أضف سؤال أو موضوع جديد          

سيارتي والحرامي ...

up 8 down 6
ssv8 1048
قبل 7 سنه و 7 شهر



السلام عليكم ورحمة الله وبركاته 
أسعد الله أوقاتكم يا أعضاء منتدى حراج 
وأسأل الله لي ولكم المغفرة بالدنيا والاخرة ولمن تحبون


هذي السالفة يا إخوان صارت لي أمس ، ولا اكتشفت الموضوع الا قبل شوي

اللي صار بالمختصر يا شباب ، إني أمس بالليل وصلت للرياض ولله الحمد ، دخلت الرياض وعلى طول رحت للبيت ، وصلت البيت نزلت ثيابي وأغراضي ودخلت للبيت . 
بعد ما نزلت الأغراض طبعًا ، ((نسيت أقفل السيارة))
المهم صحيت اليوم والحمد لله وطلعت من البيت بروح مشوار ، فتحت شنطة الموتر أبغى أنزل أوراق عشان أجهزها وأروح أخلص شغلي . 
يوم فتحت الشنطة الا فيه غرض مو موجود ، وش السالفة يا ولد وين راح هالغرض هذا ، أمس فاتح الشنطة وكان موجود قدامي 
إلا يجي على بالي اني نسيت السيارة مفتوحه ولا قفلتها ، وأنقز أمشي مليون داخل السيارة اشوف اغراضي اللي جوا والحمد لله إن أغراضي موجوده
وهنا بدا عقلي يلعب فيني
أنا أنسرقت وإلا لا ، طيب إذا فيه حرامي دخل سيارتي ليش ترك كل هالاغراض اللي جوا وركز بس على الغرض اللي بالشنطه
بعد كل الهواجيس اللي جتني إقتنعت إنه فيه واحد سرقني ، بس اللي ما اقتنعت فيه ليش ترك كل اللي بالسيارة وأخذ الغرض اللي موجود بالشنطة ليش هالغرض بالتحديد 

طبعًا بقولكم يا شباب وش الأغراض اللي بسيارتي ، عندي 3 أجهزه جوال داخل السيارة طبعا الاجهزه مو لي ، وعندي مبلغ 4 آلاف ريال لكن بعملة أجنبية
وبالشنطة عندي ، الاستبنة والعفريته وبعض والاوراق وتقريبا مع الاوراق مبلغ 200 ريال


وخوينا الحرامي ترك اللي فوق كله ولا أخذ شيء منه 
تدرون وش سرق يا شباب ، أنا نفسي ماني مصدق 
ترك كل شيء وسرق شنطة تايوتا الحمراء اللي فيها العدة والمنفاخ والاسعافات الاولية
حتى طفاية الحريق اللي تجي جنب الشنطة الحمراء بالضبط تركها ولا أخذها

انا للحين متعجب يا شباب من السالفة 
وبنفس الوقت حمدت ربي انه ماخذ شيء ثاني 

وأتمنى منكم يا شباب انه محد ينسى يقفل سيارته في اي وقت ، ممكن تسلم مرّه لكن مو كل مرّه 
خاصة إذا كان معك أشياء لها قيمة ، أو أمانة لشخص معين 

أما عن الحرامي ، فما راح ادعي عليه بالعكس الله يهديه وأتمنى تدعون له بالهداية والله يسامحه يارب وتجعلها آخر ذنوبه 




وتقبلوا تحياتي إخوكم ssv8 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


احتمال تكون مسروقه شنطة العدة من زمان وتوك تلاحظها 
على العموم الحمدلله على سلامت باقي اغراضك 


up 3 down 0
سليمان بن محمد2018 59
قبل 7 سنه و 7 شهر



لا يالغالي ، انا من النوع اللي يحط الاوراق المهمه بالشنطة ، عشان محد يلعب فيها ، وامس العصر فاتح الشنطة وموجودة العدة !!


up 0 down 0
ssv8 1048
قبل 7 سنه و 7 شهر



الرجال يمكن انه مبنشر واخذه وناوي يرجعه

ويعدين كل الحولات بالسياره ومبلغ 4000 وتبون الامن والأمان


اذا الشخص بنفسه ماعرف يامن دراهمه ويحطها بجيبه كيف تبون الدوله تحميكم

الحمد لله جت على كذا


up 8 down 1
ابو ابراهيم2021 352
قبل 7 سنه و 7 شهر



الحمد لله انها جت علی كذا والله يهديه ان شاء الله


up 2 down 0
ابوخلوودي1 5070
قبل 7 سنه و 7 شهر



اخوي شيخ المعارض ، حياك الله اول شيء وجزاك الله خير على مرورك ، و صحيح اني مرتكب غلط يوم احد الاجهزة والفلوس بالسيارة ، بس واحد مثلي يالغالي يجلس يومين بالرياض وبعدين يسافر للدوام ويرجع وهذي حالته له 5 سنين ، وين تبي احط اغراضي ، ماعندي الا سيارتي هي اللي معاي 24 ساعه يالغالي 

اخوي ابو خلودي ، اشكرك على مرورك وجزاك الله خير 


up 2 down 1
ssv8 1048
قبل 7 سنه و 7 شهر



وحده من ثنتين ياربي اعماه عن باقي الاغراض

او انه خاف من احد او سياره وما امداه يقش ويفتش على رواقه

معوض خير 


up 3 down 0
ابو-لانا 185
قبل 7 سنه و 7 شهر



بسم الله الرحمن الرحيم 

إن شاء الله إنه درس لك وترى بعض الأوقات أدور 

لشئ وأنعمي ما أشوفه إلا بعدين مثلا بعض الأوقات

أجلس أدور للنظارة وأنا لابسها فسبحان الله يمكن 

إن اغراضك موجودة بس مع الربكة والإنشغال ما لقيتها

ودي وإحترامي .


up 1 down 1
إبن عجلان 512
قبل 7 سنه و 7 شهر



يا رجال بسيطة واحمد ربك انها جت على كذا



up 1 down 0
i6rb_ 160
قبل 7 سنه و 7 شهر



سؤال يا صاحب الموضوع

ايش نوع وموديل سيارتك؟؟


up 0 down 0
أبو عبادة 4852
قبل 7 سنه و 7 شهر



انا مره لقيت واحد نتف اغطية الجنوط "الشعارات" 
هههههه يعني ممكن يسرقك واحد على شغلة يحتاجها 
ولو يبي المادة كان شال الجنوط كلها لاني وقتها موقفها بعيد عن البيت 
اكيد واحد من حارتكم وﻻ حولكم ومعه تويوتا وﻻ مين بيجي من بعيد وعلى سيارتك تحديدا  عشان عدة اسعافات هههههههه
شكله واحد من الجيران انتبه لك لما تركت السيارة وماقفلتها  


up 1 down 0
al_orainy 56
قبل 7 سنه و 7 شهر



مشكورين على الردود يا شباب ، والموضوع بكبره غريب حتى انا للحين ماني مصدق !!  
واللي سأل عن الموتر ، اللي معي الان كرولا 2015 


up 0 down 0
ssv8 1048
قبل 7 سنه و 7 شهر



يمكن معه كورلا نفس الي معك وشافها مفتوحه واخذ شنطه هذي ماهي معه   وشكله مو حرامي 100 بميه 100 

حرامي بس صغير  لونه حرامي ميه بميه كان سرق سيارتك بكبرها 


up 0 down 3
سكودر 14928
قبل 7 سنه و 7 شهر



يارجال انا اكود منك قد نسيت مفاتيح السيارة فيها ودخلت البيت ونمت يوم صحيت ادور المفتاح  ما القاه واخرتها لقيتة على السيارة والحمدلله ما انسرقت 

نصيحة : دائما قل (لاي شي تخاف علية ) : استودعتك الله الذي لا تضيع ودائعة 

تراني مجربها بنفسي والحمدلله الله حافظني 


up 3 down 1
شليطيح 5018
قبل 7 سنه و 7 شهر



الظاهر انه مني حرامي توه مبتداء  ولا يمكن. ببيع العده 


up 0 down 0
مراجل2 95
قبل 7 سنه و 7 شهر



مره شفت واحد بحارة من الحواري، ولد يعني ماهو كبير قريب المتوسط، المهم يحاول يستدرج السيارات الواقفة 

بأنه يفتح بابها، وأكيد يقول بنفسه ممكن أحد نسي باب السيارة مفتوح، وكل مامر على سيارة جرب يفتحها،،، 

وصارت للوالد نسي المفتاح بس الجيران شافوه وهو داخل السيارة ونحاش،،، ما نقول إلا حسبي الله ونعم الوكيل عليهم 

(نصيحة حاولوا تلغون مفتاح الشنطة من السيارة، خلوها على الريموت فقط) وخلوا مفتاح الشنطة منفرط، موفقين 


up 1 down 0
محمد عبدالله عمر 635
قبل 7 سنه و 7 شهر



أنا سألت عن نوع وموديل السيارة لأن الكورولا حتى موديل 2013 والكامري حتى موديل 2011 فيها ميزة حلوة

أنت لما تحط المفتاح في قفل الشنطة تلفه لليمين حتى تفتح الشنطة عادةً، جرب تلف المفتاح يسار بيلف معك 90 درجة وبعدها اسحب المفتاح وهو على نفس الوضعية بتكون قفلت الشنطة وما تنفتح لا بالريموت ولا من الداخل

ما أدري إذا الكورولا الشكل الجديد فيها هذه الميزة ولا لغوها لأن الكامري الجديد بدون قفل مفتاح في الشنطة

جرب واعطيني خبر


up 0 down 0
أبو عبادة 4852
قبل 7 سنه و 7 شهر



اخواني الغالين ، الكورلا 15 ما فيها مفتاح للشنطة من الإساس ، لان الاستاندر اصلن فيها ريموت يشمل فتح الشنطة أيضًا 
شكرًا على الردود 


up 0 down 0
ssv8 1048
قبل 7 سنه و 7 شهر



و الله فيه خير الحرامي ما سرق الا الشي اللي يحتاجه
و معوض خير ان شاء الله


up 1 down 0
the son of the kingdom 927
قبل 7 سنه و 7 شهر