أضف سؤال أو موضوع جديد          

وكالات السيارات وخرطهم الفاضي المليء الطراطيع

up 17 down 3
أنيق 17576
قبل 6 سنه و 8 شهر



مساكم الله بالخير
ورمضان كريم على قولة وكالات السيارات
أنا أستغرب وأتعجب لما أشوف طول السنة الدفعة الأولى والأقساط نار نار تولعك من الغلاء وتعقيد ودفعة أخيرة
وأسعار السيارات طايرة ولا في خصومات ولا في تعاون مع العميل بالخصم له ودايما يقولون أسعار السيارات ثابتة ومسعره من الشركة مانقدر نخصم لك ولا هلله !!!
وتخرج من الوكالة وتطالع في السيارة الي تتمناها وأنت مكسور خاطرك وتقول مالي إلا أم عراوي يجرح ويداوي (الموتر القديم أبو سوتش ) هههههه الدنيا كلها تشغيل بصمة وأنت بالسكينة تشغل موترك ههههههه قسم حاله يرثى لها
والحين يوم جاء رمضان
السيارات
الي بدون دفعة أولى !!!! بعض السيارات توصل الدفعة الأولى 10 ألاف ترى يعني الدعوة حكحكة جيوب ههههه
والقسط بعد ماكان 1200 صار 999 هههههه حركات هونداي* خلاص قول 1000 ريال وخلصنا
والكاش بعد ماكان 130 ألف صار 109 ألاف سبحان الله وش هالطييييبة هههههههه حركات فورد للأكسبدشن يعني الدعوة لعب في لعب طول السنة !!
ليش مانسحب عليهم طول السنة ونشتري السيارات في رمضان ؟؟؟
أترك المجال لكم
تحياتي لكم
&أنيق&















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


شهر رمضان المبارك
يعني كنهم منزلين  عرض بسبب فرحتهم برمضان
شوف الطيبه !!!!
هذي حجه كي يبيعون اكثر عدد من المبيعات لهم
تعالوا ياجماعه عروض رمضان 
اللي يبي يصفط لك الخير يصفطه لك بكل وقت
سؤاءً بالشهر الكريم او بغيره

وهي ادانه لهم يعني كيف توفي برمضان وفيها ربح وبغير رمضان تزيد الاسعار !

والله مايسوون عروضات الا يبون يمشون السيارات اللي عندهم
ذكروني بسوق اكسترا سوو عروض
ويوم رحنا قلت انا ابي اشتري تلفزيون سوني ابو 12000 وقت العرض اكيد استفيد فرق قوي

واقسم بالله ياشباب الماركات العالميه المعروفه 
اذا هي ب 15000 ريال بشكل عادي ينزلون لك خصم 200 ريال

يعني يضحكون علينا
والماركات اللي معلقه عندهم وبلشانين بها كيف تتصرف
يبيعونها برخص 






up 9 down 0
السهل الممتنع 6401
قبل 6 سنه و 8 شهر



يا أنيق تعرف في رمضان مافي شياطين الى بعد العيد ويرجع الوضع العن من اول ويطلعون حق العروض وزيادة ..

أنا عارف يا أنيق ودك بالجديد لاكن أطلب الله الصحه والعافيه وحمارتك العرجا تغنيك عن سؤال اللئيم قصدي الفورد حقك .

واحلى لايك ياحلوا ...


up 8 down 0
أبو ميان . 157
قبل 6 سنه و 8 شهر



انتو كل شي عندكم يضحك عليكم....اذا ماخصموا تشكيتوا واذا خصموا ذميتوا..
من حق الوكيل له حرية سقف مايتعداها واذا خصم قلل من نسبة الربح العامة


up 5 down 4
talal abdullah 5414
قبل 6 سنه و 8 شهر



مشي حالك:)




up 5 down 2
أبو مجدوع 3343
قبل 6 سنه و 8 شهر



هم ينزلون الأسعار ويحطون عروض عشان يصرفون الموديلات 2012

عشان موديلات ٢٠١٣ على الأبواب

لايك

يا رب أرزق أنيق رولز رايز والصحة والعافية

وجميع الأعضاء


up 9 down 0
عاشق الكورفت zr1 6475
قبل 6 سنه و 8 شهر



هههههههه يبغون الله يتقبل صيامهم
مايتبون الا في رمضان وباقي السنه يضحكون على خلق الله


up 6 down 0
عماد الحربي0555 226
قبل 6 سنه و 8 شهر



انيق ... يلغون الدفعه ااولى ويطلعونها من القسط المتزايد سنويا .. يخفضون القسط ويطلعون من الدفعه الاخيره .. اسئل اي مصري تعرفه ثقه فالمبيعات وراح يضحك ويقولك ( همه بيستعبطو عليكو ) .. انيق **** هل قد سمعت عن شخص ( يتخيل أنه قاعد يتخيل ) هذي عروض الشركات


والله صادق شاقح

انا مجربهم عيال الكلب

ثق تماما اللي يقصوه من جهه يلحموه من الجهه الثانيه

وبالاخير هم اخذين حقهم كامل مكمل

هذي العروض يسمونها زغلله العيون

يبسط لك الموضوع وينتفك بالاخير


up 7 down 0
حكيم المعاني 10329
قبل 6 سنه و 8 شهر



اخوي انيق سبحان الله على ماقالوا الاخوان الشياطين
ترا مهي متاحه بالفتره الحاليه والله يانها تلعب دور كبير قبل رمضان وبعده هههههه

شوف قبلها فيه عروض من كيا قبل رمضان يقولون القسط 777 وبدون دفعه واحد من العيال راح الوكاله
قالوله دفعه اخيره 20.000 يعني شالوا الدفعه الاولى وجمعوها بالاخيره
يعني على المثل اللي يقول (صب الماء رد الماء) ماطاح شي من سعرها هههههههههه


صحيح اني خرجت عن موضوع عروض رمضان لكن تراها هيه هيه
تعددت الاسباب والموت واحد اقصد والنصب واحد . ياساتر


up 7 down 0
شكلين مآبحكي 4746
قبل 6 سنه و 8 شهر



المشكله بالمستهلك يهبون شراء بشكل دوري وخصوصا حقين التأجير المنتهي بالتملك اكثر الناس يمتلكون السيارات لانها الدفع بالاقساط

طيب اذا ظروفك ماتسمح ليش تطلع ثلث راتبك كامل للسياره خذ سياره توديك وتجيبك بشكل مايرهق راتبك الشهري

كفايه مظاهر الي مالها لزوم

السياره وسيله وليست غايه


up 5 down 0
abahal 1384
قبل 6 سنه و 8 شهر



أنيق ونعم بك وبموترك وبالحاضرين كلهم ..


up 2 down 0
أبو ميان . 157
قبل 6 سنه و 8 شهر



الدفعه الاولى ياشباب على مقدار الراتب يعني الي راتبه ٥٠٠٠ وسياره سعرها غالي اكيد بيكون فيه دفعه عشان القسط مايتعدا ثلث الراتب
لاكن الي راتبه قوي وعالي مايحتاج يدفع لاكن قسطه بيكون كثير شوي

وبخصوص العروض مثل ماقلت ياصاحب الاعلان الي يبي يشتري سياره ينتظر الرمضان احسنله يكون فيه عروض
او ينتظر نزول الموديل الجديد 


up 3 down 0
بشوش 5097
قبل 6 سنه و 8 شهر



عيال الكلب ()كيا اجي عند حق المبيعات يعطيني سعر ملعون جد على سياره ماتسوا ريال (ريو) رحت عند واحد غيره نقصلي الفين من السعر الاصلي اللي قاله لي الاول
يبيلك تلف على كل مندوب لين تطلع 20 الف خصم كلهم نصابييييييييين في رمضان وغيره الندوب اصلا له نسبه من البيعه


up 4 down 0
ابوسعود32 199
قبل 6 سنه و 8 شهر



انيق كالعادة وانجزت واوجزت وناس كثير لقو الخبر عندك كانو يدورو العروض :)

لايك زي العسل زيك :)


up 3 down 0
فل اوبشن mr 3278
قبل 6 سنه و 8 شهر



هم دايم كذا ما تنزل العروض الا فرمضان المعارض والبنوك وأغلب المحلات ونصهآ من هذا كلـه دعآيـة فقط يوم تروحلهم تحصل كل العروض غير وتختلف تطلعلك شروط غريبه ولازم تكون متوفره فيك عشان تحصل على هذا العرض يعني عروض ( جلب زباين بس )

بس ماشاء الله ليكزس مسويه عروض اذا أشتريت تآخذ من عندهم صندوق تمر ههههه .. تحياتي لكم


up 2 down 0
wanted555 401
قبل 6 سنه و 8 شهر