استشاره في شراء فورشنر 4 سلندر لهل الخبره ابوصادق89

اشتريت على ايدي ثلاث من الوكالة والحمدلله كلهم اربعه سلندر تماتيك طبعا انا من الكويت صرف البنزين ممتاز طبعا مخصص له من المصنع بانزين 91 
السيارة للامانه ممتازه كما يسمونها للاستعمال ليست للفخامه المكينه هي مكينة هايلوكس البلاكات اصبحت تتبدل كل اربعين الف تستطيع تبديلها الى اريديوم عيوبها الهيئه الاماميه خفيفه ليست كما البرادو لاني الان امتلك البرادو اربعه سلندر الفورتنر اسرع واخف بشكل كبير 
اي سؤال انا حاضر 
هذا والله اعلم

جزاك الله خير ونعم فيك وفي اهل الكويت كلهم  وقفنا الله وياك 

برايي يشتري له موتر حسب امكانيته بدبل 
يعني يقدر مثلا يدور له باجيرو موديل 2007 أو 2008 ولا 
لأن الموتر بدون دبل تخاطر به اذا رحت لرمل ومعك عايلة مشكلة كبيرة جداً

الوالد معه واحد 
والموتر جربته في البر وعلى الخط 
في البر ما راح أقولك توب التوب ، لكنه يمشيك وتراه موب حق تطعيس بمعنى انك تأخذه عشان تجلده بالبر ، لا لا ، الموتر بسيط بالبر وقدراته عاديه وحق تمشي بالبر بس 
اما في الخط فـ انسى انك تشوف الراحه ، لا عزل ولا شيء وحتى ما يتعدى 160
بس ميزته انه صبورر ويتحمل 
داخليته حقت هايلوكس ونسخه من الهايلكس بعد 
ولا تنسى تستخير وبالتوفيق 

توي أقرأ انك بتأخذ بدون دبل ، اذا بدون دبل ما راح ينفعك بالبر ، لان اللي كتبته فوق انا اقصد الدبل ، وبالتوفيق 

يمكن كلامي مايعجب بعض الأعضاء لكن هذا الواقع

نسيبي اشتري واحد 2013 وسألته عنه وش وضع الموتر في الطريق والبر ...
صار يمدح فيه وكأنه طيارة ...

أخذته في رحلة للتنهات انا اسوقه وقلت سراة 140 و160 في طريق القصيم والسيارة بكل أمانه ماهي مريحة ابدا وتسمع صوت الازفلت والكفرات والراحة ماهي مريحة والهايلوكس اريح منها

دخلنا البر تخيل السيارة منزل الهوا 12 بس مع ذلك السيارة إذا جئت نفود صغير تسمع طقطقة بالمحرك أعتقد من الضعف اللي فيه
إذا شددت عليه يعطيك لكنه غثيث بقوة ...وإذا تعلق انسى يطلع يبغى لك جمس يسحبه وعساها يطلع ...هذا الدبل فكيف العادي

أحب اقولك كلمة
يوم مدحه نسيبي لي لأنه مبلغ علمه وطول عمره هاي لوكس ...معذور إذا بيقارنه بهايلكس ...


الناس عجائب هالوقت
لأنه فيه ناس يركب يخت 2015 او افالون 2015 يقولك ما في فرق بينهم.... وهذا لأنه بعض الناس ما تفرق معه أهم شئ سيارة تؤدي وتجيب وخلصنا ...آخر همه المواصفات والسلامة والأمان والفخامة والزيارة والثبات وقيمتك انت عند نفسك هي الأهم .....
يعني انت وين موقعك في خريطة السيارات ...

أنا مستحيل أخذ سيارة ينزل منها دفع رباعي وأخذ بدون دبل ...
لو تنزل بجنب الطريق وتغرز ويطلعك الدبل مرة واحدة تساوي عندي الكثير من الجلوس وانتظار دورية أمن طرق يتمنن عليك أو تجلس ناشر للرايح والجاي !

أو راعي سطحة يسحبك ب 100 ريال وذل ما بعده ذل إذا استغل حاجتك

تابع مواضيعي عن الفورشنر
شريناه من النسيم 2008 وارد الامارات اخذه خويي عشان ابوه

تقريبا استخدمه سنيتن وشوي ماطلب منه الا زيوت
ويوم جينا نبيبعه كان مكسر شوي وجاب قيمه وانباع بسرعه

باختصار ياخذه ولا يخاف
سيارة كرف ومكده وال 4 سلندر بدون دبل تراه اقوا من الهايلوكس ولايغرك انه مكينة هايلوكس

السبب ان دفرنسه اقوا
يعني نفس حكاية الفيكتوريا البوليسي والعادي فيه فرق بينهم فالقوه لكن نفس المحركات ماراح يندم عليه

بس لايدور على راحه وعزل وفخامه وثبات 
مشكلته ان تانكيه صغير وكل شوي تعبي بنزين

4 سلندر هايلكس مصندق ..
عزم فاشل 
حنة المكينه عالية عند 120 والضغط على 3.2
عند التجاوز فاشل يبي لك ترده نمرة 
مطبه قاسي 
الحسنه الوحيدة انه حق مكدة