تركيب عازل حرارة على الإف جي
4
4
إضغط هنا للإخفاء
بسم الله الرحمن الرحيم
الحمدلله رب العالمين والصلاة والسلام على محمد ابن عبدالله
بالبدايه اعتذر اني ماصورت شيء لأن الفكرة مقتبسه من أحد الشباب
وهي فكرة تركيب عازل حراري في سقف السيارة
طبعا بشغل شخصي وشغل يدي
وتوفير كافة الأدوات اللي احتاجها بالفكرة من الألف إلى الياء
طبعاً انا سيارتي Fj موديله 2008 رقم 1
معروف ان السقف في الاف جي مزعج خصوصا مع الخط لأنه شبه مخفف ولذلك تسمع له ضجيج
وانا كنت افرفر باحد المنتديات لقيت فكرة تركيب العازل للسقف
فاقتبست الفكرة ولكن غيرت في نوعية الاداة الاساسية وهي العازل اللي راح اركبه في السيارة
طبعاً اولاً الادوات /
مفك 12
سكروب + و -
علبة صمغ مضغوط من عالم ساكو 77 بقيمة 120 ريال
لفه عازل حراري سعودي بتكلفة 75 ريال
متر قياس
مشرط
قلم خطاط
====================
بالبداية فكيت كل شيء له علاقه لوو صغيره في انه يمسك السقف بأي شكل
نزلت الشمااسات
المراية
المسكات
الديكورات الجانبية الامامية والوسطى والخلفية
بعدها يتم تنظيف السقف بقطعة قماش مبلله لتنظيفه من العوالق
اخراج السقف يتطلب وجود 3 اشخاص لأن فيه اطراف زايدة حاول قد ماتقدر انك ماتعفط فيها حتى
لاتكسرها
بعدها
اخذت القياسات للسقف
وكما هو معروف ان السقف فيه حديد فاصل وتكون حديدتين
اخذت قياس المربع الاول
وقصيته في العازل
رشيت المربع الاول في السقف بالصمغ المضغوط بطريقة متساوية مع التكثيف على الاطراف
والمنتصف بشكل +
وتم تركيب القطعة الأولى بحيث يكون القصدير الفضي بإتجاه الأعلى ( الملاصق للسقف )
و بنفس الطريقة عملتها مع المربعين الآخرين بالسقف
وكررت العملية مرة اخرى لتدبيل العازل لزيادة مستوى العزل
وبعد ان انتهيت من تثبيت العازل على السقف
يتم اعادة السقف بنفس طريقة التنزيل واعادة تثبيته بتوقيت واحد
شخص من الامام
شخص من وسط السيارة
شخص من آخر السيارة
ويتم التثبيت الأولي بكلبسات لمبات السقف اللي بالنص واللي بالاخير
وعندما انتهيت من الشغل كله
ضللت السيارة بشكل كامل تضليله (( نيكل )) وكلفتني 100 ريال
النتيجة عزل حراري بشكل ممتاز جدا جدا
وعزل الصوت رآئع جدا
المكيف صار من أبدع مايكون وبصراحة تفاجئت من النتيجة العجيبة وبصراحة كنت مستهين بالفكرة
اول كنت اوقف السيارة تحت الشجر واركبها وهي حارة
الان اوقفها عند الباب وفي عز القايله اركبها والله ولا اطلق حماية ولا اطلق عازل حراري نانو سيراميك
وكل الشغله على بعضها ماكلفتني 500 ريال
وشغل يدي واضمنه
واللي يبي يجرب على سيارته الافضل يشوف طريقة فك السقف بس عشان مايخرب شي على نفسه
وباقي المتطلبات سهله جدا وتلقاها بأي محل مو شرط ساكو
واي استفسار انا حاضر
واللي يبيني اركب له العازل ماعندي مشكله ^_^ بس يجيب لي الادوات كامله والشغله ماتاخذ ساعتين
إبلاغ
الردود
1
0
بالتوفيق لك اخوي وتتهنى بسيارتك والنانو سيراميك الجديد ههههههه
1
0
والله تعبنا من الاستغلال و الاستغفال البشع و الجشع
من الورشو الزينه و بعض الاجانب هداهم الله
و اللي يبي يجرب الفكره على سيارته بيحس بفرق
شاسع
الا اصحاب فتحة السقف لانها ممكن تقلل من جوده العزل
الا اذا ضللها نيكل كاتم من الخارج
بيتحسن العزل الحراري للافضل
و سبب اختياري للنيكل دون الاسود
لان الاسود يسحب اشعه الشمس و يكتمها داخل السياره
و النيكل يعكس الاشعه كافه و يبقى قليل من الاشعه
يدخل السياره دون حراره ملموسه
التجربه الجايه على كامري 2013 فل كامل فتحه سقف
باذن الولي اصورها لكم اول بأول
1
2
صور المرة الجاية صور كثيرة أو فيديو و والله الناس بتدعيلك ليل ونهار.
كنت حابب أسأل هل الطريقة تيجي على أي سيارة ؟ لأن معي جي إم سي صغيرة ولونها أسود والحر فيها على أبوه :\
1
1
بنفس الخطوات و الادوات لانها اساسيه
و ان شاءالله اشوف سياره يبي لها عازل فاصور قبل وبعد
0
0
... ودنا نشوف صور الكاسات مليانة وبعدين فارغة :D
0
0
و صور من الشهادات و كفيل و شيك و مشهد من العمده
1
0
قبل 9 سنه و 9 شهر