كم أسعار الكامري 2010 او 2011

المعارض نظامها عادي

إذا ناسبتك السيارة تعطيهم عربون ما يقل عن ٥٠٠ ريال
و تروح انت و العامل تفحص الموتر
إذا طلع سليم الله يبارك لك و إذا هونت عربونك يروح عليك
أما إذا طلع فيه اشكاليات تكون مخير بين أمرين
١ انك تكلم راع المعرض يخصم من قيمة الموتر للإصلاحات
٢ انك تهون عن الموتر و تاخذ عربونك و تتوكل على الله

أما أسعارها تقريباً بين ٣٠ ألف لين ٤٥ ألف حسب النظافة و الممشى

اخوي معالم اذا بعطي كل معرض عربون خلصت فلوسي الزبده المعارض تتفق مع الرجال وتفحص لازانت لك عطيتهم عربون وكملت فلوسك هذا النظام

دورت قبلك قليل اللي نظيف و ممشى معقول و سعره مناسب
و اذا وصلت 35 او حول ال40
شف لك 2012 ترا اطيب مكينة ما تنقص و القير ايضا" انشط
لكن 2010 و 2011 مثل اول سالفة 2001 و 2002
سمعة على الفاضي ما في زود عن بقية السيارات المنافسة

عفوا قصدي معلم***

بالنسبه للعربون هذا يكون في الحرارج المكرفون وهذا حاول تبعد عنه لان الغش فيه كثير 
حاول تشوف اللي يجيبون مواترهم للبيع لكن يفرفر بالسوق رايح جاي ينتظر حد يوقفه لاتعطيه عربون وتطلعه من السوق لان لو ماشريتها هو كذا بيخسر اليوم وبينتهي السوق 
لكن خذ رقمه وقله اذا ما تم بيع الموتر اليوم اتصل علي او انا اتصل عليك و  تتقابلون وتفحصها ٢٠٠ ريال بمحل مضمون وبعدها تقرر 
لا تفحص الا السياره اللي دخلت مزاجك مافيها اصوات مافيها اختلاف باللون مافيها زيوت بالماكينه و تحت السياره مافيها رائحه زيت بالمحرك افتح غطا الماكينه لون الزيت طبيعي ماهو حليبي 
يعني خذ لك نظره شخصيه قبل تروح تدفع ٢٠٠ ريال وبالتوفيق 
واسعار الكامري تختلف حسب نظافته لكن لا تدفع بكامري ٢٠١١ اربعين الف حرررررام 

يعطيكم العافية 
وانتظر المزيد من الردود

اخوي عندي كامري ٢٠١١ للبيع
جي ال
اللون اسود
ماشي ١٩٠ الف
نضيف مررة
السيارة موجودة في الامارات الان ، وراح اصدرها انشا الله بعد اسبوع او اسبوعين ،
الموتر نضيف جداا

اذا يهمك الموضوع راسلني او اتصل علي .

حياك عبد المحسن
بالنسبة لمعارض الطايف
إذا شفت الموتر و ناسبك
العربون شرط أساسي عشان تطلع الموتر من المعرض و تفحصه

و بعدين متى يروح عليك العربون يا عبد المحسن ؟

فرضاً روحت لمعرض سين من الناس
لقيت عنده لكزس ٢٠١٠ ب ٦٠ ألف مثلاً

هنا أعطي راع المعرض نية الشراء و أفحص بكرة الصبح مثلاً
يطلبني عربون لحاجتين :
أولاً يتأكد من الجديه
ثانياً عشان يمسكني بالعربون

طيب أنا عطيته ٥٠٠ ريال عربون و جيته الصبح
طلعت الموتر و راح معي العامل للفحص
لقيت السيارة سليمة من الصدام للصدام
هنا أرجع لراع المعرض و أتمم معه و أكمل له ٥٩،٥٠٠ ريال + ٥٠٠ ريال موجودة كعربون
في حال فحص الموتر كان سليم من الصدام للصدام
و رجعت لراع المعرض و قلت له اني هونت عربوني يروح علي

أما في حال فحصت و طلع في الموتر مشاكل تكلف ٣٠٠٠ تقريباً
في هذي الحالة أنا مخير بين أمرين :
أولاً اني أهون عن الشراء و أرجع أخذ عربوني
ثانياً اني أصمل في الشراء و أطلب من راع المعرض يخصم لي قيمة الاصلاحات


و أنا تكلمت لك عن معارض الطايف و ظرورة العربون في الشراء
عشان المعرض يكون كسبان فيك بحاجتين
١ يتأكد انك جاد بالشراء و بترجع له
٢ انك إذا ما رجعت بيكون كسب ٥٠٠ ريال و هو جالس

والله ياخوي انا خبري على معارض الخرج واالرياض نظام غير

نصيحتي لا تاخذ كامري 2011 وانت نازل
الا اذا انت بتمشي وتعبي زيت للمكينه
هنا خذلك كامري 2010 او 2011
كل شي فيها تمام التمام يعيبها مكينتها