أضف سؤال أو موضوع جديد          

قصصي مع السواقه وبعض الحوادث اللتي حدثت لي

up 22 down 5
العمري عبدالمحسن 238
قبل 4 سنه و 7 شهر



السلام عليكم يا اخوان ...نغير روتين الممنتدى شوي وبكتب لكم بعض الحوادث اللي حصلت معي من اول يوم سواقه .. كفانا الله واياكم شر هالحوادث.. طبعا مداوم يا اخوان وانواع الطفش والمقصد من انشأ هدا الموضوع الترفيه ومشاركاتكم رقصصكم ايضا راح تثرى الموضوع .. نبدا باول حادث صار لي كنت في اولى ثانوي عام 2001 وتوني تعلمت السواقه على كابرس صابونه 95 وطبعا مكينه 8 سلندر الموهم مراهق وبيده موتر وحش وش تتوقع النتيجه ؟ اكيد انواع الدعس والدرفته ..



والله اتدكر يا اخوان انا ما عمري اخدت لفه الا بدعسه لازم اخشش الموتر على جنب بنطله ..تصدقون الصابونه كانت جنوط ودلع اول ما استلمتها من الشايب الله يحفضه وما كملت شهر الا وكفراتها كلها جنوط سوداء ..موب زحف لكن الجنوط الاصليه تكسرت من كثر ما سلمت على الارصفه . اول ررصيف كليته وهو بمثابة اول صدمه رسميه لمدثكم سالفته سالفه .. كنت ما خد الموتر ورايح البقاله بجيب صامولي وخبز وانا راجع البيت عالساعه 9 ونص بالليل واشوف زحيفة الحاره والعرابجه جالسين على راس الحاره وانا قلت فرصه خلني اسلم عليهم اوريهم اني صرت اسوق وكدا .. المهم اخوكم بالله شطفهم وسلم عليهم وسلم على جدار معاهم ..تخيلوا صدمت الرصيف وطمرته وخشيت بالجدار !! من قوة الغشامه ما هديت واناظرهم واسلم يعني شوفوني اسوق وما انتبهت الا وانا جايب العيد هههههههه.. ثاني حادث صار لي بعدها بفتره اخوي كان توه ماخد كامرى 2003 كان وقتها الشكل الجديد


واهل الرياض هديك الفتره كلهم طايحين بالتفحيط وهز الحديد كانت ثقافه لشباب الرياض التفحيط تلقى السربوت والعاقل والمطوع كل الشعب يفحطون حتى اللي ما يفحط يتفرج .. المهم كان اخوي كل ما نام ازرف المفاتيح ةاروح لشوارع الهجوله وكانت ديك الفتره كثيره جدا طبعا افك الطيس حق الموتر واقعد افر ومن قدك راكب كامري اخر موديل تخسى الفياقرا هههههههههه وكنت مرات اتحمس واعطيها جلنطات وارجع سريع للبيت قبل يقوم اخوي ..المهم مره رجعت الموتر يمشي على جنب حتى الدركسوون مايل بقووه ..طبعا ماكل رصيف بعد ما خديت نطله غبيه ...المهم خشيت البيت ورحت لثوبه واحط المفتاح وازبن لغرفتي بهدوء ..وانام ويدي على قلبي ..تخيل قمت واخوي يرافس ببطني وانواع الضرب يقول وش سويت بالسياره يالحيوان وانواع السب ..وانا مسوي فيها البرئ مدري وش السالفه عسى ما شر المهم ما عطيته اعتراف صريح ..راح اخوي وعلم الشايب ما دريت الا محضر بغرفتي ويسال نفس السوال ويعطيني نظرة اعترف احسن لك ..المهم اعترفت وخدت كم كف من الوالد الله يحفظه هههههه.. فيه بعد كم حادث صار لي عقب هالسالفه لكن الاقوى كان على التيما 2005 وقتها كانت جديده وكنت راجع من الشرقيه توني متوظف وموتر جديد وطاير ...يوم دخلت الرياض ما هديت قعدت على نفس الدعسه وانواع التخييط ..لين ما انتبهت الا في كابرس تسعاوي ماشي اقصى اليمين ومهدي وانا داخل يمين بكل سرعتي ابي اخيط والله يا اخوان ما كان فيه مجال حتى امسك فرامل خشيت فيه من وراء عالدعسه ..صحيح الله انجاني بعد عدة كسور وخياطه تتجميليه بوجهى الحمدلله لكن كان الحادث قوي ومستحيل انساه الى يومكم .. طبعا طلعت من الحادث الاخير بعدة فوائد اهمها اني صرت ما افك الحزام ابد لاني كليت ام الدركسون الشي الثاني اني ما عاد اخيط بين السيارات وكل شي ملحوق..وبرضه تخيلوا بعد هالحادث صرت اخلي مسافه بيني وبين السسيارات اللي قدامي وصرت لما اشوف احد مفرمل حتى لو كان بعيد اهدى السرعه لا ارادي... كفانا الله واياكم شر الحوادث ودمتم بود ..







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


انا مثلك في أولى ثانوي ومعي صابونه موديل 92 حقت الشايب الله يرحمه بس اخذتها 3 سنوات ورجعتها مثل مااخذتها

لان ابوي الله يرحمه يقولي لو صدمت والغلط عليك عادي اصلحها لكن تكون انت الخطا منك باخذ السياره وماتسوق ابد طبعا يالله وافق يسوقني بعد موافق وزارة الداخليه امي الله يحفضها ههههههههههه


up 14 down 0
شيخ المعارض 2012 347
قبل 4 سنه و 7 شهر



ههههههههههه الله يرحم على شايبك يا شيخ المعارض..

والله ياما جننت ابوي الله يطول بعمره ويعلم الله اني نادم على كل شي سببته له سواء من خساير والا هموم


up 5 down 0
العمري عبدالمحسن 238
قبل 4 سنه و 7 شهر



كان مع اخوي ونيت مستوبشي الوكاد انهم بيسافرون عليه بعد صلاة الظهر ابها 
وانا شلحت منه المفتاح على الاذان الظهر واجيك ماشي 80 والعب بدركسون يمين يسار يمين يسار ومادريت الا وانا طالع الرصيف وقاش عمود حق الماء طيرته


ويجيك الوالد يقولي طز بالسيارة ليش ماصليت الظهر وانواع التسفيل 
الحمدالله على كل حال تعلمت من الحادث ذا اشياء كثيرره 

كنسلت سفرت اخوي بس


up 3 down 0
majd2012 194
قبل 4 سنه و 7 شهر



اذكر مرة اخذت الكابرس حق اخوي وقعدت اخمس بالحارة الظهر
ومدري الا الثوب يعلق بالطارة واحاول ارقع بالسيارة وهي تلف
والطم في برميل البلدية الكبيرة الحديد اكرمكم الله 
ومدري والا هي تصقع بعد كم قلبة على غرفة الكهربا حقت الحي
يمكن مسافة 10 متر من قوة الصدمة وانزل اشوف الكبرس مافي
الا جلدة الصدام انخدشت بس وحمدت ربي انها جت على كذا طبعا الكابرس
 89 ايام عزها 


up 3 down 0
ابو عبدالله احمد 3458
قبل 4 سنه و 7 شهر



كليت ام الدركسون ههههههههههههه .. زين ليه ما طلع الأيرباق ؟


up 3 down 0
muayad 1 768
قبل 4 سنه و 7 شهر



طيب وش رايك باللي شاري سياره جديده و يوقفها عند البيت وتلقاها محكحكه 
و الصدام طايح ههههههههه غبنه صح 


up 1 down 0
i6rb_ 161
قبل 4 سنه و 7 شهر



انا مره اخذت الهايلوكس 90 
واول ما شغلتها لحمت بالنخله قدامي وكان وقتها بالعيد و الوراعين يلفون بالمزرعه وشافو السياره مصدومه 
خلال ثواني كل اللي في المجلس عرفو و اشوف ابوي جاي باللي الاحمر
اسميه السوط الاحمر ههههههههههههه
وامسط وماتمسط 

ومره صدمت في المدينه وقالي تفداك السياره وعاد وقتها تمنيت انه يحطني تحت كفر السياره ويقطعني ويجيب السوط الاحمر ويخلي ظهري مطبات ههههههه
لان اذا سامحني احس بالذنب اكثر من انه يضربني 
حتى الاحظ اذا ضربني عادي ارجع اجلس عنه ما كان صار شي 
لكن ان سامحني اكره نفسي صراحه 

واول ما حطو ساهر الله لا يوفقهم
 كنت مجنن ابوي بالمخالفات وسحب مني السياره  ههههههه



up 6 down 0
sehly11 644
قبل 4 سنه و 7 شهر



انا اول مره صدمت فيها بكورولا 2010 الساعه 9 بتوقيت جرينتش ليلا

طبعا بالبدايه كنت رايح مستشفى الثغر حتى قلت للوالد

المهم رحت مستشفى الثغر انتظرت ما جاء سراي طول مشيت قلت بروح الجامعه اتعشى

يوم وصلت كبري الجامعه ثلاث سيارات ورى بعض تصادمو وانا كنت داعس ما انتبهت الا وهم بوجهي وامسك فرامل وصدمت بجهة الشمعه اليمين قلت الحمدلله ما تظررت كثير

ما ادري الا وراي مصري اول ما جيت ابغى انزل الا هو صادمني قو من الخلف ودفني على الي قدام وهو راعي فان الا السياره معفوسه ههههههههههههههه ه ه ه


المصري نزل في ايه وانا حتى ما قدرت انزل الا من القزاز من الوهقه ضربت المصري كف وهو يقول في ايييه هههههههههههههههه ه ه

كنت خايف من الوالد ههههه ه ه


طبعا السالفه يوم كنت بثاني ثنوي """""


up 2 down 2
07sbeshal 1344
قبل 4 سنه و 7 شهر



الحمدلله اخوي مؤيد انه الكابرس مافيه ايرباق وتمام ان الثوب ماشكل 
ايرباق علي هههههههههه 


up 1 down 0
ابو عبدالله احمد 3458
قبل 4 سنه و 7 شهر



حسيبشال
مشاء الله يوم كنت ثاني ثانوي كنت بالجامعه ؟
وشلون 


up 0 down 4
i6rb_ 161
قبل 4 سنه و 7 شهر



وكل دقة بتعليييييييمه ً


up 1 down 1
moody9900 38
قبل 4 سنه و 7 شهر



^^^^^^^^^^^^^^^^^^^^^^^^^^^

الجامعه هذا حي بجده اسمه حي الجامعه مو الجامعه الي ببالك " """"""""""


up 2 down 1
07sbeshal 1344
قبل 4 سنه و 7 شهر



استغفرالله ياربي كنت في مراهقتي ابليس كنا تدرون وش نسوي كان الوالد معاه كابريس 86 قديم الكلام ذا قبل 20سنه كنت اناوولد خالي عسى الله يرحمه ويتوب عليه نشتري طبق بيض ونلف بالحاره ولد خالي مع الشباك مطلع نص جسمه ومتلطم ومافي نتصيد في الباكستانيه تفقيش بالبيض وفي الوجه هههههههههههه والله ياداهمنا مداهمات اناشغلتي على الدركسون وضبط الطريده لولد خالي وولد خالي عليه الرمي بس ايام كنا نضحك موت من الافلام الي نشوفها الحمدلله الحين عقلنا من زمان بواجد بعد ماتوفى ولد خالي وعمره 20 وصراحه ندمان بس يقوللك كل زمن يكون الواحد بعقل عسى الله يتوب علينا


up 2 down 4
قودزيلا -62
قبل 4 سنه و 7 شهر



ههههههه بما اني من اصغر الموجودين عمرا 
انا صدمت اول ما طلعت سيارتي من الوكاله بشهر 
ب ٢٠١٣
كنت بخريص مودي الوالده الله يحفظها وطالع ماسك الخدمه والسرعه ٣٠ الى ٧٠  بس تصلبت الفرامل وشمعت ب يوكون 
وكان اول حادث لي الحادث موب قوي حتى الايرباق ما طلع لكن تضررت السيارة بس م وصلت المكينه 
والوالد الله يحفظه اول م عرف جا وتحمد بالسلامه وما جاب طاري للحادث مع ان الخطا ١٠٠٪ علي بس التامين شامل 




up 2 down 1
بدون آسم 238
قبل 4 سنه و 7 شهر



بدون اسم تدري يمديك تشتكي الشركه ان سيارتك جديده و تصلب الفرامل


up 2 down 1
i6rb_ 161
قبل 4 سنه و 7 شهر



الحمدلله 5 سنين اسوق ولا حادث عليه العين كلها حكحكة بالعالم ينزل ويسامحني ,, 

طبعا عندي ميزة (موهبة) ما اصدم اي شي يتحرك هههههههه يعني مستحيل اصدم سيارة تمشي , اصدم اي شي ثابت مدري يستفزني
ما خليت شي ثابت الا وحكيته ,, 

احلى موقف قبل 4 سنين تقريبا واقف عند ماك الصباح انا وخوي نبي نفطر ,, واقف عند طلبات السيارات وفي 4 سيارات قبلي 
من الطفش قدت ابدل رجلي من الكلتش ابي احط رجلي اليمين بددل اليسار وانا معشق 1 , مدري وش صار رجلي فكت عن الكلتش 
وتنتع السيارة واخبط باللي قدامي وتنتع مرة ثانية واخبطه مرة 2 هههههههههههه اغتصاب مو حادث ,,
كيف نزل معصب تخبطني ومعه افالون فاكه من الوكالة ماله يومين ,  وحنا واقفين ابي نجم والشرطة قلتله جيب اللي تبيه انا عندك وبصلحلك لو تبي وكالة 
قالي ياخي الجو حر نرجع العصر نمثل الحادث , مشيت دق علي العصر قالي خلاص ما ابي شي ههههه


up 1 down 0
underground2 105
قبل 4 سنه و 7 شهر