أضف سؤال أو موضوع جديد          

تقريري فورتشنر 2006 - 2007 -2008 --- باثفندر 2010

up 7 down 6
siaf 347
قبل 5 سنه و 10 شهر



السلام عليكم 

انقل لكم تجربتي ل 3 سيارات فورتشنر كانت عندي ولازلت مستخدمه ونيسان باثفندر 2010 

اولا احب اوضح لكم اخواني الكرام اني ابيع واشتري في السيارات لغرض الأسترزاق والأقتناء 


نبداء :-

فورتشنر 2006 قير عادي + دبل 4 سلندر 

استخدمته 3 سنوات تقريبا * شريته اقتناء ب 58000 وبعته ب 55000 ( فيه مشكله بالمكينه ) 

مميزاته /
1- موتر كفو ودبله كفو ويقوم في الخامس بالدبل الثقيل

2 - قليل اعطال او بالأصح لايكاد يتعطل لكن حصل فيه مشكلة ماصورة مويه المكيف وقامت تهرب مويه الرديتر 
ومع الوقت قام يسخن الى ان ضرب الراس وبعته ب 55000 بعد ثلاث سنوات استخدام
 وسلملي ع تويوتا انشهد انها مواتر في البيع 

3- اضائة الأنوار الأماميه ممتازه جدا والعالي اروع 

4- اقتصادي جدا جدا في البنزين تفلله ب 24 ريال 91 وتنساه

5- طبعا مثل ماقالو ما فيه مثل الخل الوفي هالموتر كنت اجور عليه بكل ماتعنيه الكلمه نروح انا وربعي نكشت 
داخل البر ب 45 كم وندخل في وديان ماء وفي اماكن في غاية الصعوبه ورجلي حاره وكان وافي ويجمل 

6- موديل 2006 تجميع تايلندي ويقارن التايلندي بجودة التجميع والتربيط بالياباني واللي جرب اعلى من الموديل 
هذا بيعرف وش اقصد لأن 2006 تايلندي و 2007 وفوق تجميع اندنوسي 



عيوبه /  

1- تانكي البنزين صغير 65 لتر ما يجمل في المقناص للمناطق البعيده والمقطوعه 

2- قطع غياره اشوفها غاليه جدا مثلا --- اقمشه اماميه ب 350 ريال + مساعدات اماميه 1100 للأثنين
+ شمعه اماميه ب 750 للحبه
 
3- عزمه مع الطلوع وانت محمل ماش لازم تشد عليه نمر عشان يمشي
 لكن اكتشفت بعدين ان القير الأوتو افضل وأقوى من العايدي
 
4- مساحة الجلوس في المراتب الأخيره ضيقة يعني ماتنفع الا للأطفال

5- مراتبه مريحه وتصميمها مناسب لكن نظام التعليق قاسي جدا ومتعب في السفر الصراحه 


=============================

فورشنر 2007 قير اوتو 6 سلندر + دبل ( كل ال V6 دبل ) شريته لغرض الأسترزاق ( اتكسب ) 

استخدمته شهرين تقريبا 

1- عزمه ممتاز جدا بلأضافه الى مميزات اللي قبل رقم 2-3-5
2- مكينته هادئه مع السرعات العاليه 
3- توصل سرعته 200 في لمح البصر ( مبالغه قليلا )

عيوبه /

1- سبق ما ذكر في النقاط 2 و3 
2- يصرف بنزين بشكل عجيب مع التأكد من سلامته الميكانيكيه 
3- مراتبه قااااسيه وناشفه عكس ال 4 سلندر مراتبه لييينه وممتازه


==================================================

فورتشنر 2008 قير اوتو 4 سلندر + دبل  -- شريته اقتناء ب 60000 قبل سنه و 8 شهور ولازال معي 
وهو معروض حاليا للبيع في الموقع

مميزاته /

1- ماسبق ذكره مع اول فورشنر في النقاط 1+2+3+4+5
2- عزمه ممتاز مقارنة مع القير العايدي 
وهذا تسارعه https://www.youtube.com/watch?v=WndoL4bKpMA


عيوبه 

1- النقاط المذكوره في الأول رقم 2+4+5 
2- تجميعه اندنوسي وفرق بينه وبين ال 2006 في تماسكه




نقطه اخيره ****** 

لكل من يعتقد ان الفورشنر سريع انقلاب وانه مو راسي وكذا 

احب اني اقوله غلطااااان بسبب ان وزن البودي خفيف ومركز ثقله في الأسفل فيأمن مركز توازن ممتاز 

=================================================


باثفندر 2010 اوتو دبل / شريته استرزق منه 

استخدمته في حفر الباطن مدة شهرين 

مميزاته 

1- عز الله انه موتر نشيييط ودبله نشييييط 
والله اني رايح به ام رقيبه ومحمله ركاب وانه يمشي في الطعوس ولا ضربلها حساب والشاصات والجيوب
من حولي مغرزه يعلم الله

2- عزمه بطللل افضل من الفورشنر السته ويمشي 220 كم بالراحه

3- مكيفه افضل من الفورشنر 

4- الراحه مريح نسبيا اكثر من الفورشنر 

5- قطع الغيار بعضها ارحم من الفورشنر ورخيصه مثل الأقمشه والمساعدات 


عيوبه //

1- صرفية بنزين اعلى من الفورشنر 
2- اصوات قربعه خاصة من الشنطه
3- انواره الأماميه ضعيفه وتوزيعها سيء
4- عمر المكينه الأفتراضي اقل من الفورشنر السته ( ياكثر ماشفته مخبط )
5- مراتبه لينه صحيح لكن تصميمها سيء خاصة مسند ظهر السائق
6- مشكلته في اعادة بيعه والله تعبني اللين انباع ولو انه ماشي 110000 كم وشبه جديد وكاله



انتهى التقرير 

اتمنى ان يحوز التقرير على استحسانكم 

والدعاء لأبنائي عبدالله وعبدالعزيز وغلا   بالتوفيق والصلاح


واتشرف بكم بمتابعتي في الأنستقرام ..  MR-BIN-SIAF







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


مشكور على التقرير

ولكن عندي مداخله كثير من الناس اشوفه يركز عليها

يقول بكم تعبي فل السياره واذا شافها مثلا 30 ريال واقل يقول اقتصادية

و 30 وفوق يعتبرها تصرف 

طيب وش دخل حجم التانكي بالصرف ؟؟؟

تحصل سيارات تاخذ كمية بنزين اكبر ولكن اقتصادية اكثر من ام تانكي صغير 

حجم التانكي ماله دخل


up 6 down 2
ابراهيم التركـي 1067
قبل 5 سنه و 10 شهر



حجم التانكي صحيح انه صغير65 لتر في ال 4 سلندر لكن يمشيك داخل البلد 400 كم تقريبا اما في السفر يمشي حول 350 

لكن ال6 سلندر تانكيه 85 لتر ولكن مايمشيك اكثر من 350 كم داخل البلد اما في الخطوط تقريبا 380 كم ولا يقبل الا بنزين 95


up 1 down 0
siaf 347
قبل 5 سنه و 10 شهر



الباثفايندر هو نفس مكينة الاكستيرا
وانت بنفسك قلت مكينته عمرها قصير وقبل فتره واحد نزل موضوع تجربه عن الاكستيرا وقال ان حرارته ترتفع مع الزحمه والتطعيس وقلت كثيرين اشتكو من هالشي
وزعلو الشباب يبوني امدحه غصب

اما الفورشنر معروف انه حق كد واعتقد المديلات الجديده كبرو حجم التانكي  يعني تفادو العيب في السابق
ووقت البيع لاتدور مثل تويوتا
قد بعنا فورشنر 4 سلندر  بعد الكد والمد ماطول والا هو طاير ولايبلشك زبونه موجود على طول


up 2 down 3
شويخ من أرض مكناس 2823
قبل 5 سنه و 10 شهر



انا قايله الفورشنر عز الله انه موتر واسعارها طيبه بالسوق

وتستاهل +1 على صراحتك بطرح عيوب كل سياره ذكرتها




up 2 down 3
amear 1347
قبل 5 سنه و 10 شهر



وعليكم السلام .

تسلم ع الموضوع الجميل والتقرير الوافي 
وطريقة طرحك حلوة ومرتبة وتفتح النفس لقراءة الموضوع بالكامل 

تستاهل +1


up 2 down 0
w1w1 2206
قبل 5 سنه و 10 شهر



جابك الله....اولا تقرير وافي وكافي وبيض الله وجهك ورزقك من فضله

ثانيا شدتني نقطه مهمه وهي ان الاوتو افضل من العادي...الي اعرفه انه اريح..لكن افضل ياليت توضح اكثر....والاوتو انا مجربه ع الكامري كانت معي عادي ثم اوتو...الفرق حقيقه لصالح الاوتو الاحظ ان المكينة مريحه وبالخط تعطيك...لكن المشكلة بالطلوع...ماش.


ثالث واهم شي...ابي منك النصييبحه...

انا صبرت حول سنة كله عشان اطق لي فورتشنر وكالة خاصه ان شكله بيتغير...كل الي حولي قالوا انت خببببل الموتر قاسي ولا ينفع سيارة شخصيه...

قلن ياولد مالي الا اني اشتري فورتشنر 4 سلندر والباقي اطق لي فيه كامري وكالة...

انت وش شورك من خلال تجربتك....وهل لو اخذ مستعمل اخذ تماتيك بدون دبل ولا بدبل...علما اني راعي ديره ولا لي بالمناطق الوعرة مره..

وكررلك شكري.


up 2 down 0
المسلم اخو المسلم 417
قبل 5 سنه و 10 شهر



ماشاء الله تسارع ممتاز 4 سلندر ودبل كيف يقولون عزمه ميت! وبعدين يقولون يفصل على 150! إلا إذا الموديل الجديد يفصلمادري
تنصحني ب4 سلندر دبل 2015؟


up 1 down 0
inside 35
قبل 5 سنه و 10 شهر



اخي الحبيب عندي تعليق على نقطة ذكرتها انت وهي ان الفورتشنر 2006 تايلندي و2007 وفوق اندونوسي 
طيب انا عندي فورتشنر 2009 وصناعته تايلندي 
انا بس حبيت اوضحلك انه حتى بعد 2007 فيه تايلندي


up 1 down 0
امجد 10 163
قبل 5 سنه و 10 شهر



انا عندي فورتشنر 2009  4سلندر قير تماتيك دبل ماشاء الله عليه من يوم شريته نسيت شي اسمه ورش
صح انه قاسي ويفتقر للتطور الملحوظ في السيارات الاخرى .
لاكن اهم ميزه انه خرابه قليل بالكاد لايذكر ويبعدك عن غثاء الورش ونصبهم  
وانصح به لـ اصحاب الدخل المحدود  



up 1 down 0
abo.reetag 60
قبل 5 سنه و 10 شهر



حياكم الله جميعا 

الأخ/ شويخ 

نورت الموضوع واشكرك على التعليق +1

الأخ/ amear 

نورت الموضوع واشكرك على التعليق +1

الأخ/ W1W1

نورت يالغالي واشكرك على الأطراء +1

الأخ / المسلم اخو المسلم

اشكرك على المداخله ونورت يالغالي +1
جوابا لسؤالك ان القير الأوتو اشوفه اقوى من العايدي بسبب القير الأربع نمر على ما اعتقد ولا فيه مجال تضيع قوة المكينه مع القير 
الأوتو لكن في القير العايدي جزء من قوة المكينه يضيعه القير بسبب صحن الكلتش هذا اللي اكتشفته مؤخرا 
وبالنسبه لسياره انا انصحك فيها وبشده ولا يهمك كلام الناس مركبه مو بطال صحيح انه ماهو مثل راحة التاون كار لكن زي 
ماقلت مو بطال اهم شيء انه اريح من الهايلكس واهم شيء تاخذ دبل لأنه ماينفع جيب وسياره مرتفعه وبدون دبل وقد تحتاجه 
في يوم من الأيام 


الأخ / inside

نورت وشرفت الموضوع +1

بالنسبه لعزم اللي عندي ان شايل دبات الرصاص عشان كذا عزمه تحسن بالحيل
اما الفصله ترى ماهو كل الفورشنرات سوا 
اللي عندي الأوتو يفصل على 160 كم والعايدي اللي قبل يفصل على 165 وبعضها تفصل على 180 بالنسبه للأربعه سلندر
اما السته فا يوصل 200 كم المهم ان الموتر انصحك فيه وبشده اذا ماتبغى الصناعيه والورش لكن استخير وجربه اول

الأخ / امجد 10 نورت وشرفت الموضوع +1
كثير موديلات 2006 شفتها صناعتها تايلندي 
اما 2007 وفوق ما قد شفته الا اندنوسي ومتأكد 
لكن اللي عندك ما أدري من وين جاء 

الأخ / abo.reetag

نورت الموضوع واشكرك على المداخله +1








up 3 down 0
siaf 347
قبل 5 سنه و 10 شهر



بيض الله وجهك كفيت ووفيت

بالنسبة للاندونوسي والتايلندي....قريت قبل ان ال4 سلندر صناعه اندونوسيا..وال6 سلندر صناعه تايلندي..


اكرر لك شكري


up 0 down 0
المسلم اخو المسلم 417
قبل 5 سنه و 10 شهر



هل الفورشنر 4 سلندر يجي فيه دف لوك؟


up 0 down 0
inside 35
قبل 5 سنه و 10 شهر



اﻷربعه مايجي دفلك

وبالنسبه لصناعته حجم المكينه ماتفرق في بلد الصنع


up 0 down 0
siaf 347
قبل 5 سنه و 10 شهر



بالنسبه لكلام الاخ امجد ١٠ صحيح ١٠٠٪ انا شغال بالوكاله و متاكت من الكلام هذا 
حتى الكورولا في دفعات تجي من اليابان


up 1 down 0
نظره امل 398
قبل 5 سنه و 10 شهر



احسنت معلومه مفيده


up 0 down 0
siaf 347
قبل 5 سنه و 10 شهر