صيني فعلا يمشيك بدون خوف سنه كاملة وحسب استطاعته طبعا




تجيك الانتقادات صيني ما تضمنه وصيني ما ينفع وكلام فاضي




انا مجربه ولي سنوات كثيرة ما اركب غير صيني وأموري ماشيه




يعني على حسابنا يبقى من راتبه 2400 ريال يغير طقم بـ600 ريال يبقى 1800 ريال بالقوة تمشيه




كيف تبيه يركب طقم غالي




نجي للمساعدات مثلا وهي قطعة استهلاكية عمرها بالمتوسط تقريبا سنتين




مساعدات الكامري 2007 مثلا 




قيمة الطقم الاصلي 2000 ريال وهذا الواقع لا يجي احد يقول لا غالي هذا سعرها وروح اسأل عنها




وفيه نوع صيني كنت اركبه على الكامري اللي كانت معي الواحد 100 ريال




يعني 400 ريال تركب طقم كامل وعليها ضمان 6 شهور




والاصلي ما عليه ضمان أصلا




طبعا ضمان 6 شهور وهي تمشي اكثر 




ولكن نقول حدها الضمان 6 شهور وين المشكله




على قد حالك وقد ميزانيتك ركب طقم بـ400 ريال




ولا تجي تسوي فيها ما اركب الا اصلي 2000 ريال ولا يبقى شيء من راتبك وتحرم نفسك وعيالك




من أغراض البيت الاساسية




تراها سيارة بالنهاية كومة حديد ما تسوى تجلس كل شوي تغسل فيها وتلحس كفراتها




وعيالك ذابحهم الجوع




نجي للزيت والسيفون




هنا لو تغير ارخص نوع راح يتعب المكينه واصلا مافيه فرق كبير بينه وبين النوع الممتاز




ما اقولك غير اغلى نوع




ولكن كثير من أنواع الزيوت قيمتها على 17 و 20 ريال جدا ممتازة




يعني غير نوع ممتاز الزيت ما راح تفرق معك غير 50 او 40 ريال عن السعر العادي




هنا بالعقل مافيها خسارة 




بإختصار لا أشوف واحد بكره لو قلت لأحد ركب كفرات صيني يجي مسوي فيها فاهم




ويقول الصيني مافيه خير ومن هالكلام عندك فلوس غير للرجال او عض عليه
_________________________________________________




نجي من ناحية ثانية واشوفها كثير من الدلوخ




واحد يجي يستفسر عن سعر كابرس 2007 او 2008




وهو سعره النظيف منه حوالي 20 الى 25 ألف




وهذا حد الرجال ما عنده استطاعه




يجيك كم دلخ يقوله خذ 2011 وطالع فيها مبردين قير و 6 غيارات




طيب 2011 قيمته ما يقل عن 45 ألف يعني ضعف سعر موديل 2008




والشكل الخارجي والداخلي واحد والقطع وحده كلها الفرق القير فقط ومبرد قير قيمته 300 ريال




ندري ان 2011 وطالع افضل ولكن هل القيمة تستحق المبلغ الاضافي هذا عشان سخافه




طيب وحتى لو يستاهل القيمة انا فلوسي 25 ألف تجي تكرهني بالكابرس كله




وتقول يا تاخذ 2011 وطالع او لا تاخذ سيارة خلك على حمار اعرج




فلوسي 25 ألف تبي تعطيني فلوس زيادة اشتري سياره ما بقولك لا تعال اشتري لي وكالة بعد




لكن تجي تتفلسف على سخافات وتخوف العضو المستفسر من السياره كلها ليش




من ناحية ثانية 




واحد يدور سيارة صغيرة سواء داخل المدينه او سفر




فلوسه 20 ألف ويبيها اقتصادية ولا تطلب قطع




وين المشكله لو أخذ أكسنت 2010 أنظف شيء تحصله بالسعر هذا




وسيارة فعلا تعتمد عليها داخل المدينه وسفريات لو بتمشي بعقل 




يجيك واحد يقوله كوري كرتون وكلام فاضي خذ لك جمس 




طيب 20 ألف وش تجيب لي جمس موديل قديم مثل وجهك




وأجلس كل شوي بورشة ونص الراتب يروح بنزين




أو يقولون له زيد فلوسك الى 30 وخذ سيارة اكبر




بيبسي هو وش زيد فلوسك 30 الف بالسهولة هذي 




يروح بيبع جواله بـ10 الاف مثلا ويشتري سياره افضل شغل محششين




10 ألاف سهله بالكلام وصعبه بالواقع




فيه ناس وصل أعمارهم 40 سنه ما قد دخل بحسابه 10 ألاف




ما يعرف غير الراتب 4000 او 5000 وينزل على طول ينسحب اقساط وأيجار بيت




تجي تقوله زيد فلوسك 10 الاف او ركب كفرات ممتازة وكلام فاضي




وكثير الله منعم عليهم ماهو من تعبه




تحصله منسدح عند أبوه لحد الأن ما تزوج حتى ولا شيء ويدرس بالجامعه بعد




وتحصل معاه سياره قيمتها ما تقل عن 80 ألف ولا دفع فيها ريال




ووضعهم المادي ممتاز 




ولو شاف أحد يستفسر عن سيارة بحدود 15 ألف تمشي الحال




يقوله ما تجيب لك الا قرمبع وكل شوي تداوم بالصناعية




طيب يا ورع لا تعبت بالفلوس ولا تعرف تعب الدنيا وجاي تعاتب واحد بالقوة جمع او تسلف 15 ألف




عشان يشتري سياره جاي تقوله وش تبي فيها 




وش تبيه يسوي يجلس بدون سيارة يعني او وش الحل بنظرك




أنا ردودي العادة على المواضيع بأرخص الحلول سواء بالقطع او اصلاح القطعه نفسها




المشكله أنه سبق وبعض الاعضاء يتصل فيني يستفسر عن قطعه معينه واجيب له اسعار مناسبة




بالاخير يقول خلاص بشتري اصلي واريح نفسي والفلوس موجوده




طيب جاي تهايط على راسي او وش تبي يعني لا تتواصل معي بالاخير تقول اصلي وكلام فاضي




عندك فلوس اكيد الاصلي ما مثله




قبل يومين او ثلاثه واحد اتصل علي معاه كامري 2007 




يقول سخنت عليه وصارت ترتفع الحراره من بعدها وراح الصناعية قالوا مسح رأس




يكلف الشغل كله حوالي 700 ريال ولكن قالوا له راح تنقص زيت مع الوقت




طيب النقص كم بيكون تقريبا بالشهر علبة وين المشكله




كل شهر غير الزيت كله او زيد علبة بـ20 ريال




اقوله انت متصل وش عندك يعني تشاور او تبي تسلف او وش تبي




يقول لا بس صدق ممكن تنقص زيت 




طيب عندك امكانية تغير مكينه كاملة تشليح بقيمة حوالي 6500 ريال




قال لا والله ما عندي حتى 700 ريال هذي بنتظر للراتب واصلحها




خلاص اجل ما تحتاج تشاور 700 ريال اصلاح وكل شهر 20 ريال علبة زيت وانتهى الموضوع




تضغط نفسك او تتسلف ليش 




المشكله لو الاستفسار كان بالمنتدى يجونك الورعان يقولك ليش يسوي مسح راس ويتعب نفسه




ليش ما يغير مكينه 




أرجع وأكرر عندك فلوس لا تغير مكينه بعد روح الجمعيات الخيرية وتصدق بالسياره كاملة




واقرب وكالة طق لك فيراري وعيش جوك




لكن تجي راتبك بالقوة يكفي مصاريف وتقول وش الافضل 




المهم جاني غثيان وانا أتكلم وأتذكر بعض الردود 
منقول من اخوي (التركي1403)







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


صح لسانك .. كلام جميل ومشكور ... الواحد على قد لحافة يمد رجلية ... 


up 2 down 2
الرحامنه العبادي
قبل 3 سنه و شهر



مشكور يا طيب
لو تختصر شوي عشان نقدر نقرأ الموضع


up 3 down 2
ayham73 655
قبل 3 سنه و شهر



نقص الفراغات بين السطور 

سوي تعديل للموضوع ونقص سطر من كل فراغ موجود يطلع متناسق اكثر


up 3 down 1
التركي 1403 195
قبل 3 سنه و شهر



طيب اكتب منقول من العضو ابراهيم التركي


up 4 down 0
d7ooom777 428
قبل 3 سنه و شهر



المعذرة مانتبهت انك كتبت منقول اخر سطر لاني قريت البدايه لاني قاريه من زمان المعذرة منك مرة ثانيه وفي الاعادة افادة ههههههه


up 3 down 1
d7ooom777 428
قبل 3 سنه و شهر



d7ooom777
ياخوي انا كات منقول من(التركي1403 ) اقراء زين 


up 1 down 0
صقر بللسمر 169
قبل 3 سنه و شهر



طيب اعتذرت منك ليش الديسلايك


up 0 down 1
d7ooom777 428
قبل 3 سنه و شهر



d7ooom777
ياهلا عذرك مقبول ماهو انا الى حطيت الديسلايك


up 1 down 0
صقر بللسمر 169
قبل 3 سنه و شهر



الرحامنه العبادي : صح بدنك شكرا على مرورك 



up 0 down 0
صقر بللسمر 169
قبل 3 سنه و شهر



احسنت علی النقل وصح لسان ابو خليل وكلام سليم المشكلة في الصيني نظرة العالم للصيني انه رديء وما يعرفون انه درجات وخاصة الكفرات وما يقرا المواصفات ولا يحاول يتثقف ويسمع من الناس هذا رديء خلاص صار مثل الببغاء يرددها في كل مجلس انا جربت كفرات سوموتومو ياباني علی ماركيز وطلعت رديئة جداً وضرب علي في خط سفر وركبت صيني وجلس سنة حتی بعت السيارة ومن ابدع ما يكون


up 4 down 0
ابوخلوودي1 5038
قبل 3 سنه و شهر



كلام سليم

وبخصوص الكفرات صدقت

اذا الميشلان مامشتني الا سنتين والكوري والصيني بربع سعرها تمشيك سنه بالراحه فبحسبه بسيطه اغير صيني كل سنه بغير اربع مرات ولا بعد وصلت قيمة تغييره وحده لكفرات ميشلان


up 1 down 1
ahmadalotaibi 20
قبل 3 سنه و شهر



للمعلومه انا راكب كفرات صنيه طقم ب 600  و الى الان الكفرات نظيفه ركبتهم قبل سنه ونص  او سنتين  
ماشاءالله كفرات كويسه و انصحكم تركبوها 


up 1 down 0
fowad 127
قبل 3 سنه و شهر



نوعها لا هنت علشان نستفيد بما انك مجربها


up 1 down 0
ahmadalotaibi 20
قبل 3 سنه و شهر



انا اركب كفرات صينية 
لكن هذا مايعني انه تروح تركب رديتير صيني او طرمبة بنزين صينية 
مثل هالقطع ماتنفع صيني


up 1 down 0
شويخ من أرض مكناس 2815
قبل 3 سنه و شهر



انا اركب كفرات صينيه برضه والانواع
ديرو
جينيو
وينلي
رينواي



up 1 down 0
احمد شريف 3198
قبل 3 سنه و شهر



انا ركبت صيني للكرسيدا جنط 15 و لها حدود سنتين و باقي فيها اكثر من نص العمر بالرغم من وجود حذفه. نوعها 3 A.   او AAA  وايضا ركبتها لباص ركاب. طبعتها او بصمتها جميله و سعر الواحد ب 150 فقط. 
اما بالنسبه للقطع فأكيد الاصلي مافي مثله اذا عندك سيوله. بالنسبه لي اذا ماقدرت للاصلي الجديد اروح للمستعمل الاصلي. او الدرجة اللي تجي بعد الاصلي مباشرة. اما التجاري و الدرجه اللي بعد الدرجة الاولى فمن وجه نظري هو خسارة لاموالك. افضل اني انتظر لين استطيع اركبلها اصلي او قطع درجة اولى بعد الاصلي. 


up 2 down 0
amer ahmed 393
قبل 3 سنه و شهر



والله انا القطع اللي في السيارة اللي مو مهمة اركب تجاري الاصلي للاشياء المهمة فقط 


up 0 down 0
ابو صياف 69
قبل 3 سنه و شهر