مبلغ مالي 20 - 30 - 50 الف لمن يعثر على سيارتي؟ وش اللي حادك

21 11

لايمكنك التصويت حتى الحصول على 20 نقطة على الأقل
إضغط هنا للإخفاء

وجه البومه 202
قبل 10 سنه و 3 شهر

السلام عليكم ورحمة الله وبركاته

كيفكم ان شاء الله طيبين

مدري انشرت اعلانات كثيره جدا 

عن سيارات مسروقه 

ويقولك اللي يلقاها له 20 الف والبعض والله وصلت معه 50 الف

وشفت موضوع قبل اسبوع او قبل اختبارات الطلاب

جيب شاص مسروق واللي يحصله له 50 الف ريال هنا بالمنتدى

شفتوه ولا لا ؟

اللي مسوي الموضوع حاط فيه اكثر من سياره وعباره عن صور فيها المعلومات


طيب وش الله حدك على كذا ؟؟

ليه ما فكرت شويتين وشفت لك حل

يعني خلنا نكون واضحين


اغلب السيارات اللي تنسرق 

60% ما يحصلونها ويفقدون الامل , والله يعوضه يا تروح تشليح او تختفي لاسباب مجهوله

20% كانت تفحط ويرميها يعني قير و مكينه وكلش باي باي , تشليح

10% تلقاها مصدومه ومرميه , اغلب حوادث السيارات المسروقه >> تشليح

8% تلقاها مرميه في برحه مهجوره ولا احد يعرفها وواقفه من سنين ومخبطه وحالتها حالت

1% تلقاها نظيفه وما فيها شيء وهذا شيء نادر جدا جدا و اكيد ما سرقها الا سوا فيها شيء

1% تلقاها بالحجز , وهذا السبب نادر

___________________________________________

يعني السياره اذا انسرقت انسا انها ترجع مثل اول

يا انها ما ترجع اصلا , والله يعوضك

او ترجع لك وعلى طول على التشليح لانها كانت تفحط 

او ترجع لك مصدومه وعلى طول ع التشليح

او ترجع لك بعد كم سنه و تلقاها مرميه و مكسر قزازها

يعني قد انقهرت و انغبنت و كرهت الدنيا

ويمكن يلقاها لك واحد على هالحالات ^^ وتزيد الطين بله وتروح تدفع له مبلغ وقدره عشان حصلها


فانت الان خسرت 4 اشياء

اولا خسرت سيارتك , إما انها تروح ولا ترجع او انها ترجع لك سكراب

ثانيا خسرت فلوسك , بثلاث طرق , يا ان السياره ترجع لك تشليح وتخسر قيمه السياره او وواحد يحصلها لك وتدفع له فلوس او انها تكون مصدومه وواحد يحصلها لك وتدفع له فلوس لانها حصلها و تبيعها موترك تشليح

ثالثا خسرت راحة البال وما تعرف تنام الليل وكرهت الدنيا

اخيرا والاهم الحرامي ما تعرف مين هو

تبغاه يطيح في يدك عشان توريه نجوم الليل في وضح النهار



طيب لو فكرت شوي

وشريت لك جهاز تتبع للسياره

ما كان افضلك !!!

اولا رخيص , الضاهر الاشتراك بالسنه ب 1200 يعني كل شهر 100 ريال >> يا بلاش

ثانيا , مو شرط للسرقات

يفديك باشياء كثيره


مثلا


تحطها بسياره السواق , تعرف من وين يجي ومن وين يروح 

ثانيا , اذا ضعيت السياره في مواقف حقت السوق او غيرها

وما تدري من اي بوابه دخلت

تطلع جوالك وتدخل على موقعهم بالنت و يطلع لك السياره وينها 

وتعلمك وين تروح لين توصل عندها

ثالث شيء

تحصل السياره اذا انسرقت وهذا الاهم , و90% تحصلها في وقت قياسي وبدون اضرار

وتوفر العشرين او الخميسين الاف اللي راح تدفعها للي حصلها

و تحصل سيارتك بسرعه وبالك ما ينشغل عليها لمدة شهور 

وترجع لك سيارتك مثل ما كانت عليه قبل السرقه

لان ما بيمديه اصلا 

على طول تقدر تجيبه في ساعه

واهم شيء تصيد الحرامي و تطلع اوم اوم حرتك فيه وتلعن خامس خامسه وتبرد خاطرك فيه


و ابذكر لكم قصة زميلي


زميل لي انسرق منه سياره توريس لانه تركها شغاله

وجاب راس اللي سرقها ب 3 ساعات

فقط ب 3 ساعات والاضرار كلفته 20 الف 

لانهم كانوا يلاحقونه وحدوه وركب رصيف و انكسرت الجنط والمساعدات والمقصات والمكينه نزل منها الزيت ومشا عليها وخبطت نص المكينه

لكن اهم شيء لقاها

و20 الف او 30 الف اللي بيدفعها للي يحصل السياره

صلح بها سيارته

واشترا راحه البال في الاول والاخير

وما قعد شهور وهو مغبون لانه ما حصل سيارته

وصاد الحرامي وجلده جلده جلده وكان بيموته في يدينه

وقال والله لو ماحصلت الحرامي كان انغبت اكثر واكثر


والحرامي اصلا دفع له قيمة الاصلاح كامله



وهو اصلا غلطان , لو لحق الحرامي لين ما وقف و نزل اخذ السياره

وبعدين مسك الحرامي

كان ما خسر شيء

لكن نقول عوافي

واهم شيء رجع له موتره + رجع له بأسرع وقت عشان يعني ما انقهر وانغبن + لقا الحرامي + الحرامي صلح له الموتر 

وبس

حبيت انصحكم تشترون الجهاز لانه والله مفيد جدا جدا ومزاياه كثيره ورخيص

والله يوفقنا ويوفقكم و يكفينا شر السرقات

اللهم امين

محبكم واخوكم : وجهه البومه


الموضوع انا كاتبه ما زرفته مثل الموضوعين السابقه

لا والله كتبته عشان افديكم وانتم بحسبت اخواني وابغالكم الخير

#ولا_تنسونا_من_اللايكات_الله_يسعدكم

تحياتي

http://www.youtube.com/watch?v=hwXMY9DOQgc

إبلاغ

الردود