الاستعجال اخرة ندامه ومعاناه

34 10

لايمكنك التصويت حتى الحصول على 20 نقطة على الأقل
إضغط هنا للإخفاء

الرفاعي33 13917
قبل 9 سنه و 6 شهر

السلام عليكم ورحمة وبركاته
اسعد الله اوقاتكم بكل خير اعضاء منتدى حراج
وش اخباركم ان شاءالله مبسوطين ومرتاحين
جايبلكم اليوم موضوع عن الثقه الزايدة او الثقه العمياء
والاستعجال الي اخرة ندامه 
بسم الله نبدأ في الموضوع 
قبل 3 ايام بالتحديد اتصل علي رجال من الجماعه غالي وعزيز علي شرواكم
الرجال يداوم في الطايف في القاعدة الجويه بالتحديد
ويريد موتر كامري 2010 او 2011 وافلوسه حول 45 الف
المهم هو قدلة اسبوع يدور موتر ويبي شي نضيف يعني يبي موتر شيخ خالي من العيوب والسمكرة والرش
المهم كلمني قبل اسبوع ودورتله في الموقع 
وحصلتله كامري 2010 نضيف بس لونها اسود وهو مايداني الاسود يبغى لون لؤلؤي
والله وطالت عماركم يالنشامى
اتصل علي قبل 3 ايام وقالي لقيت كامري 2010 في تربة البقوم عند واحد من اخوياه يعمل معه في الطايف
عطاني مواصفاتها والرجال يقول شرط من الى
قالي وشرايك نبي انتخاوى من الباحه الصباح 
طبعا انا مسلم وفاضي ماعندي اي مشكله 
قلت تم الصباح خلك جاهز نروح انشوف الموتر
والله وفعلا ماجاء الساعه 8 الا والرجال يتصل
مريته واخذته وتوكلنا على الله
عاد نسولف في الطريق يقولي الرجال ثقه وان شاءالله الموتر يطلع كفووو
قلت لاتستعجل خلنا بالاول نشوف الموتر وبعدها نحكم
المهم وصلنا تربة الساعه 11 قبل الظهر
رحنا للرجال تقهوينا عنده ويمدح في الموتر وعلى ايدي من الوكاله ومحافظ عليه ومن هالعلوم
الموتر وقفته حلوة وصاحبي بغى يطير في العجه
اعجبه الموتر وقال انا اشتريت بعطيك عربون 5000
والباقي بكرة
واعطيه نضرة مثل الي يقول انت صاحي ولا مجنون
المهم خذيت صاحبي على جنب
قلتله سلامات وش فيك اهبل انت 
تشتري مافحصت ولا شي قال الموتر ماتشوف وقفته وكاله ماشاءالله
قلت حبيبي اسمع العلم الرجال صاحبك وثقه ماقلنا شي
بس تشتري لافحصت ولا كشفت على الموتر
يمكن مكينته منتهيه يمكن جاه حادث
قالي طيب وش السواة قلت السواة مثل الناس نفحص ونحكم بعدها
المهم قلتله انت لاتتدخل انا بتفاهم مع الرجال قال طيب
والله واكلم الرجال يالحبيب الموتر مبدأيا مافيه شي
لاكن احيانا عينك تغشك قال هاذا صاحبي الله يغش الي يغشه
الموتر وكاله قلت المهم كم السعر قال 50 الف عشان صاحبي
قلت غاليه عندك غير هالكلام قال عشان جيتكم ب47
قلت الا40 تناسبك قالي لاوالله من الاخر 45 
قلت تبي العلم 43 هاه بعت قال الله يباركلكم
انا الحين استغربت وشكيت نقص من 50 7 الف
قلت طيب فيه حاجه ثانيه نبي نفحص كمبيوتر
قال والله تربة مافيها فحص والموتر قدامكم اشرطه لكم واضمنه
قلت ماينفع تشرطه الي يشرطه الفحص 
المهم قلت اسمع متى بتروح الطايف قالي بكرة
قلت اجل الوعد غدا في الطايف 
قال مافيه مشكلة بس والله بتخسرون 200 ريال على الفاضي
قلت مافيه مشكلة بسيطه وانا اخوك 200
بكرة نقابلك في الطايف
ومشينا من عنده 
عاد خويي في الطريق يقولي والله ان راح الموتر لاوريك شغلك
قلتله عين خير مابيروح وكل تاخيرة فيها خيرة
وان راح ابشر بافضل منه لو اعطيك موتري
المهم رحنا الطايف وتمشينا وخلصنا بعض اللوازم
وجاء اليوم الثاني الصباح اتصلنا على الرجال 
وقابلناه في الصناعيه وقالي فيه واحد هنا بوديكم له شغله نضيف
قلت ابد مالك هم انا اعرف واحد تركي من زمان وشغله نضيف 
قال على راحتكم 
مشينا للفحص فحص المكينه التركي 
وهنا الكارثه قالي نسبة المكينه 80 ولا بتطول
قلت خير ان شاءالله الي بعدة
قالي العكس اليمين الطويل يبيله تغيير 
قلت الي بعده البودي
فحص البودي طلع وكالة كلة الا الرفرف اليمين جايه ضربه
ومغير ومغير الصدام والشمعه اليمين
جربه خط طلع فيه حذفيه يمين ماهي بسيطه
كلمنا على جنب قال الموتر مايصلح دور غيرة
والله وشرايك ياصاحبي قال والله 
مادري وش اقول بس دنيا عجيبه صاحبي ويبغى يغشني ويحلف انه وكاله 
لاحول ولا قوة الا بالله
بغيت انخم في الموتر وتووبه ماعاد اخذ موتر الا وافحصه من الى
قلت اسمع دامه صاحبك لاتسوي مشكلة ولا تكثر كلام
بس قولة الموتر ماناسبني الله يرزقك
والله وقالة الكلام وذاك ماكثر كلام ولا عاد له وجه يكثر كلام
المهم مشينا من عنده وهاذا نهاية الموضوع
الموضوع نزلته لاجل
1/انتبه انتبه لاتاخذك الثقه العمياء 
2/لا تقول هاذا قريبي ولا صاحبي ياما قريب غش قريبه وياما صاحب غش صاحبه
3/لاتنغر في شكل الموتر وتقول وكاله من وقفته ياما تحت السواهي دواهي
4/لاتستعجل حتى ولو الموتر في منطقه مافيها فحص اتفق معه يجيك في مكان فيه فحص ولا اتركها وشوف غيرها
5/اذا ماعندك خبرة خذ معك واحد خبرة ويفهم مبدأيا بعدها اتجه الى اماكن الفحص
6/اذا حصلت موتر وقالك صاحبه انا بوديك لفحص اعرفه لاتروح للي يعرفه دور فحص غيرة
7/كل تاخيرة فيها خيرة مثل الي حصل مع صاحبي تاخر الى اليوم الثاني بس هاذي التاخيرة كان فيها خيرة 
هاذا مالدي اليوم وشكرا للجميع
اخوكم الرفاعي33

إبلاغ

الردود