تبي تشتري ماحد يبيع تبيع ماحد يشتري

السلام عليكم يالربع عندي مشكله مالقيتلها حل معي النترا 2012 اوتوماتيك
اذا كنت ماشي في حاره او مكان مكتوم اسمع صوت "زززز" تحت السياره
كانه صوت كيس ناشب تحت واذا رفعت رجلي عن الدعسه الله يكرمكم يختفي الصوت
واذا دعست رجع .. ماهو مضايقني بس اخاف يكون بدايه خراب علما اني
بدلت فلتر البزين وشيكت على الشكمان وكل شي سليم مين مرت عليه 

الشريطي هو رجل نصاب محتال لا يخاف الله وأحيان تجدهم مجموعات تتكون من ثلاثة إلى أربعة أشخاص لا تجد خامس بينهم , يتجمهر في مدخل المعارض أو على سيارة بائع للعب على السذج من بعض الناس الذي جاء لبيع سيارته أما لحاجة أو لتغيير سيارته .

أساليب الاحتيال :-
- دائماً تجد الشريطي يخفي عن العالم أنه شريطي فمرة تجده ( حاسر ) ومرة لابس ( طاقية ) ومرة ( نظارة سوداء ) ومرة ( جنتل ) وهكذا , وإذا جاء يسوم منك السيارة يقول لك أنا مو شريطي أنا جاي من الحفر ( حفر الباطن ) أو من القصيم وتحصله دائماً يسب ربعه الشريطية ويقول يلعبون على العالم وما يخافون الله ( يبعد الشبهه عن نفسه ) .

- في بعض الأحيان تجد الشريطي معه ولد صغير ( أبنه ) حتى يبعد الشبهة عن نفسه , كأنه جاي يدور سيارة لولده وهو شريطي محتال .

- ودائماً يبخس ثمن السيارة حتى لو كانت جديدة وينزل سعر السيارة إلى أبخس الأثمان _ يعني _ سيارتك تسوي في السوق 70 ألف أول ما يسوم يقول لك _ 48 ألف _ ومن بعدها يسوم بسعر أعلى , وأحيانا لم يقرب من سعر السيارة يعني 62 أو 63 والسيارة سعرها _ 70 ألف _ تشوف الشريطي يرمي عليك العربون ويطلبك بنخوة عربية , أو تشوف ثلاثة أذناب _ شريطية _ معاه يقولون لك ( تراها قيمة طيبة والله ) ومن هذا الكلام .

- تجد الشريطي يحاول يركب السيارة أو يقول لك أنزل بسوقها وهذا ( غلط ) لأن ما يركب السيارة أو يحاول يسوقها الإ اللي أعطى سعر يعجب صاحب الحلال أو فرق سعر السيارة عن سومة وقبل صاحب الحلال بالسعر اللي عطاه الشريطي ولا تنسى أن الشريطي المفروض ما يركب السيارة الإ تكون أخذت عربون _ أقل شي 500 ريال _ وبعضهم محتال ونصب يقول لك ما عندي عربون ..!! هذا لا تخليه يحرك السيارة ( أطرده ) .

- بعضهم يتفقون شريطية أثنين عليك حتى يعرفون حدك في السيارة يعني أنت دخل السوق ووصلت السومة 64 ألف ولم تعجبك السومة يقولك الشريطية كم حدك , لا تقول له كم حدك قول لك أنت سوم عشان _ تكفشه _ يعني لو فرق وقال 65ألف تقدر تقولهم عطني عربونك وكذا يكون أرتبط معاك وتحصل دائماً مكالمات جوال بينهم ( مثل الحرامية ) .

- دائماً حاول أنك ما توضح السعر اللي أنت تبيه وترضى بالسومة الأولى _ في أول مرة تجي المعارض لبيع نفس السيارة _ لان الشريطية يعرفون شكل السيارة لو جيت مرة ثانية ويعرفون أنك مضطر للبيع وينزلون سعرها لأن يخبرون بعضهم بعض فتحصل الشريطي أول ما يسألك عن السومة يوقف بعيد ويدق جوال يستفسر .

- لا تخلي شريطي يجرب السيارة أو يركب مكان السائق الإ والعربون في جيبك لا يلعب عليك ويقولك دقيقة ولا شوي ولا روح للمعرض الفلاني ثواني والإ يركب معاك يقول أمش شوي في السيارة الإ والعربون معك عشان ما يدخل إلى معرض تابع لهم ويجتمعون عليك أربعة والإ خمسة شريطية يضيعون وقتك في السوم الفاسد , يعني السيارة قبل 10 دقايق أنسامت بـ 65 يقولون لك هاه راحت بالــ 60 ألف ...!!! أنتبه .

- لا تعطي حدك في السيارة دائماً وأصر على كلمة ( سوم ) للشريطي حتى لو كانت السيارة مسيومة قول له أفرق السوم لأنه بعضهم يقولك والله فيه رجال موصيني على نفس الموتر ويبي يعرف سعره عشان أخلص معاك , وبكذا يعرف حدك ويصير تعميم عن حدك وبعدها الكل ينزلك ألف وألفين من حدك في السوم .

- لا تعطيهم رقم جوالك الإ اللي ( صامل منهم ) لأنهم أنذال يأخذ رقم جوالك يدق عليك دقة وحدة عشان إذا ما بعت السيارة تتصل عليه وتقول له أنت اللي سمت سيارتي بهذا المبلغ خلاص ببيع يروح ينزلك 4 ألاف ولا خمسة ألاف .

- لا تقول لشريطي عن سيارتك أن فيها كذا وكذا وأتركه يكشف السيارة وإذا سألك عن شي قول له الموتر قدامك , لأن هذه طريقة تعاملهم ما يعلمك إذا في السيارة صدمات , أو تخبيط أو غيرها الإ إذا كنت واثق من سيارتك .

لاهنت يالثامنة مع داوود ..

مشكور يالثامنة مع داوود بس ردك كان من موضوع مكرر 

اووووووف ياداود وش ذالحقد كاتب مجلدات فيهم الظاهر رصعوو فيك لليل

والله حسستوني ان الشريطي عميل استخباراتي مره طاقيه مره جنتل  هذاصار007 ههههههههههههههههه

لابد أن يعاد تنظيم سوق السيارات في السعودية ، وأن تكون 

هناك لجان تفتيش لأن الحاصل في أسواقنا للأسف الشديد 

تلاعب وغش وتدليس من قبل ضعاف النفوس بالأمس كنت 

بالسوق أبحث عن سيارة رأت عيني عجب العجاب رجل يملك

سيارة من نوع سوناتا موديل حديث أصرو الشريطية أن السلعة

مرشوشة بينما سمعته يقول إتقوا الله الموتر بإسمي من الوكالة 

ولم يستخدمة غيري ولا يوجد به رش ومع ذلك 3 شريطية يقولون

إنه مرشوش وبخسوا سعر السلعه ما أقول إلا الله المستعان 

ولا أخفيكم أن أسعار الحراج هنا مبالغ فيها مع وجود كذب وتدليس 

في العروض المقدمة إذ يوهمك أن السيارة لا تشكو من شئ وعند

اللقاء والفحص تجد المصائب ويحتج بقوله أنا شريت وما فحصت 

وما أدري عن الخرابات إلا الأن ويرجع ويغكي كذبته بقوله بس 

ترا السيارة أنا مستخدمها وما شفت منها إلا كل خير عموما الله 

يرزقك يا صاحب الموضوع بما تتمنا وأنا أبحث عن سيارة كذلك إذا 

تبي خوي معك نشتري من دبي إرق سنود أنا خويك وسلامتكم .

انا حاضرها 
شاري له موتر ماشي ٥٠ الف ب٩٤ الف وقلت الله يرزقه 
وتفاجاء ان الموتر واقف في معرض وحاده ١١٠ الف طلع من اهل المعرض 
وقلت خذ المكسب المعقول انا رجال مستخدم 
وحشرته اني حاضر بيعته 

ما شاء الله فيه ردود اطول من الموضوع بكبره

الثامنه مع داوود

ماشاء الله عليك

مقال كامل 

المشكلة كلها البعد عن الدين
تلاقي الواحد يبي فلوس وما همة
حلال ولا حرام كلها واحد

يارجال انا قبل حدود شهر بعت سيارة كامري جي ال اي لون ابيض ماشية 198 كانت تنسام ب 35 من واحد من العيال معانا في الشقة والموتر وردة وردة بويه بلد من الصدام للصدام المهم مافكنا الايوم راح وجة الموتر قلنا له انا وولد عمي يلا الحين نبيعك مارضى يشتري المهم صلحنا الموتر ورجعنا نستخدم قام الكلب يتكلم وحشرناه المهم طابت نفسي من الموتر جيت ابيع ويجونك الشريطية ويجونك بعض السذج الي مايفهم في السيارات يسمع كلام الشريطي المهم اعطيكم نبذه عن واخد غبي غشيم في السيارات وانا وضحت له الصدمه وموريه الصور للسيارة بعد وقبل الحادث المهم الرجال يقول ماني مقتنع ان ممشاها 199 ؟؟؟؟؟؟؟؟؟؟؟ قلت له انت تركت الصدمه ونظافة السيارة ونظافة المحركات و و و و وجاي تشكك في ممشى السيارة قام الغبي كلم راعي معرض قالة كامري لون ابيض وممشاها 200 و موديلها 2006 انحش هاذي تكسي منزل العداد قلت له يارجال رح اشتر من ربعك حقين المعارض وخذ من الخرد الي بسوق وفي الاخير بعتها يماني ب 18 الله يرزقة حسيت انه بيسعمل بعت له والله يعوض علينا خير

انا ما ادري عن حجم المعاناة اللي مر فيها البعض اكيد في ناس لها تجارب كثير في بيع وشراء السيارات ,, 

لكن انا رحت كثير على المعارض والشريطية تلقاهم عند اول السوق وينشبون لك عند قزاز السيارة ,, 

لكن ما حسيت بالمشكلة اللي تتكلمو عنها يعني الشريطي يجيك ويسالك كم السومة ويبخس وانت تقدر تطنش ,, 

يعني البيع بكيفك مو بكيفه ما احد يغصبك على انك تبيع بسعر ماهو عاجبك ,, 

والبيع لازم تروح على السوق اكثر من مرة عشان تحصل السعر اللي يعطيك حق السيارة مو مرة وحدة ويسومونه الشريطية
وتمشي وخلاص ,, 

الزبدة البيع والشرا بكيفك ومو مغصوب انك تبيع شريطية والمستخدم يبان من شكله وكلامه 

واسف على الاطالة

لامعاناه ولا غيره مجرد شماعه الكل يعلق عليها
الشريطي بشر يدور  رزقه فيهم اللي يخاف الله وفيهم اللي يدور المكسب بااي شكل ومايحوز نعمم عليهم جميع ونظلمهم  وانا شايف كثير من اللي تكلمت معهم يوم ادور سياره صريحين ويقولك السياره عيوبها اما السعر فهم يبالغون لكن ماني مجبر اشتري لكن الاهم انه يبين لك العيوب ويسمح لك تجرب 
المعاناه الحقيقه مع بعض المستخدمين اذا بيبيع مايسمح لااحد يتكلم بسياره او يذكر عيوبها ويشوفها انظف سياره  وياما خسرنا مشاوير بسببهم وعلى كلامهم واذا جيت تلقى بقايا سياره  وسبق تكلم كثير من الاخوان عن الموضوع  يدق مشوار وبالاخير سياره غير المعروضه بالموقع 
وبعدين كأن السوق مافيه الا شريطيه !! طيب وين المستخدمين ؟.  ولا اذا ساموها بسعر ماناسبك قلت شريطي واذا اعطوها حقها قلنا هذا مستخدم ؟ 


خذوا لفه بالموقع وشوفوا اسعار السيارات مع ملاكها ارقام بعضها فلكيه ولا  بينما تنزل السوق بتلاقي اقل بكثير 


الظلم مايجوز وكل كلمه محاسبين عليها فلا نظلم الناس واذا بنتكلم بسوء نخص ولا نعم 


اللهم صل وبارك على سيدنا محمد 

الشريطيه اكبر نصابين