موضوعي مع عبدالله ومع ابو فارس حياكم

60 13

لايمكنك التصويت حتى الحصول على 20 نقطة على الأقل
إضغط هنا للإخفاء

الرفاعي33 13917
قبل 9 سنه و 6 شهر

السلام عليكم ورحمة وبركاته 

سلامي على جميع الاعضاء في هاذا المنتدى الرائع والجميل بما تعنية الكلمة
اولا احب اشكر جميع الاعضاء بدون استثناء
على مايقدمونه من مواضيع متميزة ورائعه 
وفعالة والشكر لله عز وجل ثم للجميع 

اليوم جايبلكم موضوع عن شي حصلي مع زملائي اثنين في العمل وانتهت على حقد وزعل وكراهية من صاحب لي في العمل
وكنت ماعتبرة الا اخ لي وعزيز وغالي

الممهم بابدأ الموضوع من الالف الى الياء
اهم شي اقرأ الموضوع كامل

ولو كنت مكاني هل بتفعل مافعلته انا ولا بتمشيها
المهم ياحبايبي 
تفضلوا الموضوع 

الموضوع اني انا ياكاتب الموضوع 
قبل شهرين واحد من اخوياي في العمل
معه افالون 2009 لؤلؤي امريكي فل كامل 
الرجال عرضها للبيع علي 

وكان معجب بموتري الكامري واتفقت معه مبدأيا اعطيه موتري راس براس
فقط علي نقل الملكيه وهو كذالك

المهم اني انا في الاستخدام الامريكي تويوتا مايفوتني شي 
اخذت الموتر منه وجربته واعطيته موتري يجربه واتغقنا التجربة تكون من الصباح الى المغرب من شان افحصه واجربة خط واطلعلة تقرير اوتوشيك 
والله وطالت حياتكم يالنشامى

اول مابديت فيه خط فية صووت في المكينه
طقطقه واضح الصوت جدا 
قلت مو مشكلة بيببن في الفحص يمكن من نوعية الزيت

المهم مع الطلوع يضعف عزمه يموت

والمكيف مايبرد اعطيه على اخر درجه مايبرد يعطي حار
السخانات والتبريد ماتشتغل مادري وش علتها

انا مبدأيا كرهت ام الموتر وما مشيت حتى 30 كيلو
اخذت رقم الهيكل وارسلت لرجال شرواكم
وقلت عطني تقريراوتوشيك كامل وارسلة على الايميل قال ابشر ربع ساعه ويكون عندك
قلت يابو محمد قبل ماتفحصها وتخسر 300 فحص انتضر لين يوصلك التقرير
انتضرت عند باب الفحص
جاني التقرير وطلعت النتايج كالأتي

1/عدادها يوم طلعت من امريكا ماشي 120 الف ميل وعدادها الحالي 80 الف ميل بكل وضوح ملعوب في عدادها

2/الرجال يقول جايبها على يدة في 2013 بينما في التقرير طلعت من امريكا عام 2011

3/لونها في التقرير فضي بينما هنا لؤلؤي معناته مغير في السعودية

طبعا بعد هالملاحضات كرهت الموتر ولا كمل حتى معي 3 ساعات
اتصلت على الرجال وقلت ربي يسعدك
موترك مايناسبني ابدا 
قالي افا ليش الموتر شد بلد
قلتله موترك فيه ملاحضات كثيرة
والتقرير معي ماينفع لي ابدا وبيض الله وجهك ماقصرت قابلني وخذ موترك
قابلته ووريته العيوب وسكت واخذت موتري ومشيت
رووحت الايام ويوم ورى يوم
وجانا موضف مترقي عندنا شهراني
كفووو شرواكم 
المهم الرجال صار صديق لي وله كل الاحترام واسبوع ورى اسبوع وصرنا مثل الاخوان انا وياة
المهم جاني في يوم من الايام وقالي يابعدي انا محتاج موتر كفوو
وحصلت افالون 2009 امريكي
وابيك تساعدني في شرائها
قلت الموتر الي مع خوينا عبدالله
قال ايوالله هو اعجبني واتفقت معه افحصة بكرة
قلت اسمع انت غالي عندي وهو غالي عندي
ولا ارضالك الخسارة وانا خوك
الموتر هاذا تقريرة وهاذي ملاحضاته
وانصحك تبعد عنه كل الابتعاد
ولا تقولة اني قلتلك قل ماعجبني 
قال ابو فارس والله ماهقيتها منه ولا قالي على الملاحضات
الرجال اعتذر وترك الموتر

خذينا يومين اتصل علي عبدالله
قال قابلني ابيك جيته والا الرجال معصب ومتغير ونسى الخووة
قالي لاسلام ولا كلام انت ماتستحي على وجهك تخرب البيعه بيني وبين الشهراني انت نسيت الخوة
قلت اسمع انا ماخربت البيعه جاني الرجال 
وما اعتبرة الا مثلك عزيز وغالي

واستشارني في موترك وعطيته العلم
ودامك عارف العيوب ياخي قولة بالعيوب وبكيفة ان شرى وان تركها
وانت ماهي من اعلوم النشامى يوم انك ماتعلمة بمشاكل الموتر وتقولة على الشرط
طيب افرض انه اشترى واكتشف هالمشاكل بعدين وهو خوينا بالله مابتندم انك سقت امها عليه
تبيني اشوف الغلط قدامي واسكت لابالله مابسكت 

قال المهم من اليوم ورايح ماعاد بينا لاسلام ولا كلام قلت الله يوفقك درب السلامه وانت الي زعلت ماهو انا
 وتزعل من الحقيقة والصدق دق سلف ومشى

وخوينا حصلة افالون نضيف 2010 اسود
اخذها ب70 بس نضيف ماشاءالله فل كامل
والله يوفقه

هاذا ماحصل معاي مع عبدالله ومع ابو فارس والله يهدي عبدالله على الي سواة
وانشاءالله اني لاشفت خطأ قدامي ماسكت عليه لو توصل للزعل والحقد وانتم كذالك مابتسكتون على الخطأ
هاذا مالدي اليوم اتمنى ان الموضوع ينال على حسن اعجابكم والمعذرة على الاطالة
واعذروني ماقدر ارد عليكم لاني الحين ماشي الى جدة
اول ماوصل جدة ارد على الجميع 
ابد خذوا راحتكم ربي يسعدكم
تحياتي لكم 
اخوكم الرفاعي33

إبلاغ

الردود