أضف سؤال أو موضوع جديد          

سعد والجيب والموقف الصعب حياكم

up 54 down 14
الرفاعي33 13911
قبل 5 سنه و 11 شهر



السلام عليكم ورحمة الله وبركاته 

اهلا وسهلا بجميع الاعضاء

اسعد الله اوقاتكم بكل خير كيفكم وش اخباركم اتمنى ان تكونوا في صحة وعافية

يسعدني ويشرفني ان اقدم اليكم هاذا الموضوع المتواضع

طولت عليكم ههههههههه اخلص عطنا الي عندك

ابشروا ابشروا بالخير

هاذا موقف حصلي ومستحييل انسى هالموقف 
طبعا الموقف بالتحديد حصلي 1427 
على ايامها عاطل عن العمل يعني على قولتهم لاشغل ولا مشغلة

عندي ابن عمي اسمه سعد رجال حطه على يمناك ومجنوون مغامرات
ومقانيص ويجممع في هالشنون يشتري جيوب قديمه شاص 82 و83 و81
ويشلح من ذا ويركب في ذا ياخذها من 7 ومن 8 من دون استمارة وماخذلة عدة
ورافعه ويشتغل 

والله وطالت حياتكم معه موتر مايفكه جيب شاص 83 مدلعه ومضبطه على اخر تضبيط
ويشيك علية اول باول 

طبعا ماشاءالله عليه ماعمرة وداة الورشه هو يضبطه عندة في الحوش 
في يوم من الايام قالي يابو محمد بكرة بقنص وابيك خوي طلبتك لاتردني
نبي نسجها مع ارض ربي والارض ذيك الايام مليانه صيد
ومخدوم العزبة وكل شي علي

ابيك بس تكون رماي على يميني وانا بسووق
ومالك هم الصيدة الي نلقاها مالك الا من يحطها على يمناك
بس الله الله لاتضيعنا اي صيدة نحصلها لاترووح 
قلت احتزم وحطني على يمناك يابو المساعيد كلها
عاد ابن عمك ويطلبك مستحيل تردة 

والله وتجهزنا طالت حياتكم مع المغرب طبعا ناوينها مقنااص ليل
واخذنا العزبة كاملة واخذنا استبنتين عاد العزبة مايحتاج اشرحها لكم كلكم عارفين عزبة المقناص والكشتات
دقينا سلف وتوكلنا على ديرة تبعد 40 كيلو عن منطقتنا
وبعد 40 كيلوا يجي المفرق الي نبيه 
وصلنا المكان وبدينا ندوج وندور 

حصلنا اول صيدة وهي ارنب طبعا تعرفون الارانب البرية الجبلية
ووراها وانا جاهز بس انتظرها تجي على يميني
ويمين ويسار ووراها ودوختنا حول 10 دقايق طرد
وجابها ذيبان ويحطها على يميني واسمي بالرحمن واطخها
ومحلها ماتحركت عاد تعال شوف سعد
اخر بسطه بيض الله وجهك كفوو يالبواردي
عاد تعال دورني ههههههههههههه يوم قال بواردي
قلت مالك هم يالذيب اقل شي نبي نجيب 5 ارانب
قال كفوووووووو

والله ونحطها في الصندوق والي بعدة ياسيدي
والمعنويات مرتفعه والحماس يزووود ماينقص
دورنا دورنا حول ساعه كاملة مالقينا شي
قالي اقولك بنرووح مكان ثاني 
فيه يماني عندة نحل بنشوي الارنب وانتعشى عنده ونضبط براد شاهي
ونشتري من عنده عسل ان كان حصلنا شي
وبعدها بنكمل المقناص 
قلت تم شورك وهداية الله

والله ورحنا شوينا وتعشينا وانبسطنا واخذنا كيلو عسل سدرة ب300
والحين الساعه حدود 12 نص اليل
طبعا المكان الي بنتجهلة مكان جبال وصعبة اشوي
اصعب من المكان الاول
يمين يسار والا الارنب الي على كيف كيفك
عاد هو اذا شافها تركبة بقعاء لو يقلب الجيب الا يجيبها غصب
ووراها ويصيح خلك جاهز ياويلك لو تخطيها
الارنب هاذي ذكية طلعت مع الجبل
قلت ياسعد اتركها هاذي مهسترة بتودينا في داهية
قال حرام ماتركها بعدين هاذا موتري واعرفه الا يجببها
ماتعرف ابو شنب الشاص ههههههههههههه 
لاحوووول ولا قوة الابالله
يارجال اتركها قال اسكت وخلك جاهز
والله ووراها ووراها ومن جرف وفي دحديرة ومن دحديرة في طلووع
المهم الرجال فية شضوو

طبعا الي مايعرف الشضوو هاذا حجر بس نوع كبير ويجي حاد
المهم الرجال ماشافه وضرب فية وانفقع الرديتر
الله يهديك يابن عمي عاد حلها هالوقت ولا جوال وديرة مقطعه
المهم الحرارة ارتفعت وقفنا 
والا والله الشق كبير ولا فية حل
هااه ياسعد وش العلم وش الراي
قال الجيب بنقفلة وبنخلية مانقدر نمشي علية
والمكان خالي من البشر ماحد بيجيه
بنمشي كعابي ل محمد اليماني
ونمسي عندة الى الصباح وبعدها نشوف حل
قلت تم والله ونمشي حول ساعه ونصف الساعه
وصلنا عند حبيبنا محمد 
واعطيناه السالفه قال مالكم هم
ارتاحوا والصباح بضبط الفطور وكفيلي بيجي على 8 الصباح وبيوصلكم معه
ارتحنا ونمنا بعد ماتعبنا وكلة من سعد الله يهدية
والله وجاء الصباح ونصحى والا محمد الله يبيض وجهه مجهز الشاهي والفطور
عيينا خير وسولفنا وانتظرنا نص ساعه
وجاء كفيلة واعطيناه السالفه
وقال ابشروا بوصلكم البيت بس عطوني نص ساعه اكشف على النحل
قلنا ابد خذ راحتك ياعم صالح طبعا هو شايب بس دندوون ورزقه على هالنحل يتنقلبه من ديرة في ديرة يتعب علية بس يحصل خير الله يرزقه
المهم خلص شغله ووصلنا للبيت معه ونيت 2002
والله يرحم والدية ماقصر معنا راعي معروف
ووالله يالنشامى سعد مثل ماقلتلكم عند اثنين جيوب غير الي رحنا فيه
يشلح منها فك رديتر واحد منها واخذ العدة
وركبنا الونيت حقي

ومشينا ومرينا البقالة واخذنا اغراض لمحمد ويستاهل على وقفته معنا
وصلنا محمد واعطيناه الاغراض وانبسط اخر بسطه
وقال والله ماتروحون الا بعد الغدا كفيلي جايبلي كيلو لحم
وبسوي مضغووط ياطيبك يامحمد نشمي ذاك الرجال
قلنا خلاص بنصلح الجيب وبنجيك على الساعه 2
قال تم

مشينا ووفكينا الرديتر الاول
حالته حالة مفقوع رايح في ام امها
وركبنا الرديتر الي جبناه وعبيناه موية
وضبط الموتر 10 على 10 ياقددع
رجعنا لمحمد والا الغدا باقيلة 10 دقايق ويجهز
قمنا ساعدناه وسوينا براد شاهي منعنش
تغدينا وانبسطنا

قالي سعد هاه وشرايك نكمل المقنااص
قلت يرحم والديك ماعاد نبي مقانيص ههههههههههههه
لاتلوومووني بعد الارهاق والتعب الي جانا ماعاد يبيلها مقنااص
هاذا موقفي مع المقناص ومع ابن عمي سعد
والى الان سعد ماترك المغامرات والمقانيص تجري في دمه
 ودايم يعرض نفسة للمصاعب والمتاعب لاكن ماقول الا الله يحمية
اتمنى ان ينال الموضوع على حسن اعجابكم
واسف على الاطالة

تحياتي لجميع الاعضاء

ااخوكم الرفاعي33








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


هذه حياة الشباب مغامرات وخبرات مش مولات واسواق الله يسعدكم ويوفقكم


up 3 down 1
dawwy 266
قبل 5 سنه و 11 شهر



ههههه تسلم يرفاعي بس ترا مالي كثير بل قنص يعني علا خفيف 


up 0 down 0
مراجل 194
قبل 5 سنه و 10 شهر