الي يعرف شركات سعودة

كثيرمانشاهد اعلانات سراً أو جهراً من قبل مؤسسات أو شركات يطلبون موظفين سعوديين براتب الف ريال الفان ريال اقل اكثر من غير أن يعمل ، يعني بفصيح اللسان يبون الاسم وليس الشخص بادعاء أن السعودي لايرغب العمل ويكفيه الف ريال وهو جالس في بيته . 
اختي المواطنة أخي المواطن لا تاكلوا فتات الخبز طوعا واختياراً . 
وزارة العمل تحت قيادة الحكومة الرشيدة وزعت قطاعات العمل على الشعب السعودي بالتساوي دون تميز . 
وعليه وضعت نسبة معينة لكل قطاع عمل يشغله سعودي ولا يزيد عدد العمال التي تحت رأسته عن تسعة عمال . وأن اراد الزيادة لابد أن يوظف سعودي ، 
وكذا الحال أن أراد أن يفتح نشاط آخر أي قطاع آخر أي كيان آخر لايستطيع الا بشرط أن يضع موظف سعودي . 
فأنت عندما تضع اسمك مقابل مبلغ رمزي من المال سواء كنت متقاعد أو عاطل فأن ذلك ليس من صالحك وليس من صالح بقية المجتمع السعودي .
حيث بأسمك يفتح نشاط ويكون تحته تسعة عمال ، فاسمك في الواقع يسوى الكثير من المال لايقل عن خمسة الاف ريال شهرياً .
وعلى سبيل المثال المواطن الواحد يستطيع فتح تسع بوفيات ويضع لكل بوفيه عامل ومن ثم هو يستطيع ادارتهم من حيث يلبي ما يحتاجون له ومحاسبتهم . 
أو يأتي شخص اخر يستخدم اسمك ويفتح هذا النشاط مثلا ، فلا تصيح او تولول وتبكي أوتسب وتشتم ! عندما يستخدم اسمك وتزداد البطالة يوم عن يوم . 
حيث لايستطيع اي مواطن زيادة العماله لديه او فتح اكثر من نشاط مختلف الا بتوظيف سعوديين ، فلا تكن بؤرة فساد على نفسك قبل أن تكون على غيرك . 
مع التزام المواطنين لايوجد بطالة ، والمشاريع ممكن تأخذها عدة مؤسسات ، وأيضا المؤسسات الصغيرة تتحول لشركات حتى تكون كبيرة . 
يعني لا تستغرب بكرة فلان يتصل عليك يقولك ابيك تشاركني حتى يكبر مؤسسته ويستطيع اخذ مشروع أو عليه توظيف مواطنين برواتب عادلة .




وتحياتي لجميع المواطنين المحبين لهذا الوطن ارضا وشعبا .




تعرفون وش الي قاهرني ، الحكومة حطت حافز للي توهم متخرجين وعاطلين عن العمل حتى يتم تسوية امورهم بعد ذلك ، لكن مع الاسف مصرين يعيشون على فتات الخبز بادعاء مافيه وظايف ، وما أن ينتهون من حافز الا ويذهبون للسعودة الوهمية ، ولا بعد قوة عين يبون خدم وحشم ويقولون مافي وظايف الجمل والالفاض مو جاية تتراكب ، يخليكم ربي ، 
وبعدين سؤال مين الي وضع قيمة السعودة الوهمية على اساس راتب الف ريال ؟ ليه ماصارت خمسة ألاف ريال مثلا كثرة عرض ؟ لهذه الدرجة يعني يقدر يشتري سيارة بستين الف ولا يقدر يفتح مشروع بعشريت الف ريال مثلا ، عجب 
من الليوم الراتب أقل شي خمسة الاف يبونك بعمل او جالس في البيت اسمك ماخوذ ومحطوط في السستم او انطر يجيك دورك لاتنافس ولا شوف لك مشروع .
وأنت يالي توك متخرج تعرف لو سجلت سعودة وهمية وحبيت تاخذ سلفية لأي مشروع ما يعطوك ، لأن من شروطهم ماسبق لك العمل شفت كيف تخسر وهذا غير لو مسكت مخل بالنظام سعودة وهمية راح تعاقب انت والي وظفك . 




ابي افلها 
نسمع مقالات كثيرة ، ومثلا للي يحب المثال :- 
الأجانب ماكلين البلد ، مو مخلين للسعودي مجال ، التحويلات المالية والتي تخرج من البلاد كذا وكذا ، 
طيب إذا أنت تقول هذا الكلام وتشجع على السعودة الوهمية وتزيد باسمك عدد العمالة الأحنبية وش يكون وش نسميه ؟ 
مريض نفسي ، أو متناقض ؟
أنت وغيرك لمن يتم محاربة السعودة الوهمية راح يستقيم الوضع خلال فترة ويحدث تأقلم واستقرار .
وليكن شعارك لا للسعودة الوهمية ـ لا للتنازل ـ لا للكفالة ـ وراح تشوف كيف تتغير الأحول وكيف العمالة تعمل معك بشكل صح . 




المفيد وخلاصة الكلام والزبدة 
الحاسب الالي السستم حق الاحوال المدنية مربوط بوزارة العمل وتشوف الموظفين من خلال التعداد الموجود وطالما مسجل انت او غيرك في التأمينات وتعمل لاتفك حلجك وتقول مافيه عمل ماهو مسئولين عنك تعمل عمل وهمي براتب بخس برضى منك رغم التحذير ورغم اعطائك حق كأي مواطن تمارس حقك وسلامتكم من قول أهـ 




طبعا الطالب مايبونه سعودة لان مكشوف كيف يدرس ويعمل في مؤسسة وياليت يربطون سستم وزارة التعليم مع مكتب العمل ويعرفون من خلاله الطالب هل مازال يدرس او لا ويطبق بعدم اعتماد الطالب في نظام السعودة طالما يدرس ويحق له العمل جزئي لكن لايعتمد في نظام السعودة طالما هو يدرس //
وياليت يطبق نظام بعدم تسليم الموظف راتبه كاش ـ لابد يحول في الحساب البنكي الخاص للموظف ، كان تشوف السعودة كيف تمشي صح .
يعني مايتم قبول الموظف في التأمينات الا بخطاب من البنك انه محول راتب الموظف في البنك //

والله لا وضيفه و لا مصدر دخل
والله ان حالي ضيّق يشهد الله 
يشهد الله ماعندي الا حق اكلي وشربي
لكن اني ادخل سعوده ؟
والله ما اشد ريال حرام 
ونقول ليه دولتنا كلها فساد 

صحيح اني عاطل لكن مستحيل اخذ سعوده لانها حرام

( ومن يتق الله يجعل له مخرجا ويرزقه من حيث لا يحتسب ) 

وليش ما تتوظف 
شوف بنده عندهم وظائف سعوده بدون شروط
شوف هرفي وماكدونالدز و ليتل سيزر كلهم برواتب 4500 ريال ولا يبون شهادة يكفي ابتدائي

صدقت يابو عبد العزيز + ١ لايك الوظايف واجد حتى بعضهم يطلب دوام جزئي احسن من الفرفرة بالشوارع ع الفاضي رح دور رزقك كم ساعة وتنصرف ببيتكم 

وبعدين نقول الاجانب اكلو رزقنا  ! 

لو عمرك فوق 40 او 35 سنه نقول صعب تشتغل بمطعم رغم اني من ناحيتي اشوفه عادي
لكن المشكله اللي يجيك عمره 18 الى 25 سنه ولا يبي يشتغل بمطعم رغم انه لا بينظف ولا يطبخ
يمسك كاشير عادي وش المشكله 
اذكر كنت بشركة قبل 3 سنوات كانوا يجون شباب يقدمون علينا ويسألون تعطون سيارات 
نقوله لا نعطيك بدل مواصلات 1000 ريال ومن خلال بدل المواصلات هذي يقدر يطلع سياره فيها
يرفض ولا يتوظف لاننا ما نسلمه سياره هذا وش تقول فيه اعتقد مثل حالة صاحب الموضوع

as187

معليش عطيتك ديسلايك وجيت بعدله قال لايمكن تقيم اكثر من مرتين باليوم



---------------

صاحب الموضوع اذا تبي وظايف 
ادخل موقع بطالة 

وروح لوظايف منطقة الرياض 

او على حسب منطقتك راح تلقى وظاايف بالهبل 
انا حصلت فيها وظايف برواتب 4800 و 5000 وقدمت وقبلوني ورحت لهم 
بس الحمدلله الله رزقني بوظيفه ثانيه وتركتهم قبل اتوظف 

لاتيأس ترى الشيطان يبي يوصلك لمرحلة اليأس ثم التفكير في الحرام 

يابو عبد العزيز يبون سيارات عشان يلعنو والديها تفحيط وهجولة وتخييط بين السيارات لو سيارته مايسوي فيها كذا ويتوظفون شهر ياخذ الراتب ويرمي السيارة ويحط الثوب بفمه وينحاش 

طيب اللي يدرس بالجامعه ويصرف على بيت

كيف يتوظف ويدرس..؟

في دوام جزئي مسائي 4 ساعات وتاخذ نص راتب ماهي شينة تفك ازمة 

أنت في الـرياض ؟ 

ياشباب اللي خابر وظيفه دوام جزئي بتبوك يعلمني 

ياراعي الاعلان طلبك عندي كيف اقدر اتواصل معاك

موجود وظايف في بنده بالهبل ويعطونك سكن بعد لكن انت اي مدينه

المشكلة اللي يجيك عاطل وياخذ سعودة

والله ان العمل والذهاب له يكسبك خبرة ماهي بسيطة وتصير ملكع بشكل لا يوصف ولا احد يلعب عليك وتصير عندك افكار تجارية وتقدر تفتح محل وتشغله

اشتغلت في 4 شركات وكل شركه لها مجال مختلف عن الثاني منها الاطعمة ومنها الشكولاته ومنها الاجهزة الكهربائية ومنها المحاسبة

واصبح لدي خلفية جيدة في البيع والشراء ولله الحمد