معروض علي gxr بس جايه صدمه من الامام ؟ وش رأيكم اخذه

والله اشوف سعره فلكي جدا 
60 الف على سيارة عمرها 17 سنة مرة كثير

شوف لك موديل جديد بذي القيمة

اول شيء : من قالك ابعد من المصدوم وبالاخص من الامام فالله يجزاه خير وصدق

شريت لومينا اس اس مصدومه من قدام صدمه خفيفه وطلعت مأثره على الظفيره ومدري ويش

وصلحتها وطلعت مشكلة بالكهرباء وبعتها بخسارة الفين ريال مع اني كنت ابي اتكسب فيها بالحلال مع تصوير الصدمه وايضاحها للمشتري او اني ابين له محل الصدمه واشرط انها نظيفه وتصليح ممتاز وان طلع خلاف كلامي انا اتحمل قيمة الفحص

لكن خسرت فيها

والحمد لله شريت سيارات ثانيه صدامتها من الخلف ولا تكلف ولا تأثر على السياره وتنباع بسرعه

لكن اللي مصدوم من القدام متعب ومعقد ويطلع خرابات لك انت في غنى عنها لان اساس السياره من الامام

كل شيء في الامام

وثاني شيء : سعرها جدا مبالغ فيه جدا مبالغ فيه

حصلت 2004 جي اكس ار اتوماتيك محدود ب 70 الف لون فضي وكان من وقفته جيد جدا يعني الرجال يمكن يبيع 67 للصامل

اللي شفته ما يسوا 40 الف وترا 98 مر عليه فوق 20 سنه وش تبي بوجع الراس وانا اخوك وخرابات وتصليحات

وحتى سواقت القديم سيئه الفرامل تعبانه وما تمسك والعزم ثقيل والمكينه صوتها مرتفع

تدري 60 الف وش تجيب لك سياره عائليه

تجيب لك فورد اكسبلور 2010 ولو زودتها الى 70 الف ممكن تجيب لك الشكل الجديد 2011 

وتجيب لك جيب مازدا 2009 فل كامل ب 60 الف نظيف جدا

وكمان تجيب لك ارمادا 2008 

وايضا تجيب لك جمس يوكن او سوبربان نظيف جدا جدا 2005 او 2006 ويشهد الله انه عز وانه كفو وكان مع الوالد واحد ومشا فيه 400 والمكينه مكينة بلاده الله لا يضره وبدأ يطلع دخان بعد ما عدا 430 الف ووضبه على 470 الف وباعه على عمي والحين ماشي فوق 550 الف والتوضيب للعلم كلف 3500 ريال فقط

لا تقول تويوتا ومدري ايش

ترا الموديل القديم والله ليطلب ويخرب حتى ولو تويوتا

خذ موديل جديد مايطلب افضلك وسواقته متطوره 

صحيح ، أبعد عن السيارة المصدومة من الامام بسبب وجود 80% من قطع السيارة في تلك المنطقة.

كلام اخوي ابو يزيد في محله وان اشهد ان الجموس من2001 الى 2006 مواتر وخدومة وعملية
يوكن او سوبربان ما عليهم كلام هالموديلات والقرار لك مبلغ 60 الف تجبلك سيارة طيبة
والله يوفقك وابعد عن المصدوم من الجهة الامامية

مكروف أكثر من 15 سنة ويبغي 60 
انا اقول دور غيره يكون احسن واصبر بتلقي النظيف أن شاء الله

98
و 60 الف
ومصدوم من قدام

ماهو منه

من الي مطيرين اسعار الخردة

الله المستعان موديل 98 وبـ 60 ألف ..!!!!

كنت أبقولك دورلك على سيارة على الزيرو اللي في حدود الستيان مثل الكورلا وغيرها ولكن شكلك تبي سيارة مرتفعة وعائلية ...

المهم انا ما أعرف شي عن أسعار السيارات ..أهل الخبرة يفيدونك ..

وعليلكم السلام
غااااااااااااااالي با الحيل على موديله
والله لو سليم ما يوصل ها السعر
اعوذ بالله راعي السياره مجرم

98 جديد اظنه كان ب100 او ب120 الف
يعني يبي نص قيمته بعد كل هالسنوات
مع عمي مثله مطلعه وكاله و ماشي قليل
لكن ما فيه مواصفات بدون ايرباقات و فرامله ثقيله و العزم وسط و مو مريح و ضيق على العائلة

دور زين و بتلقى انظف و اجدد و يبقى لك من ال60 ان شاء الله

مثل ماقالوا الأخوان موتر فيه صدمه من قدام لاتأخذه حتى لو صلحه عند افضل ورشه او الوكاله. الموتر قيمته كلها في الامام ممكن مع المستقبل تجيك خرابات مكان صدمه

ريان .. فكر بعقلك .. عندك استعداد تدفع 60 الف ريال
على موديل صار له اكثر من 15 سنه وكمان مصدومه ..??

طبق كلام الغالي ابو يزيد و صدقني ما تندم

تحياتي 

ماخذين في اكس ار موصفات لكزس امريكي 99 قبل 3 سنوات ب 58 الف لانه قبل 3 سنوات واكثر

نصيحه لك اذا الصدمه ماهي قويه ونفسك في جيب ومصمم جيب لايتعدا سعره 40 الى 45 بس اهم شي الصدمه خفيفه 
او ماوصلت المروحه

مع انه من رائي لا تاخذ شي قديم 

للعلم الموديل 1998 والقير عادي وحده علي بـ 60 الف 

^^^^^^^^^^^^^^^^^^^
ما اقول غير رزق الهبل على المجانين

إن كنت تبي سيارة دفع رباعي بهالقيمة، تجيب لك هونداي توسان أو كيا سبورتج موديلات 2011 و 2012 فل كامل نظيف مرة.
ويمكن تجيب لك تويوتا راف4 2010 و 2011 نظيف مرة بس ستاندر.

وش الله حادك تركب موتر حتى موديل ال 2000 ماوصلها ومكرور على وجهه وصادم به ويجي يلعب عليك ويتكسب منك 60 الف انس تويوتا ليش المبالغ الفلكية ذي


خذ لك تاهو ولا يوكون 2007 وفك عمرك واحسن منه بلميون مررة لا شكل ولا مواصفات ولا مركب ولا قيادة اجل اخذ واحد ولى عليه الزمن ولا له نظرة حتى في الشارع ب 60 الف مستحيييييل