أحذروا ياأهل اللاندكروزرات المضخات
28
7
إضغط هنا للإخفاء
السلام عليكم ورحمة الله
بأدخل في الموضوع على طول بدون مقدمات
البارح حصل معي موضوع غرررريب
طلعت أنا وعيالي من مكة لمسجد الميقات بالسيل الكبير قرن المنازل
ميقات أهل نجد ..
وقفت موتري Gx-r 2014 طفيته ونزلنا نصلي العشاء
رجعنا عقب الصلاة .. طبعاً جيت للموتر الريموت في جيبي بأفتح الباب
ماأنفتح لي الباب طلعت الريموت ضغطت زر فتح اﻷبواب .. ولاشيء !!؟
نصف ساعة وأنا أحاول بدون فائدة .. ورطة على الكيف طبعاً سلمت أمري لله
وقلت هذا الريموت ياأنه خلصت بطاريته أو حصل له شيء في البرمجة
رجعت عيالي بعد نصف ساعة لمصلى النساء وقلت بأدور لي موتر أروح أشوف مشكلة الريموت
وأنا جالس أبحث عن سيارة جاني أحد اﻷخوان معتمر أقبل علي يبتسم
يقول وش فيه عيا يشتغل قلت إيه !!
قال وأنا نفس موترك ونفس المشكلة وأشر لي على موتر ثالث نفس الكلام !!؟
خلاص هنا سلمت بإن الريموت سليم ولافيه إلا العافية ..
بعد ماأجتمعنا الثلاثة وتشاورنا سلمنا بإن المنطقة فيها بلاء ..
كان بجنبنا مضخة أسمنت وعمال عندهم صبة قال أحد الشباب لايكون جهاز الريموت حق المضخة
هذي ذبذبته قوية ولقربنا منه ومن مجاله المغناطيسي عطل ريموتات مواترنا !!؟
فأتجهنا للعامل اللي شايل جهاز تشغيل المضخة طالبناه بإيقاف الجهاز والمضخة لعل وعسى
وبالفعل طفاه .. إلا يوم أشتغلت أجهزتنا وبالتالي مواترنا الثلاثة دبت فيها الحياة من جديد !!
ولله الحمد .
أحدنا مسكين خلى عياله في المسجد وراح للطائف غير بطارية الريموت .. تكبد مشوار والبلاء في المضخة
كتبت الموضوع للفائدة .. بارك الله في الجميع .
إبلاغ
الردود
انا ملاحظ ان الريموت يتأثر من ذبذبات الجوال
اما مظخة الإسمنت الموديلات الجديدة لها ريموت يتحكم فيها
1
0
أكتب سؤال أحصل عليه ديسلايك!!
وش الوضع بالضبط!!
قبل 8 سنه و 10 شهر