يا اهل الخبره في المرور و المخالفات

احمد ربك انها وقفت على 7000 ريال 
واتوقع صاحبه بيتحول قضيته من مروريه الى جنائيه
 
وكمان اتوقع على الهروب ماهو كويس الله يعينه 

هروب   فيها  6 شهور

لانه صاحبه يعتبر طرف في قضيه التفحيط اصلان لو ماكان هناك تجمهر ماكان فيه تفحيط على العموم اتوقع قضيه خويكم مطوله 
انصحكم تشوفون واحد في المرور يمشي وضعكم والا الضباط بيكون لهم مفطح من ذهب 

طيب السياره بسمي وماهي حقت السواق!

صراحه انا همي السياره هههه اما خوينا الله يكون في عونه .

اذا همك السياره ولا يهمك خويك (قول انه اخذ السياره وانا نايم)

السيارة محجوزة وبتطلع ولا عليها مخالفة
زي اللي يفحط بسيارة اجار ما على السياره مخالفه

اللي بيصلح الدورية وسيارتكم هالسربوت هذا الله يلعن ذا الاشكال تتجمل فيه ويروح بموترك لتفحيط وينحاش من دورية

المهم ما دام حكموا عليه بالتعويض للدورية اجل معترف الرجال
لاتتركوا حقكم عنده ما يستاهل

عادي تراجعهم ويطلعون السيارة لانها ماهي حقته 

وهو يدفع التلفيات بسيارتك والمخالفات 
قول هو قال يبغى السيارة يوصل اهله ما قالكم ابغاها اروح تفحيط 

والله غريب يمسكونه عشان متجمهر ؟؟ انا ياما رحت لمواقع التفحيط ومتعودين كل ماجاء ربع شرطي
وولع السيفتي , الكل يهج وخلاص خوي اخوك ذا مسوي بلى

حروف للكتابه , شكلك قديم انت , الحين يبون المتجمهر اكثر من اللي يفحط ههههههه

و ليه تعطي سيارتك لكل من هب و دب 

والله ما اعطي سيارتي الا لاخوي 

كنت زمان اعطي و ترجع باصوات و لا قبعات 

جلد مو جلدك عالشوك جره 

خذها درس لك

الان هو محجوز و مطلوب 7 الاف تلفيات الدوريه .

وان شاء الله تكون له درس .


انا اليوم رحت وقالولي لازم يجي الضابط اللي كتب فيهم التقرير وحقق معهم لعشان يفيدك بموضوع سيارتك.

وبكره باذن الله اشوف الموضوع .وان شاء الله مايلحقني شي

يالغالي سألت واحد صاحبي في البحث والتحري في المرور
قال 
حجز الشخص اسبوعين في التوقيف
ودفع كافة تكاليف الدورية المصدومة
وحجز السيارة شهر كامل مع دفع غرامة ودفع قيمة الارضية وقيمة السطحة 
والرجال ما راح يخرج من التوقيف حتى يدفع قيمة الغرامة 900 ريال مع دفع مبلغ اضرار الي لحقت للدورية 

واذا الشخص عنده مخالفات سابقة موب ضروري يدفعها
المهم يدفع قيمة هذي المخالفة والاضرار الي لحقت بالدورية
واذا الشخص ما عنده فلوس
تتحول لهيئة التحقيق والادعاء العام ويتم التحقيق معه وايداعه السجن حتى موعد المحاكمة والشيخ يحكم عليه

لكن السيارة فقط حجز شهر 
والاجراءات الي تعملها الله يعينك
تروح الاستخبارات والدوريات الامنية ومكافحة المخدرات
تجيب ورقة مختومة فاهم علي مختومة من كل قطاع انه السيارة ما عليها بلاغ وما فيها مشاكل
وبعد كذا تروح المرور وتروح قسم البحث والتحري ويعطونك برنت موقع من العسكري ومختوم من مدير القسم انه السيارة ما عليها ملاحظات
ويعطونك بعدها ورقة لصاحب الحجز مختومة انه لا مانع من خروج السيارة المذكورة في الاستبيان 
ولازم صاحب السيارة او وكيله الشرعي يستلم السيارة

الله يعينك اذكر واحد يقول لنا سالفته دخل بغلط موكب تفحيط بقصيم ومسكوه الفرقه والله ياهو تمرمط شهر وهو يراجع فيهم طبعن ماانحاش زي خويك ولاشي وقف وخذوها سطحه  ودفع بس قيمه المخالفه بس جلس شهر وهو يتمرمط بمرور القصيم عاد القصيم متشددين وهو من اهل الرياض راح جاي القصيم الرياض ومرمطه لحد  انتظر العقيد الي ماسك المرور انتظره لعند سيارته وكلمه وهو خارج من دوام وفكها له 

والله يالغالي لا تثق بأحد ختى لو اخوك
حصلتلي قصة مع اخوي الي اصغر مني كنت ايامها في الدوام في الخطوط السعودية
وعلينا ضغط في العمل مااقدر اخرج من الدوام
وسيارتي كان فيها حذفيه ولازم ميزان وسحب يبيلها شغلات
المهم واكلم اخوي ياخذ سيارتي من البيت ويوديها الورشة ورحت انا بسيارتي الثانية
المهم اخوي قال تم
واخذ السيارة ووداها عند الرجال وخلصت واخوي بشرني انها خلصت وصارت تمام
فرحت 
المهم بعد ساعة المهندس صاحب الميزان يتصل على جوالي
وقال بالحرف الواحد السيارة مع اخوك وواحد صاحبه وجالس يفحط فيها في كل شارع ودخان يطلع من كبوت السيارة وكذا
انا بعدها اتجننت وركبني ابليس
واتصل على اخوي واقوله وش تسوي بالسيارة ليش تفحط فيها هذي هي الامانة !!
اخوي انحررج مني لكن للاسف شين وقوي عين
وقال لا تطلب مني خدمة مرة ثانية ووووو الخ .
ارجع من الدوام وافتح الكبوت الا واشغل السيارة الا واشوف دخان طالع من التيربو وصار يطلع زيت من اطراف مراوح التيربو
يعني التيربو ضرب
والله وانقهر وآكل في نفسي 
وكلفتني السيارة مبلغ وقدرة علشان اصلحها واغير التيربو
فنصيحة يااخوان لا تثقوا بأحد انكم تعطونهم سيارتكم حتى لو اقرب الناس لك اخوك مثلا

الله يجزاكم خير جميع...

و tomahawk بيض الله وجهك وماقصرت ...

الله لا يهينه يعوضك ويعوض راعي الدورية هذا صديق سوء انصح اخوك بالابتعاد عنه بيسبب له مشاكل هو بغنى عنها يكفي اعدم عليه موتره

النبي يقول (إِنَّمَا مَثَلُ الجَلِيسِ الصَّالحِ والجَلِيسِ السّوءِ كَحَامِلِ الْمِسْكِ وَنَافِخِ الْكِير، فَحَامِلُ الْمِسْكِ إمَّا أنْ يُحْذِيَكَ وَإِمَّا أنْ تَبْتَاعَ مِنْهُ وَإِمَّا أَنْ تَجِدَ مِنْهُ رِيحًا طَيِّبَةً، وَنَافِخُ الكِيرِ إِمَّا أَنْ يُحْرِقَ ثِيَابَكَ وَإِمَّا أَنْ تَجِدَ رِيحًا خَبِيثَةً) متفق عليه.أعانك الله هذا درس لاخوك في اختيار صداقاته